Poraus seni ewe Aewin Presetensi, December 2015
Awora Fansoun ren ewe Chon Amanau
Pwan ew fansoun Kirisimas a fis ngenikich me mwirin ei ewe ier mi fo. Ussun nge nanew chok ewe sia fen fori apwapwan uputiwen ewe Samon me fori kokotun met sipwe fori.
Me nein ach kewe kokkot ren ei ier, kich mei fori pochokunen ekiek ren met sipwe fori ne awora fansoun non manauach me neni non netipach faniten ewe Samon? Inamwo ika sia fokkun fetanoch ika nunnuno won ew kokkot, Ngang mei fokkun nuku pwe kich meinisin sia mochen pwe sipwe murinno seni ena. Ei fansoun Kirisimas ina ewe murinon fansoun ne nennengeni me eminefosefani ach tufich
Non osukosuken non manauach, ren chommongun ekkoch mettoch ra okkuf ngeni ach tumunoch, mi namot pwe sipwe awora non ekiekich, ach sipwe achocho ne wato Kraist non manauach me non imwach. Iwe mi fokkun murinno pwe kich, sipwe ussun ekkewe Mwan Tipachem seni Meseran, ra chok atappwa noun ewe Fu me “feito pin ngeni I.”1
Feitiw tori ekkewe tettenin aramasen ei fansoun, ewe porous seni Jises mi chok nonno. Ngeni Peter me Andrew me ren arossetin ewe Noom Galilee, I a apasa, “Oupwe feito fitiei.”2 Ngeni Philip a feito ewe kokko, “Feito fitiei.”3 Ngeni ekkewe pwipwi mwirimwirin Levi, John me James ekkewe ra mommot won war ewe ren semer ewe a feitto ewe kokko, “Oupwe feito fitiei.4 Iwe ngeni en me ngang, ika si ausening, epwe feito ena pwan chok esinesinen kokko: “Oupwe feito fitiei.”5
Nupwen sia tapweno non rasin ipwan ikenai me nupwen sia appiru chok ussun I, epwe wor ach tufich ach sipwe efeiochu manauen ekkoch. Jises a korikich ach sipwe fangeno inisich: “Nengeni, ewe Samon a mochen netip me tipemecheresin ekiek.”6
Mei wor emon kopwe tongeni awora angangen aninis ngeni non ei Kisisimas? Mei wor emon a witiwit ngeni om kopwe churi?
Chommong ier a no non ew Kirisimas uwa churi imwen emon chinnap ese wor punuwan. Nupwen ai uwa nom ikana, ewe penin ewe asam a kurur. Ren ewe asam, a uta emon tokter mi itefouno me osukosuken angang. Ese wor e kori an epwe etto; nge, a chok mefi an epwe feito churi ewe mei samwaw mi chok akanamon.
Non ei kinikinin fansoun, netipen ekkewe ekkoch ra chok nonnom neim rese tongeni feinno ekis ra aneanei me mochen epwe wor epwe churir non ei Kirisimas. Non ew Kirisimas nupwen uwa awora ew fansoun ne churi ew nenien tumun ekkewe mi chinnap, uwa momot me porous ngeni nimmon fefin mi chinnap, ewe a chinap senir a 101 ierin. A chun, nge mi esinna neuwei.
“Pisop, ka ekis mang non ei ier!” neminewe a apasa. “Tipei pwe kosap chiwen feito.”
A fokkun murinno am fansoun fengen. Emon mi samwaw, akan, nennenu non ewe asamwacho nge eniwini me eniwini, “Ngang mi sinei pwe nei ewe at epwe feitto churiei ikenai.” Amo uwa sinei ika epwe, pun mei wor ekkoch fansoun Kirisimas ese tongeni kokko.
Mi wor fansoun non ei ier ne anapano aninis, ewe umoumochun netip, me ewe monetan ngun—non ekkoch kapas, sipwe apirru ewe minen apirrun ewe Samon a pwarno me angang ussun I a mochen sipwe angang. Nupwen sia angang ngeni I, sisap fangeta ach na tufich, ussun met ewe chon tumunu ewe nenien mour me nom,7 ne awora fansoun fan iten I non manauach me nenian non netipach.
Kich mi tongeni weweiti ewe amwararen pwon a masoweni non ewe porous an ewe chon nang a ngeni ekkewe chon masa siip ra nikitu non ewe neni: “Ua wato kapas allim ngeni kemi.” … Pun on ei ran ikenai a uputiw … ami ewe Chon Amanau Kraist ewe Samon”?8
Nupwen sia niffang fengen atun Kirisimas, amo sipwe chemeni, etiwa, me angei ena wachimuken niffang seni meinisin niffang—ewe niffangen ach Chon Amanau me Chon Angaseno, pwe sipwe tufichin ani ewe manau ese much.
“Epwe meta namotan ngeni emon aramas ika ew niffang a kawor ngeni, nge ese angei ewe niffang? Nengeni, ese pwapwaiti metena a kawor ngeni, ese pwan pwapwaiti I ewe chon awora ewe niffang”9
Amo sipwe tapweno mwirin, angang ngeni I, asamonu I, me wanong non manauach an niffang ngenikich, pwe sipwe, nom non ekkewe kapas an Samach Liai “rokopwanino me non an kewe poun tong feinfeino chok.”10
© 2015 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/15. Kapungunon chiakun: 6/15. Chiakun First Presidency Message, December 2015. Chuukese (Trukese). 12592 901
Afanafan seni Ei Poraus
Preseten Monson a korikich ach sipwe “fori ew ekiek, fori ne apochokuna ne wanong Kraist non manauach me non imwach.” Awora porous ngeni ekkewe ka osukuna ifa ussun ar repwe tongeni fori ei pochokunen ekiek won pusin ir me pusin ew famini. Ka pwan tongeni ekiekin eisinir ar repwe ekiek ussun emon aramas ika ew famini ewe ra tongeni churir ika angang ngeni non ei Kirismas. “Mi wor fansoun non ei ier ne anapano aninis, ewe umoumochun netip, me ewe monetan ngun.”