iVaqa ni Veisiko, Tiseba 2015
iVakarau Vakalou i Jisu Karisito: Yalololoma ka Yalovinaka
Vulica ena masumasu na itukutuku oqo ka vakasaqara mo kila na ka me wasei. Ena rawa vakacava ni vakalevutaka na nomu vakabauti Koya ka vakalougatataki ira o vakaraica voli na kilai vakamatata ni ivakarau vakalou ni iVakabula mai na veisiko? Me ikuri ni itukutuku, lako ki na reliefsociety.lds.org.
Vakabauta, Matavuvale, Veivukei
“Ena ivolanikalou, sa ibalebale dina ni yalololoma ‘meda vosota vata.’ Sa kena ibalebale talega me vakaraitaki na veikauwaitaki, veimositi, kei na loloma veivueti ki na dua tale.”1
“A vakarautaka vei keda o Jisu e vuqa na ivakaraitaki ni kauwai yalololoma,” e kaya o Peresitedi Thomas S. Monson. “Na turaga lokiloki ena tobu o Peceseita; na marama a beitaki ni dautagane; na marama ena ikeliwai i Jekope; na luvei Jairo yalewa; o Lasarusa, na ganei Meri kei Maca—era matataka yadua e dua na leqa ena sala ki Jeriko. Era a gadreva yadua na veivuke.
“Kivua na lokiloki e Peceseita, a kaya o Jisu, ‘Tucake, taura cake na nomui mocemoce, ka lako.’ Kivua na marama ivalavala ca a lako mai na ivakasala, ‘Lako, ka kakua ni valavala ca tale.’ Me vukei koya na marama ka mai taki wai, a vakarautaka o Koya e dua na mata ni wai ‘sa tovure ki na bula tawamudu.’ Kivua na luvei Jairo yalewa a lako mai na ivakaro, ‘Goneyalewa, au sa kaya vei iko, tucake mai.’ Kivei Lasarusa ka sa bulu tu, ‘Lako mai.’
“Sa dau vakaraitaka tu ga na iVakabula na sasaga tawayalani ni yalololoma. … Meda sa dolava na katuba ni yaloda, me rawa Vua—na ivakaraitaki bula ni yalololoma dina—me curu mai.”2
iKuri ni iVolanikalou
Same 145:8; Sakaraia 7:9; 1 Pita 3:8; Mosaia 15:1, 9; 3 Nifai 17:5–7
Mai na iVolanikalou
“Au a tekiduru kei watiqu ena yasa ni luvei keirau yalewa yabaki 17 ka masulaka na nona bula,” a kaya o Linda S. Reeves, na ikarua ni daunivakasala ena mataveiliutaki ni iSoqosoqo ni Veivukei. “A kena isau na sega, ia … keirau sa mai kila … ni … [iVakabula] e yalololoma kivei keirau ena neirau rarawa.”3
“E dua vei ira na noqu italanoa taleitaki mai na bula ni iVakabula oya na italanoa kei Lasarusa. E tukuna vei keda na ivolanikalou ni o ‘Jisu a lomani Maca, … na tacina [Meri], kei na [ganedrau] o Lasarusa.’”4 Ni sa tauvimate voli o Lasarusa, a vakau na itukutuku vei Jisu, ia na gauna a yaco mai kina o Koya sa mate oti tu o Lasarusa. A cici o Meri kivei Jisu, bale sobu ki Yavana, ka tagi. Ni raica o Jisu ni tagi voli o Meri, “sa vutugu ko koya ena yalona, ka … tagi” (Joni 11:33, 35).
“Oya na noda ilesilesi. E dodonu meda vakila ka raica vakataki keda ka vukei ira yani na luvena taucoko na Tamada Vakalomalagi mera vakila ka raica ka kila ni noda iVakabula sa mai taura Vua sega ni noda ivalavala ca walega ia na noda rarawa talega kei na vakararawataki kei na veika dredre me rawa ni kila kina o Koya na veika eda vakila kei na sala me vakacegui keda kina.”5
© 2015 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/15. Vakadonui me vakadewa: 6/15. Vakadewa ni Visiting Teaching Message, December 2015. Fijian 12592 858
Navuca oqo
O cei e rawa ni vakalougatataki ena nomu yalololoma?