Iren Mahsen en Presidensi Keieu, Senweri 2016
Nsenamwahu ong Irail kan me Kitail Poakohng
Sang Presiden Henry B. Eyring
Sounsawas Keieu nan Presidensi Keieu
Kitail koaruhsie anahne nsenamwahu en kin mie rehn irail kan me kitail poakohng, oh kitail anahne uwen kisin medek me kak en mie rehrail. Ni atail kin wadek duwen nsenamwahu—oh pahtou—nan Pwuhken Mormon, atail mohngiong kan kin mwekidida ni atail kin tamanda kempoakepahtail kan. Iet ehu iren kawewe mehlel me pid ehu ansoun nsenamwahu:
“Oh e wiawiher me sohte pingiping nan sahpwo, pwehki limpoak en Koht me kipedier nan mohngiong en irail aramas akan.
“Oh sohte peirin, akamai, akupwung, wiewia suwed, wielikamw, kam aramas, de sohte lipilipil soangen madmadau suwed akan; oh mehlel sohte mehmen kak ahniki nsenamwahu nan pwungen koaros me kepikipikdahsangehr ni limen Kauno.”
Kitail eri wadek:
“Oh ia uwen kapai me re ahniki! Pwe Kauno ketin kapairaildahr ni soahng koaros me re kin wia; ei, irail ahnikier kapai oh momourkiher sounpar epwiki eisek douer powe; oh dih keieu mwurin Krais pil sohralahr, oh sohte kahpwal pwarada nan sahpwo” (4 Nephi 1:15–16, 18).
Tohnpadahk limpoak kan en Krais kin kapakapki oh doadoahngki soangen kapaio ong pein irail oh meteikan. Sang ni kawewe kan nan Pwuhken Mormon oh, ong pali ngeder en kitail, sang ni pein atail wehwehki, kitail ese me kisakis en nsenamwahu kak alahldi. Kitail ese me ahl ong nsenamwahu kileldier mwahu. Kitail pil ese me ahniki popohl sohte mengei ihte, ma kitail duwehte mehn Nephite ko mwurin Sounkomouro eh ketila rehrailo, “limpoak en Koht” kipehdier nan mohngiongitail kan.
Limpoako mih nan mohngiong en Nephite ko pwehki re kolokolete kosonned me elehieng eh pweidao. Ehu oaralap en kosonnedo mih nan kapakap oko en kamadipw sarawi, me tepkihda ehu pekipek karakarahk ong Samatailo Nanleng me diren limpoak. Kitail kin kapakap ni mohngiong me direki nan pwoson, oh limpoak mehlel ong, pein atail Sounkomouro. Kitail kin inoukihda me kitail pahn alehda Mwareo, en tamataman Ih, oh kolokol Sapwellime kosonned akan koaruhsie. Keimwsekla, kitail kin doadoahngki pwoson pwe Ngehn Sarawi, me wia kesilimen en Godhead, en kin ketin ieiang kitail ansou koaros, kadehdeieng mohngiongitail kan duwen Sahmo oh Sapwellimahr Iehros Kempoakeo. (Tehk D&C 20:77, 79.)
Sang ni Ngehn Sarawio eh kin ehuong kitail, mohngiongitail kan kak wekila pwe kitail en anahne oh kasamwoh limpoak en Samatail Nanleng oh Kaun Sises Krais. Wiepen aledohng nan mohngiongitail kan limpoak en Koht me mengei, duwehte atail kin sohla ahniki pepehm en limpoako nan mohngiongitail kan. Ni karasepe, emen kak pilada en sohla kalap kapakap ong Sahmo Nanleng de sohla kin pwain eisek-kis-ehu en meirong de sohla kin rongorong mahsen en Koht de pohnsesehla irail kan me semwehmwe oh me mie arail anahn.
Pilipil me kin elehda atail sohte kapwaida Sapwellimen Koht kosonned akan kak karehda Ngehno eh sohpeisang mohngiongitail kan. Ni atail kin dohwanla Koht, nsenamwahu kin sohrala.
Nsenamwahu me kitail anahne ong kempoakepahtail kan kak pweida sang ni arail pilipil kan. Uwen atail poakohng emen kisin seri tikitik, emen me kapwohng rongamwahu wet, de kempoakepahtail kan, kitail sohte kak idingohng irail ren kolokol kosonned akan pwe ren kak warohng Ngehn Sarawio en sair oh wekidala mohngiongirail kan.
Eri sawas keieu mwahu me kitail kak wia iei mehkot me kin kaweid irail kan me kitail poakohng pwe ren tehk mwahu pein arail pilipil kan. Alma wia mwo iangahki luhk ehu me kumail kak sawaski.
“Kumwail karakarahkala mwohn Kauno, oh lukwerih mware sarawio, oh tehk oh kapakap ansou koaros, pwe kumwail en dehr lelohng kasongosong me laud sang dahme kumwail kak powehdi, oh Ngehn Sarawi en kaweid kumwail karakarahkala, ohpampap, peihk, kanengamah, diren limpoak oh mahk ansou koaros;
“Pwoson Kauno; ahniki koapwoaroapwoar pwe kumwail en alehdi mour soutik; ahniki limpoak en Koht nan mohngiongimwail kan ansou koaros, pwe kumwai en iang pilipilda ni keimwseklahn rahno oh kommoldi Reh” (Alma 13:28–29).
I kapakapki me irail kan me kumwail poakohng en kak alehda luhk kesemwpwal en pilada ahl ong nsenamwahu soutuk.
© 2016 sang Intellectual Reserve, Inc. Kolokol pwuhng koaros. Ntingdahr nan USA. Kamanaman ong lokaiahn wai: 6/15. Kamanaman ong kawehwe: 6/15. Kawehwehpen First Presidency Message, January 2016. Pohnpeian. 12861 885
Padahk sang ni Mahsen Wet
Presiden Eyring kin padahngki me nsenamwahu me kitail kin pehm nan mour kin kohsang ni pilipil kan me kitail kin wiahda. Ni amwail pahn kosoia mahsen wet, tehk mwahu dahnge kan me Presiden Eyring mahsani me kitail kak pilada wia (me duwehte kapakap, doadoahk, medewe duwen pwoson, oh inoukihdia sang ni ineng mehlel) en kaweidkitaillahng nan ahl en nsenamwahuo. Kumwail kak luke irail kan me kumwail kin padahkih ren ntingiedi wiewia riau de siluh me re pahn mwahuki idawehn me kak kaweidiraillahng “ahlen nsenamwahu soutuk.”