Mulwol ko Bin Somm’on e Presidency, January 2016
Falfalen’ nifan ngak e Picha’an nib Tu’uf Rodaed
Yib rok President Henry B. Eyring
Bin Somm’on e Counselor ulane Bin Somm’on e Presidency
Gadaed gubin ma gadaed ba adag ni ngeyag e falfalen’ ngak e picha’an nib tu’uf rodaed, ma ka gadaed ba adag ni nge waer e gafgow roraed. Nap’an ni gadaed be bi’eg mornga’agen e falfalen’—nge gafgow—u lane Fare Babyor ku Mormon, me sug gumircha’ daed nap’an ni gadaed be leam nag e picha’an nib tu’uf rodaed. Ba’aray e bin riyul’ ni mornga’agen e ngiyal’ ko falfalen’:
“Me yibi buch ni dariy e male’eg thin u lan fare nam, ni bachan e fare t’ufeg rok’ Got ni bay u lan gum’ircha’en fapi gidii’.
“Ma dariy e mo’owaen’, ara togopluw, ara gatheay e gapas, ara gathar, ara baen, ara mathang pogofan, ara ba mite dirngalen e galong; ma rriyul’ ni dakuriy ba ulung i gidii’ ni aram fini falfalaen’ ngab yang u fithik’ gubin e pi gidii’ ni sunmiy Got nga pa’.”
Ma arama gadaed bi’eg ni:
“Ma rib fel’ wa’athraed! Ya fare Somoel e tawa’ath nagraed u fithik’ e pi ngongol roraed; arragon, ni arame ni tawa’ath nagraed me fel’ rograed nge yaeni mada’ ko ngiyal’ ni ke m’ay e bin ra’ay nge ragag e duw; me m’ay e bin somm’on e mfen ko ngiyal’ ni yib Kristus, ma dariy e male’eg thin u lan ga’angin yang fare nam” (4 Nephi 1:15–16, 18).
Pi gachalpen Kristus e ri meybil gaed mar murwel gaed ko binem e tawa’ath ni fan ngak boech e gidii’ nge fan ngoraed. U lane fare Babyor ku Mormon ma, oreni gadaed, ko pin’en nike buch rodaed, ma gadaed manang ni fare tawa’ath ko falfalen’ e rayog ni nge thap. Gadaed manang ni fare kanawo’ iyan ko falfalen’ e rib magagyal. Ka gadaed manang nib momaw’ ni ngan paer ma yib falfalen’ fa’anra, boed fapi Nephites nap’an tomuren e wub rok Tathapeg, ni “fare tu’ufeg rok Got” e bay u lan gumircha’daed.
Binem e tu’ufeg e bay u lane gumicha’en fapi Nephites ya kar fol gaed ko fare motochiyel nike yag nag ngoraed. Mornga’agen e ra motochiyel nem e ran pir’eg u lan fare gal meybil ko sacrament, ni tabab ni yibe wenig ngak e Chitamangdaed nu Tharmiy nib sug ko tu’ufeg. Gadaed meybil u fithik e mich u lan gumircha’dad, nge fithik e tu’ufeg nib gel ngak, e Tathapeg rodaed. Gadaed dugliy u fithik e mich ni ngad feked fithngan nga dakaen daed, man leam Nag, man fol ko gubin e pi motochiyel Rok. Bin tomur, e ngad murwel gaed ko mich rodaed ya ngeyag ni fare Kan ni Thothup, ni fare bin dalip chonggin e Got, ni nge paer rodaed ni gubin ngiyal’, nibe micheg ko gumircha’daed mornga’agen e Chitamangiy nge Faak nib Tu’uf Rok. (Muguy ko D&C 20:77, 79.)
Fare Kan ni Thothup nibay, ma rayog ni nge thil gumircha’daed ya ngeyag ni ngad adaged ma gadaed pag e tu’ufeg rok e Chitamangdaed nu Tharmiy nge Somoel ni Yesus Kristus nge yib ngodaed. Rogon ni ngeyag e tu’ufeg rok Got nga lan gumircha’en daed e ba moem, ni boed nib moem ninge chuw e binem e tu’ufeg u lan gumircha’daed. Boed ni, bee’ e rayog ni nge dugliy ni gathi ban’en nibe meybil ngak e Chitamangiy nu Tharmiy fa dabi pi’ e miligach rok fa tal ni dabki bi’eg e thin rok Got fa pi’ kiru’ ngak e picha’an nib tu’uf e ayuw roraed.
Demtrug e n’en ni yibe mel’eg ni dabin fol ko pi motochiyel rok Somoel e rayog nge n’anggin fare Kan ni Thothup nge chuw u lan gumircha’daed. Ma chuw e falfalen’, ko binem ni darni rrin’.
Falfalen’ ni gadaed ba adag ni ngeyag ngak e picha’an nib tu’uf rodaed e ba mil fan ngoraed. Gelngin ni gadaed ba tu’uf ko bitir, bee’ nibe fil mornga’agen e galasia, fa pi fagar rodaed, ma dabiyog ni ngad n’anggined ngar fol gaed ko fapi motochiyel ya ngeyag ni nge thilyeg fare Kan ni Thothup gumircha’raed.
Ere bin tha’abi mangil e ayuw ni rayog ngad pi’ed demtrug ko mang e be gagyeg nag e picha’an nib tu’uf rodaed ni ngad guyed e n’en ni yaed be mel’eg. I rrin’ Alma ni non ni rayog ngam pi’:
“Mu m’ing niged gimed u mit Somoel, mi gimed pining fithingan nib thothup, ma ngam uthumed oewchmed ma nga um meybil gaed nib pethpeth, ni nga dabiyog ni yibe lumel ngomed nge pag rogon nra yog romed, ma nge yog ni powi’iymed fare Kan ni Thothup, ma ngam gumud gaed, mi gimed muding, mi gimed pag laniyaen’med, ma ngam gum’aen’ gaed, ma nge sug laniyaen’med ko murnguy nge athamgil;
“Me mich u wun’med fare Somoel; me yib ba athap ngomed nra yog ni ngam thapeged e yafos ni manechubog; me paer fare t’ufeg rok’ Got ni gubin e ngiyal’ u lan gum’ircha’med, ni gomanga yog nni fekmed ngalang ko bin tomur e rran mi gimed yaen nga tafen” (Alma 13:28–29).
Gube meybil ni picha’an nib tu’uf rom e ra motoyil ko n’en ni kan noeg ni nge mel’eg nge un ko fare kanawo’ nib sar ko falfalen’ nib n’uw nap’an.
© 2016 by Intellectual Reserve, Inc. Gubin mabay matwon. Kan yoloey u Mariken. Kan micheg nag ko thin nu Ngalis: 6/15. Micheg nag i pilyeg: 6/15. Pilyeg e thin ko First Presidency Message, January 2016. Yapese. 12861 905
Rogon ni ngan Fil ko Biney e Mulwol
Ke fil President Eyring ni falfalen’ ni gadaed ma thamiy u lane yafos e be yaen ko rogon e pin’en ni gadaed be mel’eg. Nap’an ni gara weliy ere mulwol ney, mu tiyan’um ko pin’en nike yoeg President Eyring ni rayog ngad mel’eged ngan riin’ (boed e meybil, murwel, murwel ko mich, nge gadaed ni gadaed be dugliy ban’en u fithik e mich) ni ra gagyeg nag daed ko ra kanawo’ nem ko falfalen’. Rayog ngam moeg ko picha’an ni gabe sensey nag ngar yoloeyed l’agruw fa dalip ban’en ni yaed ba adag ngar rrin’ed ni rayog nge gagyeg nag raed ko “fare kanawo’ ko falfalen’ nib n’uw nap’an.”