Mensahe sang Unang Panguluhan Disyembre 2015
Maghatag sang Panahon para sa Manluluwas
Isa naman ka panahon sang Paskwa ang nagaabot sa aton kag upod sini ang panugod sang isa ka bag-ong tuig. Daw kahapon lang nga nagaselebrar kita sang kaadlawan sang Manluluwas kag nagahimo sang mga panaad.
Upod sang aton mga panaad para sini nga tuig, nagpromisa bala kita nga maghatag sang panahon sa aton mga kabuhi kag sang hulot sa aton mga tagipusuon para sa Manluluwas? Bisan daw ano man kita kamadinalag-on sa karon sa sinang panaad, sigurado ako nga tanan kita nagahandum nga kuntani makahimo sing mas maayo pa gid. Ining panahon sang Paskwa amo ang pinakamaayo nga tion sa pag-usisa kag pagbag-o sang aton mga pagpaninguha.
Sa aton masako nga mga kabuhi, nga may tuman kadamo nga mga butang nga nagaagaw sang aton atensyon, importante kaayo nga maghimo kita sang makahulugan kag dedikado nga pagpanikasog nga dalhon si Cristo sa aton mga kabuhi kag sa aton mga puluy-an. Kag importante man kaayo nga kita, pareho sang mga Mago gikan sa Sidlangan, magpabilin nga nakatutok sa Iya bituon kag “magkari sa pagsimba sa iya.”1
Sa kalawigon sang mga henerasyon sang panahon, ang mensahe gikan kay Jesus pareho lang sa gihapon. Kay Pedro kag Andres sa baybayon sang Galilea, Sia nagsiling, “Sunod kamo sa akon.”2 Kay Felipe nag-abot ang tawag, “Sunod sa akon.”3 Sa tawo nga nagalingkod sa buluhisan nag-abot ang panugyan, “Sunod ka sa akon.”4 Kag sa imo kag sa akon, kon mamati lang kita, magaabot ang amo man nga pangagda:“Sunod kamo sa akon.”5
Sa aton pagsunod sa Iya mga tikang sa karon kag sa aton pagsunod sang Iya ehemplo, makaangkon kita sang mga oportunidad nga mabugayan ang mga kabuhi sang iban. Si Jesus nagaagda sa aton nga maghatag sang aton mga kaugalingon: “Yari karon, ang Ginuo nagapangayo sang bug-os nga tagipusuon kag handa nga panghunahuna.”6
May isa bala nga dapat ninyo alagaran sini nga Paskwa? May isa bala nga nagahulat sang inyo pagbisita?
Mga pila ka tuig ang nagligad nagbisita ako isa ka Paskwa sa puluy-an sang isa ka tigulang nga balo. Sang ato ako didto, naghuni ang doorbell. Didto sa puertahan nagatindog ang isa ka masyado kasako kag bantog nga doktor. Wala sia ginpatawag; kundi, nakabatyag lang sia sang pagtulod nga magbisita sa isa ka pasyente nga masinulub-on.
Sa sini nga panahon, ang mga tagipusuon sadtong mga may kasablagan nagadab-ot kag nagahandum sang isa ka pagbisita sa Paskwa. Sang isa ka Paskwa samtang nagabisita sa isa ka balay alatipanan, nagpungko ako kag nagsugilanon sa lima ka may-edad nga mga babayi, ang pinakatigulang sa ila nagaedad 101. Bulag sia, pero kilala niya ang akon tingog.
“Bishop, medyo atrasado ang imo pagkadto sini nga tuig!” siling niya. “Abi ko indi ka na mag-abot.”
Nangin manami ang amon pagsugilanon. Isa ka pasyente, ugaling, ang nagatulok sing masinulub-on sa gwa sang bintana kag nagaliwat-liwat hambal, “Nakahibalo ako nga ang akon bata makadto agud magbisita sa akon sini nga adlaw.” Indi ako sigurado kon himuon niya, kay may ara nagligad nga mga Paskwa nga wala gid sia nakatawag.
Pero may tiempo pa sini nga tuig agud magtanyag sang mabinuligon nga kamot, mapinalanggaon nga tagipusuon kag sang handa nga espiritu—buot silingon, sa pagsunod sa ehemplo nga ginpahamtang sang aton Manluluwas kag mag-alagad sa Iya subong nga luyag Niya nga mag-alagad kita. Kon mag-alagad kita sa Iya, indi naton madula ang aton oportunidad, subong sang manugbantay sa balay nga dalayonan,7 nga maghatag sing tion para sa Iya sa aton mga kabuhi kag hulot para sa Iya sa aton mga tagipusuon.
Mahangpan bala naton ang matahum nga promisa nga kaundan sang mensahe sang anghel nga ginhatag sa mga manugpahalab sa latagon: “Ginatunda ko sa inyo ang maayong balita sang dakung kalipay. … Kay natawo sa inyo karon nga adlaw … ang Manluluwas, nga si Cristo nga Ginuo”?8
Sa aton pagbinaylohanay sang mga regalo sa Paskwa, kabay nga madumduman, maapresyar, kag mabaton naton ang pinakadakung regalo sa tanan nga mga regalo—ang regalo sang aton Manluluwas kag Manunubos, agud nga maangkon naton ang kabuhi nga wala’y katapusan.
“Kay ano bala ang kaayuhan sa isa ka tawo kon hatagan sia sang regalo, kag indi niya pagbatunon ang regalo? Yari karon, wala sia nagakalipay sa sinang ginhatag sa iya, kag wala man sia nagakalipay sa iya nga amo ang taghatag sang regalo.”9
Kabay nga sundon naton Sia, alagaran Sia, tahuron Sia, kag batunon sa aton mga kabuhi ang Iya mga regalo sa aton, agud nga kita mangin, sa mga pulong ni Tatay Lehi, “wala’y katapusan nga nalikupan sa mga butkon sang iya gugma.”10
© 2015 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/15. Petsa sang pagtugot sa paglubad: 6/15. Paglubad sang First Presidency Message, December 2015 Hiligaynon 12592 861
Pagtudlo gikan sa Sining Mensahe
Si Pangulong Monson nagapanawagan sa aton sa “paghimo sang gintuyo, dedikado nga pagpaninguha nga dalhon si Cristo sa aton mga kabuhi kag sa aton mga puluy-an.” Huna-hunaa nga hambalan upod sa inyo ginatudloan kon paano nila mahimo ining determinado nga pagpaninguha bilang indibidwal kag bilang isa ka pamilya. Mahimo man ninyo huna-hunaon ang pagpangabay sa ila sa pagpanumdum sang isa ka pat-od nga tawo ukon pamilya nga pwede nila bisitahan ukon alagaran sini nga Paskwa. “May tiempo pa sini nga tuig agud magtanyag sang mabinuligon nga kamot, mapinalanggaon nga tagipusuon, kag sang handa nga espiritu.”