Parau Poro’i a te Peresideniraa Matamua, Titema 2015
Faataa i te taime no te Faaora
Tei roto faahou â tatou i te tahi tau Noela e te hope ra te matahiti. E au râ ho’i e, no inanahi ra to tatou faahanahanaraa i te fanauraa o te Faaora e to tatou raveraa i te tahi faaotiraa apî.
I roto i ta tatou mau faaotiraa o teie matahiti, ua faaoti anei tatou ia faataa i te tahi taime i roto i to tatou oraraa e te tahi vahi i roto i to tatou aau no te Faaora ? Noa’tu â to tatou manuiaraa i roto i teie faaotiraa tae roa mai i teie mahana, te ti’aturi nei au e, ua hinaaro tatou ia rave maitai atu â. Ua riro teie tau Noela ei taime tano roa no te hi’opo’a e no te faaapî i ta tatou mau tautooraa.
I roto i to tatou oraraa taime ore, no tera mau mea e rave rahi e umeume ra ia tau’a atu tatou, e mea faufaa roa ia tautoo papû tatou, ma te mana’o papû, no te faatae mai i te Mesia i roto i to tatou oraraa e i to tatou mau fare. E e mea faufaa roa ino ia mau noa tatou, mai na Taata paari na te Hitiʻa o te râ mai, i ni’a i To’na feti’a no te « haere mai ho’i… e tahopu ia’na ».1
Mai tera u’i e tae roa mai i teie tau, ua vai taui ore noa te poro’i a Iesu. Ia Petero e ia Anederea i te tahatai no Galilea, ua parau Oia, « A pee mai ia’u ».2 Teie te piiraa tei tae ia Philipa ra, « A pee mai ia’u ».3 I taua ati Levi ra tei parahi i te fare telona, teie te parau i tuuhia, « A pee mai ia’u ».4 E ia outou e ia’u nei, ia faaroo noa’tu to tatou tari’a, e tae atoa mai ïa taua ti’aoro atoa ra : « A pee mai ia’u nei ».5
A haere ai tatou na To’na mau taahiraa avae i teie mahana e a pee ai tatou i To’na hi’oraa, e riro tatou i te fana’o i te rave’a no te haamaitai i te oraraa o te mau taata. Te ani nei Iesu ia tatou ia horo’a ia tatou iho : « Inaha te titau nei te Fatu i te aau e te mana’o anaanatae ».6
Te vai ra anei te tahi taata e ti’a ia outou ia tauturu atu i teie Noela ? Te vai ra anei te taata e tia’i ra i to outou tere ?
A rave rahi matahiti i teie nei ua tere atu vau i te hoê Noela i te fare o te hoê vahine ivi paari. I te taeraa’tu vau, ua pate au i te oê. Te ti’a mai nei i mua ia’u i te uputa te hoê taote tuiroo tei rahi ho’i i te ohipa. Aita oia i piihia ; aita, e muhumuhu noa tei tae mai ia haere e farerei i teie taata ma’i e vai otahi noa ra.
I roto i teie pu’e tau, e pii noa mai te aau o ratou tei ma’ihia ma te hiaai noa ia hahaerehia mai ratou no te Noela. I te hoê Noela a tere ai au i te hoê pû utuuturaa, ua parahirahi au i piha’i iho e pae vahine paari no te paraparau, e 101 matahiti to te paari a’e. E vahine mata ru’i, ua ite maitai râ oia i to’u reo.
« E Bishop, ua taere rii oe i teie matahiti ! » ta’na i parau mai. « Ua mana’o roa vau e, eita oe e tae mai ».
Ua au maitai ta matou paraparauraa. Ua mau râ te mata o te hoê i ni’a i te haamaramarama e ua parau noa faahou e faahou â, « Ua papû ia’u e haere mai ihoa ta’u tamaiti e hi’o ia’u ». Ua uiui noa vau e tae mai ihoa anei oia, inaha e rave rahi tau Noela na mua’tu aita roa’tu oia i taniuniu mai.
Atira noa’tu, e taime to tatou i teie matahiti no te toro atu i te rima tauturu, te aau here e te mana’o tae—e nehenehe e parau e, no te pee i te hi’oraa tei tuuhia mai e te Faaora e no te tavini mai Ta’na e hinaaro nei ia tavini atu tatou. A tavini ai tatou Ia’na, eita tatou e ere i teie taime taa ê no tatou, mai te taata i tahito ra no’na te fare tipaeraa,7 no te faataa i te taime No’na i roto i to tatou oraraa e te vahi No’na i roto i to tatou aau.
E nehenehe anei ta tatou e haro’aro’a i te mau parau fafau rahi e vai ra i roto i te poro’i a te melahi i te mau tia’i mamoe e vai ra i roto i te aua : « E parau maitai ta’u e hopoi mai ia outou nei… I na’u nei ho’i i fanau ai te Ora… oia ho’i te Mesia ra o te Fatu » ?8
A horo’a haere ai tatou i te tao’a horo’a i te tahi e te tahi i te Noela, ia haamana’o tatou e, ia mauruuru tatou e ia farii ho’i i te tao’a rahi roa a’e o te mau tao’a atoa—te horo’a o to tatou Faaora e Taraehara, ia roaa ia tatou te ora mure ore.
« No te mea e aha ihora ïa te taata e faufaahia’i ia tuuhia’tu te hoê horo’a ia’na ra, e ia ore ho’i oia ia farii mai i taua horo’a ra ? Inaha, e ore roa oia e oaoa i te reira mea o tei horo’ahia mai ia’na ra, e ore atoa ho’i e oaoa ia’na ra o tei tuu mai i te horo’a ».9
E ti’a anei ia tatou ia pee Ia’na, ia tavini Ia’na, ia faahanahana tatou Ia’na e ia farii ho’i i Ta’na mau tao’a horo’a no tatou i roto i to tatou oraraa, ia riro ho’i tatou mai ta te metua Lehi ra i parau, ia « ati-noa-hia… e te rima o to’na ra aroha ».10
© 2015 na Intellectual Reserve, Inc. Faturaa paruruhia. Nene’ihia i te Mau Hau Amui no Marite. Parau faati’a no te reo peretane : 6/15. Parau faati’a no te iritiraa : 6/15. Iritiraa no First Presidency Message, December 2015. Tahitian. 12592 895
Haapiiraa no roto mai i teie parau poro’i
Te pii nei te peresideni Monson ia tatou « ia tautoo papû… ma te mana’o papû, no te faatae mai i te Mesia i roto i to tatou oraraa e i to tatou mau fare ». A opua ia paraparau e te feia ta outou e haapii ra, e nahea ratou i te tautoo papû ma te mana’o papû o ratou iho e o ratou e te utuafare. E nehenehe atoa ta outou e opua ia ani ia ratou ia feruri i te hoê taata e aore râ te tahi fetii o ta ratou e nehenehe e hahaere atu e aore râ e tavini atu i teie Noela. « Atira noa’tu, e taime to tatou i teie matahiti no te toro atu i te rima tauturu, te aau here e te mana’o tae ».