Bin Somm’on e Mulwol ko Presidency, December 2015
Fal’eg E Ngiyal’ Rom ni fan ngak fare Tathapeg
Kureb e Krismas ni ke taw ngodaed ma ra ma’ ma ke taw reb e duw nib bi’ech. Boed ni fowap e kudi falfalen’ gaed ko ngiyal’ nni gargeleg fare Tathepg ma yibe dugliy e pin’en ni ngan rrin’.
Ko pin’en ni kad dugliyed ni ngad rrin’ed ko biney e duw, kadi ngongliyed e ngiyal’ ulane yafas rodaed nge tegil fare Tathapeg ulan gumircha’en daed? Demtrug rogon ni gadaed be cheg nag ko n’en ni kad dugliyed, ma pagan’ug ni gadaed gubin ma gadaed ba adag ni ngad rrin’ed ban’en nib mangil boech. Biney e Krismas e ngiyal’ ni tha’abi mangil ni ngad sap gaed ko murwel rodaed ma gadaed ngongliy biyay.
U lane yafas rodaed nib magawon, nib mu’un ban’en ngay nibe feek e sap rodaed, ma baga’ fan ni ngad guyed rogon, ngad dugliyed ni ngan feked Kristus nga lane yafas rodaed nge tabinaew rodaed. Ma baga’ fan ni gadaed, ni boed Fapi Girdi’ Nrabad ko Ngek ni ngar guyed Yesus ngar Mu’ulunggad Ngak nde Nang be’, ni gadaed be tiyan’ daed ko fare tu’uf Rok man “nib ni ngan liyoer ngak.”1
Nap’an e kakrom, ma mulwol rok Yesus e ba ta’ab rogon. Ngak Peter nge Andrew u dap’ e l’ay u Galilee, me ga’ar, “Mu un ngog ngdarow.”2 Ngak Filip ma ke pong ni ga’ar, “Mu un ngog ngdarow.”3 Ngak fare Levite ni paer me yib fare thin ngak ni, “Mu un ngog ngdarow.”4 Ma ngak gur nge gaag, fa’anra gadaed ra motoyil, ma ra yib e ra pong nem: “Mu un ngog ngdarow.”5
Nap’an ni gadaed ra leak e rogon Ir ni daba’ nge nap’an ni gadaed ra fol ko wo’ Rok, ma ra yag kanawo’en daed ni ngad fal’eged wa’athan boech e gidii’. Yesus e be pining daed ni ngad athamgil gaed ngad ayuwegned boech e gidii’ ya ba tu’uf Rok gumircha’en daed ni ba sagaran’ daed ngay.6
Ba’ bee’ ni rayog ngam ayuweg ko biney e Krismas? Ba’ bee’ nibe soen nigem ni ngam guy?
Bukun e duw kafram mugu waen nga tabinaew rok bee’ nib labthir nggu nangfan salpen ko Krismas. Nap’an ni guba’ u rom, me yib bee’ ko maab. Ba togta ni manang nib magawon e be sak’iy u langan fare maab. Daworun pining; machane, ke thamiy rok ni nge yibi guy e cha’an nima tafley nag nibe paer rok ni go’ ir.
Nap’an e ngiyal’ ney, ma gumircha’an e picha’an nib m’ar e yaed ba adag ni ngan gu’ raed ko Krismas. Reb e Krismas nap’an ni kug u care center, mug paer nga buut ngug noned laal’ e ppin ni yad ba labthir, cha’an ni tha’abi labthir e riliu’ nge ragag nge ta’areb e duw rok. Ba kireb owchen, machane ke poey lamag.
“Bishop, gab sag’al ko biney e duw!” ke yoeg. “Ku leam nag ni ri dabkum mub.”
Kug falfalen’ ni gadow bay u ta’abang. Machane, bagyaed, e be sap nga waen nib kirbaen’ ya’an nibe sulsul u dakean e thin ni, “Gu manang ni ra yib fakag nib pagal nge guyeg e daba’.” Ku leam nag fa’anra ra yib, ya ba’ boech e Krismas ni darma kol.
Kuba’ e ngiyal’ ko biney e duw ni ngan pi’ e ayuw, gumircha’ey nib sug ko t’ufeg, nge ya’el niba adag—reb e thin riy, e ngan fol ko fare wo’ nike rrin’ e Tathapeg rodaed man pigpig ni boed ni ba adag ni ngad rrin’ed. Nap’an ni gadaed ra pigpig Ngak, ma dabin siyegned kanawo’en daed, ni boed facha’ ni kakrom,7 ni ngan ta’ e ngiyal’ ni fan Ngak u lane yafas rodaed nge tagil u lan gumircha’en daed.
Rayog ni ngad nanged fan fare m’ag u lan fare mulwol ko fare angel nike pi’ nagk fapi cha’ nima gafaliy e gamanman ni ga’ar: “Ku gub ni nggog e thin ni bfel’ ngomed. … Re rran ney e kan gargeleg … e Tabiyul, ni Kristus ni ir e Somol”?8
Nap’an ni gadaed be thilthilyeg e ta’awath ko Krismas, ma aygun tafneyed, ma gadaed falfalen’, man thapeg e binem e tawa’ath ni tha’abi ma’ang’ang u fithik gubin e tawa’ath—ni fare tawa’ath rok e Tathapeg nge Tabiyul rodaed, ni ngeyag ngad thapeged e yafas nib manemus.
“Dani mangil ni kan pi’ e tawa’ath ngak bee’, ma dabi feek fare tawa’ath? Facha’ e dabun fare tawa’ath nikan pi’ ngak, ma ku dani falfalen’ ngak e cha’an nike pi’ fare tawa’ath.”9
Aygud uned Ngak, magdad pigpig Ngak, man tayfaned, ma gadaed thapeg e pi tawa’ath Rok nga lane yafas rodaed, ngeyog ni ngodaed, ko rogon nike yoeg Papa’ i Lehi, “ke longbiyeg nga lan ngorngoren ko t’ufeg rok’ ni manechubog.”10
© 2015 by Intellectual Reserve, Inc. Gubin mabay matwon. Kan yoloey u Mariken. Kan micheg nag ko thin nu Ngalis: 6/15. Micheg nag i pilyeg: 6/15. Pilyeg thin ko First Presidency Message, December 2015. Yapese. 12592 905
Rogon ni ngan Fil ko Biney e Mulwol
Ke yoeg President Monson ngodaed ni “ngad guyed rogon, ngad dugliyed ni ngan feked Kristus nga lane yafas rodaed nge tabinaew rodaed.” Leam nag ni ngam weliy ko picha’an ni gabe sensey nag rogon ni rayog ni ngar rrin’ed e biney ni go’ giyaed rodaed nge lane tabinaew. Rayog ngam moeg ngoraed ni ngar fithed ngak bee’ fa tabinaew ni rayog ni ngar guyed fa ri pigpig gaed ngoraed ko biney e Krismas. “Kuba’ e ngiyal’ ko biney e duw ni ngan pi’ e ayuw, gumircha’ey nib sug ko t’ufeg, nge ya’el niba adag.”