Mensahe sa Visiting Teaching, Disyembre 2015
Langitnon nga mga Kinaiya ni Jesucristo: Maluluy-on kag Maayo
Tun-i sing mainampuon ining materyal kag magpangamuyo agud mahibaloan kon ano ang ipaambit. Paano ang paghangop sang langitnon nga mga kinaiya sang Manluluwas makapadugang sang inyo pagtuo sa Iya kag magabugay sa ila nga inyo ginabantayan paagi sa visiting teaching? Para sa dugang nga impormasyon maglog-on sa reliefsociety.lds.org
Pagtuo, Pamilya, Bulig
“Sa balaan nga mga kasulatan, ang pat-od nga kahulugan sang kaluoy amo ang ‘mag-antos upod sa.’ Nagakahulugan man ini sang pagpakita sang kaayo, kaluoy, kag kaawa para sa iban.”1
“Si Jesucristo naghatag sa aton sang madamo nga mga ehemplo sang maluluy-on nga pagkabalaka,” siling ni Pangulong Thomas S. Monson. “Ang piang nga tawo sa punong sang Betesda; ang babayi nga nadakpan sa panglahi; ang babayi sa bobon ni Jacob; ang bata nga babayi ni Jairo; si Lazaro, ang utod nga lalaki ni Maria kag Marta—ang kada isa nagarepresentar sang nalisdan sa dalanon sang Jerico. Ang kada isa nagkinahanglan sang bulig.
“Sa piang sa Betesda, si Jesus nagsiling, ‘Tindug ka, dalha ang imo higdaan, kag maglakat.’ Sa makasasala nga babayi nag-abot ang laygay, ‘Lakat, kag kutub karon dili ka na magpakasala.’ Agud buligan sia nga nagkadto agud magsag-ob sang tubig, Ginhatag Niya ang tuburan sang tubig nga ’naga-ibwal sa kabuhi nga wala’y katapusan.’ Sa napatay nga bata nga babayi ni Jairo nag-abot ang mando, ‘Inday, nagasiling ako sa imo, bangon.’ Sa nalubung na nga si Lazaro, “maggwa ka.’
Ang Manluluwas sa tanan nga tion nagpakita sang wala’y untat nga ikasarang nga mangin maluluy-on. … Buksan naton ang puertahan sang aton mga tagipusuon, agud nga Sia—ang buhi nga ehemplo sang matuod-tuod nga pagkamaluluy-on makasulod.”2
Dugang nga Balaan nga mga Kasulatan
Mga Salmo 145:8; Zacarias 7:9; 1 Pedro 3:8; Mosias 15:1, 9; 3 Nefi 17:5–7
Gikan sa Balaan nga mga Kasulatan
“Ako kag ang akon bana nagluhod sa tupad sang amon 17-anyos nga bata nga babayi kag nag-ayo para sa iya kabuhi, siling ni Linda S. Reeves, ika-duhang manuglaygay sa pangkabilugan nga panguluhan sang Relief Society. “Ang sabat indi, pero . … nahibal-an namon … nga … [ang Manluluwas] nagabatyag sang kaluoy para sa amon sa amon mga kalisdanan.”3
“Isa sang akon paborito nga mga istorya gikan sa kabuhi sang Manluluwas amo ang istorya ni Lazaro. Ang balaan nga mga kasulatan nagasugid sa aton nga ‘ginhigugma ni Jesus si Marta, … ang iya utod nga babayi nga si [Maria], kag ang [ila utod nga lalaki nga] si Lazaro.’”4 Sang nagmasakit si Lazaro, nagpasugo sila kay Jesus, pero pag-abot Niya napatay na si Lazaro. Nagdalagan si Maria kay Jesus, kag nagyaub sa Iya tiilan, kag naghibi. Sang nakita ni Jesus nga si Maria nagahaya, “natandug sia sing tuduk sa espiritu, kag … naghibi” (Juan 11:33, 35).
“Amo ina ang aton buluhaton. Dapat naton mabatyagan kag makita para sa aton kaugalingon kag dayon buligan ang tanan nga mga anak sang Amay nga Langitnon nga mabatyagan kag makita kag mahibaloan nga ang aton Manluluwas nagpas-an sa Iya kaugalingon indi lang sang tanan naton nga mga sala kundi man sang aton mga kasakit kag aton mga pag-antos kag mga kalisud agud nga mahibaloan Niya kon ano ang aton ginabatyag kag kon paano kita paumpawan.”5
© 2015 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/15. Petsa sang pagtugot sa paglubad: 6/15. Paglubad sang Visiting Teaching Message, December 2015 Hiligaynon 12592 861
Binagbinaga Ini
Sin-o bala ang mabugayan sang imo pagkamaluluy-on?