Poraus seni ewe Aewin Presetensi, January 2016
Pwapwa ren Ekkewe Sia Tonger
Seni Preseten Henry B. Eyring
Aewin Chon Aninis non ewe Aewin Presetensi
Kich meinisin sia mochen pwapwa ren ekkewe sia tonger, me sia pwan mochen epwe chok kisikis ar metek. Ach sia anneani ifa ussun pwapwa—me metek—non ewe Puken Mormon, netipach ra fokkun mokut nupwen sia ekieki atongeach kewe. Iei ew ennetin porausen fansoun pwapwa:
“Iwe non ewe fansoun pwe ese wor anini fengen me non ewe fonu, pokiten ewe tongen Kot minne a nonnom non netipen ekkewe aramas.
“Iwe ese wor nonowo, are anini, are fitikoko, are nisou, are chofona, are nii manau, are och sokkun mocheisou; iwe ennetin ese tongeni wor ew aramas mi kon pwapwa seni ir me nein ekkewe aramas meinisin ekkewe ra fen for me ren poun Kot.”
Mwirin sia anneani:
“Iwe ifa watten feiochur! Pun ewe Samon a efeiochur non ar foffor meinisin; ewer, ra pwan mwo feioch me pisekisekino tori ipuku engon ier a wesino; iwe ewe aewin tappin aramas seni Kraist ra mano, iwe ese wor anini fengen non unusen ewe fonu” (4 Nifai 1:15–16, 18).
Noun Kraist kewe chon kaeo ra iotek me angang fan iten feiochun ekkoch me pwan fan iter. Seni ekkewe porous non ewe Puken Mormon me, ren chommong kich, seni met sia fen pin sisinei, sia sinei pwe ewe niffangen pwapwa mei tongeni fis. Sia sinei pwe ewe an ngeni pwapwa mi fen affat. Sia pwan sinei pwe ese mecheres an epwe chok nonnom pwapwa me nukun chok ika, ussun ren ekkewe chon Nifai, mwirin an ewe Chon Amanau ewe churir, “ewe tongen Kot” a nom non netipach.
Ena tong a nonnom non netipen ekkewe chon Nifai pokiten ra amochu ewe annuk a mecheres ar repwe fori. Ew kapas auchean ewe annuk a pwa me non ewe iotekin sakrament, ewe a poputa ren tungor fiti memefin netip ngeni Samach won Nang mi tong. Sia iotek fiti memefin netipach ren nuku non, me fiti ew anonnonun tong fan iten ach we Chon Amanau. Sia fori fiti ennetin ach mochen mwarei Itan, ach sipwe chechemeni I, me apwonueta meinisin An kewe annuk. Iwe iei, sia anganga ach nuku pwe ewe Ngun mi Fel, ewe aunumonun Kot, epwe pwan nom rech, epwe pwarata ngeni non netipach ussun ewe Sam me Noun we Anaemon. (Nengini D&C 20:77, 79.)
Fiti ach chiechi ngeni ewe Ngun mi Fel, netipach ra tongeni siwin pwe sipwe mochen me etiwa ewe tong an Samach won Nang me ewe Samon Jises Kraist. Ewe anen ach sipwe wanong ewe tong an Kot non netipach mi mecheres, ussun ewe anen ach sipwe poutano ewe memmef ren ena tong non netipach. Awewe ren, ekkoch repwe finata ar repwe iotek ngeni Samach Kot won Nang fan ekkoch ika resap monatiw unusen ar ew ne engon ika kouno ne kametip won ewe kapasen Kot ika amonungaw seni ekkewe mei osupwang me woungaw.
Om finata pwe kosap apwonueta an ewe Samon kewe annuk a tongeni forata an ewe Ngun mi Fel epwene suseni non netipom. Ren metena a susonuk, pwapwa epwene kisikisino.
Ewe pwapwa sia mochen ren atongeach kewe a anongonong won ar finata. Ren wachimuken ach tongei emon semirit, emon chon mochen rong ngeni ewe kapas allim, ika chiechiach, sise tongeni oumwesir ar repwe apwonueta ekkewe annuk ren an ewe Ngun mi Fel epwe atapa me siwini non netiper.
Iwe ewe auchean aninis sia tongeni awora metichok a emweni ekkewe sia tonger ar repwe nenengeni met pwisin ar finata. Alma a fori fiti ew tingor om kopwe awora:
“Etipetekisona inisimi me mwen ewe Samon, me kokkori itan we mi fel, me soposopono ne mammasa me iotek, pwe ousap sossot nap seni minne oua tongeni engino ngeni, iwe amo oupwe emmwen me ren ewe Ngun mi Fel, winiti mi tipetekison, mosonoson, fangoch, nikitu, uren tong me engino;
“Me wor nuku non ewe Samon; me wor ew apinukunuk pwe oupwe angei manau esemuch; me wor ewe tongen Kot fansoun meinisin non netipemi, pwe oupwe tongeni seikita non ewe ranin soponon me tonong non an we nenien asoso.” (Alma 13:28–29).
Uwa iotek pwe ekkewe ka tonger repwe etiwa ew murinin kokko ar repwe finata ewe an ngeni pwapwa esemuch.
© 2016 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/15 Kapungunon chiakun: 6/15. Chiakun First Presidency Message, January 2016. Chuukese (Trukese). 12861 901
Afanafan seni Ei Poraus
Preseten Eyring a afanafana pwe ewe pwapwa sia mefi non ach manau a anongonong won ewe pungun ekiek sia finata. Nupwen ka porous won ei porous, ekieki om kopwe nenengenochu ekkewe mettoch Preseten Eyring a apasa sia tongeni fini ach sipwe fori (ussun iotek, angang, omokutu foforun nuku, me fori ach sipwe wesewesen fori pungun) ne emwen ngenikich ewe anen pwapwa. Ka tongeni tingorei ekkewe ka aitir ar repwe makketiw ruu ika unungat foffor repwe sani ar repwe fori epwe tongeni emwenir ngeni “ewe an ngeni pwapwa ese much.”