Fas Presidensi Mesej Disemba 2015
Givim Taem long Sevya
Hemi wan narafala Krismas bakegen, mo wan niu yia bae i stat i no long taem. I luk olsem we hemi i no long taem i pas we yumi selebretem taem we Sevya i bon mo mekem ol promes.
Long medel blong ol promes blong yumi long yia ia, ?yumi bin mekem promes blong givim sam taem blong laef blong yumi long Sevya mo mekem sam rum blong Hem insaed long hat blong yumi? Nomata hamas yumi mekem wetem promes ia, mi mi gat strong tingting ia se yumi evriwan i wantem blong mekem i kam gud moa. Krismas taem ia hem i wan gudfala taem blong luklukbak mo mekem strong tingting bakegen blong wok had.
Insaed long bisi laef blong yumi, wetem plante narafala samting we oli stap kompit blong pulum tingting blong yumi, hem i impoten se yumi mekem wan komitmen we yumi minim, blong tekem Kraes i kam insaed long laef blong yumi, mo insaed long hom blong yumi. Mo hem i impoten se yumi, semmak olsem ol Waes Man blong Is, i stap lukluk nomo long sta blong Hem mo “kam blong wosip long Hem.”1
Folem ol jeneresen i kam daon kasem tedei, mesej blong Jisas i bin semmak. Long Pita mo Andru, long saed blong solwota long Galili, Hem i talem long tufala se: “Yutufala i biaen long mi, yutufala i kam man blong mi.”2 Long Filip singaot ia i kam: , “yu kam, yu biaen long mi, yu man blong mi,”3 Long Livae we i stap mekem risit blong ol takis, instraksen ia i kam:, “Yu biaen long mi, yu kam man blong mi.”4 Mo long yu mo long mi, sapos yumi lisin, semfala invaetesen i stap kam long yumi: “Yu biaen long mi, yu kam man blong mi.”5
Taem yumi folem ol wokbaot blong Hem tedei mo taem yumi stap mekem folem eksampol blong Hem, yumi bae gat ol janis blong blesem laef blong ol narafala man. Jisas i invaetem yumi blong givim yumiwan long Hem: “Luk, Lod i askem blong mas gat wan hat mo wan maen we i wantem mekem samting.”6
?I gat wan man i stap we yu sapos blong givim seves long hem long Krismas ia? ?I gat wan man i stap wet long yu blong visitim hem?
Samfala yia i pas, long wan Krismas, mi go visitim wan olfala wido long haos blong hem. Taem mifala i stap long haos ia, bel blong doa i ring. Stret long doa i i gat wan bisi medikol dokta we plante oli save long hem i stanap i stap . Oli no bin askem hem blong kam; be, hem i bin filim save se hem i mas go visitim wan sikman we i stap hemwan.
Long spesel taem olsem, hat blong olgeta we oli no save aot be oli mas stap nomo long haos, i open mo oli wantem wan man blong visitim olgeta long Krismas. Wan Krismas taem, mi stap visitim haos we ol olfala oli stap long hem, mi sidaon mo toktok wetem faef olfala woman, mo olfalawan long olgeta i gat 101 yia. Hem i blaen, be hem i haremsave voes blong mi.
“Bisop, !yu yu kam let long yia ia!” hem i talem. “Mi ting se bae yu nomo kam.”
Mifala i gat wan gudfala taem tugeta. Wan long ol sikman ia, i stap lukluk i go tru long windo nomo mo stap ritipim bageken mo bageken se, “Mi save se boe blong mi bae i kam luk mi tedei.” Mi stap askem miwan se boe ia bae i kam o no, from i bin gat ol nara Krismas we hem i neva bin kam visit.
I gat taem yet, long yia ia, blong givhan, blong gat wan hat we i serem lav, mo blong gat wan spirit we i wantem mekem samting—long nara toktok, blong folem eksampol we Sevya blong yumi i bin putum, mo blong givim seves olsem we Hem i wantem yumi blong givim. Taem yumi stap givim seves long Hem, bae yumi no mestem janis blong yumi, be bae yumi mekem olsem ona blong smol hotel long taem bifo,7 blong givim taem long Hem, long laef blong yumi mo mekem spes blong Hem insaed long hat blong yumi.
?Yumi save andastanem naesfala promes we i stap insaed long mesej we enjel i givim long ol man blong lukaot long sipsip we oli stap long fil?: “Mi karem i kam long yufala wan gudfala nius we bae i givim yufala bigfala glad. … Long naet ia nomo, i gat wan pikinini i jes bon … hem i Mesaea ia we i Masta blong yumi”?8
Taem yumi stap givgivim ol presen long Krismas, letem yumi tingbaot, talem tangkyu, mo yumi kasem presen ia we i moa bigwan long olgeta presen—we i presen ia we i Sevya mo Ridima blong yumi, blong yumi save gat laef ia we i no save finis.
“From, ?wanem nao i gud long wan man, sapos oli givim wan presen long hem, mo hem i no tekem presen ia? Luk, hem i no stap glad long wanem we oli givim long hem, mo hem i no glad tu long man ia we i givim presen ia.”9
Bae yumi folem Hem, givim seves long Hem, ona long Hem, mo kasem ol presen blong Hem long laef blong yumi, blong yumi save kam, olsem we toktok blong Lihae i talem se, “ol han blong lav blong hem oli raonem mi blong taem we i no save finis.”10
© 2015 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/15 Oli letem translesen: 6/15 Translesen blong First Presidency Message, December 2015. Bislama 12592 852
Yusum Mesej Ia blongTij
Presiden Monson i singaotem yumi blong “mekem wan strong wok wetem ful tingting mo aksen blong tekem Kraes in kam insaed long laef mo long hom blong yumi.” Tingting blong toktokraon wetem olgeta we yu tijim, long olsem wanem olgeta i save wok strong olgetawan mo olsem wan famle. Ating bae yu stap tingting blong askem olgeta blong tingbaot wan man o famle we oli wantem visitim o givim seves long olgeta long Krismas ia. “I gat taem yet long yia ia blong go aot wetem han blong help, hat we i gat lav, mo spirit we i wantem blong wok.”