iTukutuku ni Mataveiliutaki Taumada, Tiseba 2015
Vakarautaka na Gauna me baleta na iVakabula
Sa da baci donuya tale mai oqo e dua na draki ni Siganisucu ka sa kida vata voli mai e dua na yabaki vou. E vaka ga me se qai yaco tikoga ena noa ni da a marautaka tiko kina na sucu ni iVakabula kei na kena veinavunavu.
Mai na noda navunavuci ena yabaki oqo, eda a navuca li ka vakarautaka na gauna ena noda bula kei na rumu ena lomada me baleta na iVakabula? Se vakacava sara na noda mai rawaka voli ena gauna oqo vata na navunavuci vakaoya, au sa yalodei ni da nuitaka taucoko meda cakavinaka cake. Na gauna ni Siganisucu oqo e sa gauna vinaka saraga meda dikeva ka vakavouia kina na noda sasaga.
Ena ogaoga ni noda bula, vata e vuqa tale na veika eso e vakaosoosotaka tu na noda vakasama, e sa yaga sara meda cakava e dua na sasaga veidinadinati matau me kauta mai na Karisito ki na noda bula kei na noda matavuvale. Ka sa bibi meda, vakataki ratou na Tamata Vuku mai Natuicake, vakadeitaki tu ena Nona kalokalo ka “lako mai me cuva vua.”1
Ni sirovi sobu mai na veitabagauna, e se tautauvata tu ga na itukutuku mai vei Jisu. Kivei Pita kei Adriu ena matasawa o Kalili, a kaya o Koya, “Drau muri au mai.”2 Kivei Filipe a lako mai na kaci, “Muri au.”3 Kivua na Livai ka tiko ena vale ni soli vakacavacava a lako mai na ivakasala, “Muri au.”4 Ka vakakina vei iko kei au, kevaka eda vakarorogo ga, ena lako mai na veisureti veivakauqeti vata ga oya: “Muri au.”5
Ni da muria na mawe ni Yavana edaidai ka da vakatatamuria voli na Nona ivakaraitaki, sa na noda na madigi eso meda vakalougatataka na nodra bula tale eso. Sa sureti keda o Jisu meda soli keda: “Raica sa vinakata na Turaga na yalo sa malumalumu ka talairawarawa.”6
E tiko beka e dua e dodonu mo na veiqaravi kina ena Siganisucu oqo? E tiko beka e dua ka waraka voli na nomu veisiko?
Ena vica na yabaki sa oti au a sikova ena Siganisucu e dua na yada qase sara ena nona itikotiko. Noqu tiko voli ekea, a taqiri na lali ni katuba. A duri tu e katuba e dua na vuniwai kilai levu ka dau osooso saraga. A sega ni kacivi o koya; ia, a vakila o koya e dua na veivakauqeti me veisiko kivua e dua na tauvimate ka tiko duadua voli.
Donuya na draki oqo, e dau dolele yani na yalodra o ira ka vesuki tu ena mate eso ka ra gadreva vakaoti e dua na veisiko ni Siganisucu. Dua na Siganisucu ni sikovi voli e dua na vale ni veisusu, au a dabe ka veivosaki vata e lima na marama qase sara, ka qase duadua e yabaki 101. E mataboko o koya, ia a vakila na domoqu.
“Bisopi, o sa bera vakalailai ena yabaki oqo!” a kaya o koya. “Au nanuma ga ni o sa na sega ni gole mai.”
Sa ka taleitaki na gauna ni neitou tiko vata voli. Ia, e dua na tauvimate, a rai vakabalavu tu e tautuba ni katubaleka ka kaya voli tu ga, “Au kila ni na mai raici au nikua na luvequ tagane.” Au a vakananuma ke na vakakina, ni a tiko eso na gauna ni Siganisucu tale eso a sega ni basika mai kina o koya.
Se vo tiko na gauna ena yabaki oqo me dodo yani kina na liga ni veivuke, na yalo dauloloma, kei na yalo talairawarawa—ena vosa tale eso, me muri na ivakaraitaki sa tuva tu na iVakabula ka da veiqaravi ena sala e vinakata vei keda o Koya. Ni da sa qaravi Koya, eda na sega ni vakayalia na noda madigi, me vakataka na ivakatawa ni bure ena gauna makawa,7 me vakarautaki na gauna me baleti Koya ena noda bula kei na rumu me baleti Koya ena lomada.
E rawa li ni da vakila na yalayala vakasakiti e koto ena itukutuku ni agilosi a soli kivei ira na dauvakatawa sipi ka tiko voli ena vanua veico: “Au sa kauta mai vei kemudou e dua na itukutuku vinaka mo dou reki vakalevu kina. … Ni sa sucu vei kemudou ena siga oqo … na iVakabula, ko Koya na Karisito na Turaga”?8
Ni da veisoli ka ni loloma ena Siganisucu, meda sa nanuma, marautaka, ka ciqoma na isolisoli levu duadua oya ni veisolisoli kecega—na isolisoli ni noda iVakabula ka Dauveivueti, me rawa ni noda na bula tawamudu.
“A cava na kena yaga vua na tamata kevaka sa vakarautaki tu na isolisoli me nona, ka qai sega ni taura? Raica, sa sega ni vinakata na isolisoli sa soli vua, io sa sega talega ni vinakati koya sa solia.”9
Meda sa muri Koya, qaravi Koya, dokai Koya, ka ciqoma ena noda bula na Nona isolisoli kivei keda, me rawa ni da, ena vosa nei Tama o Liai, “vakavolivoliti ena nona loloma ka tawamudu.”10
© 2015 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/15. Vakadonui me vakadewa: 6/15. Vakadewa ni First Presidency Message, December 2015. Fijian 12592 858
iVakavuvuli mai na iTukutuku Oqo
Sa kacivi keda o Peresitedi Monson meda “cakava na sasaga veidinadinati matau me kau mai kina o Karisito ki na noda bula kei na noda matavuvale.” Navuca mo veivosakitaka vata kei ira o vakatavulica na iwalewale e rawa ni ra cakava vakayadua ka vakamatavuvale kina na sasaga matau oqo. Navuca mo kerei ira mera vakasamataka vakatabakidua e dua na tamata se matavuvale e rawa ni ra na sikova se qarava ena Siganisucu oqo. “Se vo tiko na gauna ena yabaki oqo me dodo yani kina na liga ni veivuke, na loma dauloloma, kei na yalo talairawarawa.”