Mensahe iti Visiting Teaching, Disiembre 2015
Dagiti Kababalin ni Jesucristo: Manangngaasi ken Naimbag
Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawatyo kadagiti nadiosan a kababalin ti Mangisalakan ket mangpapigsa iti pammatiyo Kenkuana ken mangparabur kadagiti ay-aywananyo babaen ti visiting teaching? Para iti ad-adu pay nga impormasion mapan iti reliefsociety.lds.org.
Pammati, Pamilia, Tulong
“Kadagiti nasantuan a kasuratan, ti panangngaasi ket kayatna a sawen ti ‘makipagsagaba.’ Kayatna pay a sawen ti panangipakita iti pannakipagrikna ken asi iti tunggal maysa.”1
“Impaayannatayo ni Jesus iti adu a pagwadan ti manangngaasi a pannakaseknan,” kinuna ni Presidente Thomas S. Monson. “Ti lugpi a lalaki iti pagdigusan ti Betesda; ti babai a nagbasol iti pannakikamalala; ti babai iti abay ti bubon ni Jacob; ti babai nga anak ni Jairo; Lazaro, lalaki a kabsat da Maria ken Marta—mangibagi ti tunggal maysa a kas iti maysa a nadangran iti kalsada ti Jerico. Agkasapulan iti tulong ti tunggal maysa.
“Iti lugpi iti Betesda, kinuna ni Jesus, ‘Bumangonka, bagkatem ti pagiddaam, ket magnaka.’ Iti managbasol a babai naited ti balakad, ‘Inkan, ket saankan nga agbasolen.’ Tapno matulonganna ti babai a makaala iti danum, Isu ket nangted kenkuana iti ubbog ti danum nga ‘agburayok a maipaay iti biag nga agnanayon.’ Iti natay a babai nga anak ni Jairo immay ti bilin, ‘Balasang, kunak kenka, tumakderka.’ Iti naitanem a Lazaro, ‘Rummuarka.’
“Kanayon a nangipakita ti Mangisalakan iti saan a limitado a kapasidad para iti panangngaasi. … Luktantayo koma ti ruangan dagiti puspusotayo, tapno Isu—ti sibibiag a pagwadan ti pudno a panangngaasi—ket makastrek.”2
Dagiti Mainayon a Nasantuan a Kasuratan
Salmo 145:8; Zacarias 7:9; 1 Pedro 3:8; Mosiah 15:1, 9; 3 Nephi 17:5–7
Manipud kadagiti Nasantuan a Kasuratan
“Nagparintumengkami nga agassawa iti abay ti anakmi a babai nga agtawen iti sangapulo-ket-pito ket nagpakaasi nga ispalenna koma ti biagna,” kinuna ni Linda S. Reeves, maikadua a mammagbaga iti sapasap a panguluen ti Relief Society. “Ti sungbat ket saan, ngem . … naammuanmi … a … [ti Mangisalakan] mariknana ti panangngaasi para kadatayo iti panagladingittayo.”3
“Maysa kadagiti paggugustok nga estoria manipud iti biag ti Mangisalakan ket ti estoria maipapan ken ni Lazaro. Ibaga dagiti nasantuan a kasuratan kadatayo nga ‘inayat ni Jesus ni Marta, … ti kabsatna a ni [Maria], ken ti [kabsatda] a ni Lazaro.’”4 Idi nagsakit ni Lazaro, naipadamag ken ni Jesus, ngem idi dumteng ni Jesus natayen ni Lazaro. Timmaray ni Maria a napan ken ni Jesus, nagruknoy kadagiti saksakana, ket nagsangit. Idi makita ni Jesus nga agsangsangit ni Maria, “nagladingit ti nakemna, ket … nagsangit” (Juan 11:33, 35).
“Dayta ti pagrebbengantayo. Nasken a marikna ken makitatayo para iti bagbagitayo ket kalpasanna tulongantayo ti amin nga annak ti Nailangitan nga Ama a makarikna ken makakita ken makaammo a ti Mangisalakan ket inawatnan iti Bagina saan laeng ti amin a basbasoltayo no di ketdi pay ti amin a saem ken panagsagaba ken panagtutuoktayo tapno iti kasta maammuanna no ania ti marikriknatayo ken no kasano a maliwliwanatayo.” 5
© 2015 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/15. Pannakaanamongna a maipatarus: 6/15. Pannakaipatarus ti Visiting Teaching Message December 2015. Ilokano 12592 864
Ibilang Daytoy
Asino ti maparaburan babaen ti panangngaasiyo?