Mensahe ti Umuna a Panguluen, Disiembre 2015
Maaddaan iti Panawen para iti Mangisalakan
Paskua manen ken asidegen ti rugi ti baro a tawen. Kasla idi kalman laeng a rinambakantayo ti pannakayanak ti Mangisalakan ken nagituding kadagiti panggep a tun-oyen iti baro a tawen.
Maibilang kadagiti panggeptayo a tun-oyen iti baro a tawen, inkeddengtayo kadi iti biagtayo a maaddaan iti umdas a panawen para iti Mangisalakan ken maaddaantayo iti lugar kadagiti pusotayo para Kenkuana? Kasano man ti kinaballigitayo iti kasta a panggep a tun-oyen, mamatiak a tartarigagayantayo amin nga ipatungpal daytoy a nasaysayaat. Daytoy a panawen ti Paskua ti kapintasan a panawen tapno amirisen ken mangpabaro kadagiti panagkagumaantayo.
Iti makumikom a biagtayo, addaantay kadagiti nakaad-adu a dadduma pay a banag a nasken pay nga asikasuentayo, kasapulan nga agaramidtayo iti nairanta, naikumit a panagkagumaan a mangyeg ken ni Cristo iti biagtayo ken iti pagtaengantayo. Ken napateg unay a datayo, kas kadagiti Masirib a Lallaki manipud iti Daya, ket agtalinaed koma a nakapokus iti bituenna ken “umay tapno agdaydayaw Kenkuana.”1
Agingga kadagiti kaputotan ti panawen, isu latta ti mensahe manipud ken Jesus. Kada Pedro ken Andres iti igid ti Galilea, Kinunana “Surotendak.”2 Ken ni Felipe dimteng ti awag, “Surotennak.”3 Iti Levita a nabilin, “Surotennak.”4 Ken kadakayo ken siak, no laeng dumngegtayo, umay met ti isu met la a pumaypayapay nga awis: “Surotendak.”5
Iti panangsurottayo kadagiti tugotna ita ken tuladentayo ti pagwadanna, maaddaantayto kadagiti gundaway a mangparabur iti biag dagiti dadduma. Aw-awisennatayo ni Jesus a mangted iti bagitayo: “Adtoy, kasapulan ti Apo ti puso ken natallugod a panunot.”6
Adda kadi maysa a tao a nasken a pagserbianyo itoy a Paskua? Adda kadi maysa nga agur-uray iti isasarungkaryo?
Adun a tawen ti naglabas sinarungkarak ti pagtaengan ti maysa a baket a balo iti panawen ti Paskua. Bayat ti kaaddak sadiay, nagkiriring ti doorbell. Iti sango ti ridaw nakatakder ti maysa a makumikom ken nalatak a mangngagas. Saan a naawagan; ngem ketdi, narknana laeng ti sumarungkar iti maysa a pasiente a malmalday.
Kadagitoy a panawen, dagiti puso dagiti saan a makaruar iti pagtaenganda ket umasidegda ken umararawda iti pannakabisita ita a panawen ti Paskua, Maysa a Paskua bayat ti ibibisitak iti maysa a sentro ti pagaywanan, nakasaritak ti lima a babbaket, 101 ti tawen ti kabaketan. Bulsek isuna, ngem mailasinna ti timekko.
“Bishop, nagabayka bassit nga immay itoy a tawen!” kinunana. “Impagarupko a saanka nga umayen.”
Naragsak ti saritaanmi a dua. Nupay kasta, maysa a magagaran unay a pasiente ti timmamdag iti tawa ket madagdagullit nga insaona, ”Ammok umaynakto bisitaen ti anakko a lalaki ita nga aldaw.” Diak la ammo no umay isuna, gapu ta adda dagiti panawen ti Paskua a saan a pulos bimmisita.
Adda pay la panawen itoy a tawen tapno mangipaay iti tulong, pammateg, ken pagimbagan—iti sabali a pannao, surotentayo ti pagwadan nga impakita ti Mangisalakantayo ken agserbitayo kas iti kayatna a panagserbitayo. No agserbitayo Kenkuana, ditayo maisuko ti gundawaytayo, kas iti inaramid ti agay-aywan iti pagdagusan,7 tapno maaddaan iti panawen para Kenkuana iti biagtayo ken adda lugar para Kenkuana iti puspusotayo.
Maawatantayo kadi ti naindaklan a kari a linaon ti mensahe ti anghel a naited kadagiti pastor nga adda iti talon: “Yegko kadakayo dagiti naimbag a damag ti naindaklan a rag-o. … Kadakayo maipasngay itoy nga aldaw … ti maysa a Mangisalakan, nga isu ni Cristo nga Apo”?8
Iti panagsisinnukattayo iti regalo iti Paskua, malagiptayo koma, makapagyaman,ken maawattatayo dayta kaindaklanan ti amin a sagut—ti sagut ti Mangisalakan ken Mannubbottayo, tapno maaddaantayo iti agnanayon a biag.
”Ta ania koma ti magunggona ti tao no maikkan ti sagut ngem saanna nga awaten ti sagut? Adtoy, saan nga agrag-o iti dayta naited kenkuana wenno agrag-o iti nangted kenkuana iti sagut.” 9
Makasurottayo koma Kenkuana, makapagdayaw Kenkuana, ken makaawattayo kadagiti sagutna kadatayo iti biagtayo, tapno mabalintayo, kadagiti balikas ni Ama Lehi, ”a malikmutan iti agnanayon kadagiti takiag ti ayatna.”10
© 2015 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/15. Pannakaanamongna a maipatarus: 6/15. Pannakaipatarus tiFirst Presidency Message, December 2015. Ilokano 12592 864
Panangisuro manipud iti Daytoy a Mensahe
Aw-awagannatayo ni Presidente Monson nga “agaramid iti naigagara, naikumit a panagkagumaan a mangyeg ken ni Cristo iti biagtayo ken iti pagtaengantayo.” Paglilinnawaganyo kadagiti sursuruanyo no kasano a maaramidda daytoy naigagara a panagkagumaan kas maysa a tao ken kas maysa a pamilia. Mabalinyo nga idawat kadakuada a mangpanunot iti maysa a tao wenno pamilia a bisitaenda wenno pagserbianda itoy a Paskua. “Adda pay la panawen itoy a tawen a mangipaay iti tulong, pammateg, ken pagimbagan.”