iTukutuku ni Mataveiliutaki Taumada, Janueri 2016
Bulamarau baleti Ira Eda Lomana
Mai vei Peresitedi Henry B. Eyring
iMatai ni Daunivakasala ena Mataveiliutaki Taumada
Oi keda kece eda vinakata na bulamarau baleti ira eda lomana, ka da vinakata me kakua ni ra dau sotava vakalevu na mosi. Ni da wilika na italanoa ni bulamarau—kei na mosi—ena iVola i Momani, e yavalati na yaloda ni da vakananumi ira eda dau lomana. Oqo na italanoa dina ni dua na gauna ni bulamarau:
“A sa sega na veileti ena vanua, ni sa tiko e lomadra na tamata na loloma ni Kalou.
“A sa sega na vuvu kei na veileti, na ue, na veibutakoci, na lasu, na laba kei na veimataqali gagano ca; era sa tamata mamarau cake mai vei ira na tamata kece ga sa bulia na Kalou.”
Eda qai wilika:
“Ia era sa kalougata! Ni sa vakalougatataki ira na Turaga ena nodra cakacaka kecega; io, era sa vakalougatataki ka tiko sautu me yacova ni sa oti yani na i kadua na drau katini ni yabaki; era sa takali yani na imatai ni tabatamata mai na gauna i Karisito, a sa sega na veileti ena vanua taucoko” (4 Nifai 1:15–16, 18).
O ira na tisaipeli lomani i Karisito era masu ka cakacakataka na veivakalougatataki vakaoya me baleti ira na tani vakakina o ira vakataki ira. Mai na itukutuku ena iVola i Momani ka, me vakatalega e vuqa vei keda, mai na veika eda sa sotava oti, eda kila ni sa rawa ni sotavi na isolisoli ni bulamarau. Eda kila ni sa matata vinaka tu na salatu ki na bulamarau. Eda kila talega ni sega ni ka rawarawa na sotavi tiko na bulamarau vakavo, me vakataki ira na Nifai ni sa sikovi ira oti na iVakabula, sa tu ga e lomadra “na loloma ni Kalou.”
Sa tu ga e lomadra na Nifai na loloma o ya baleta ni ra maroroya na ivunau ka ra rawata kina na veika o ya. E tiko na ivakaleka ni lawa o ya ena masu ni sakaramede, ka tekivu ena dua na vakatakekere vakaciriloloma kivua na Tamada Vakalomalagi dauloloma. Eda masu ena yalo ni vakabauta, kei na noda loloma titobu, me baleta na noda iVakabula. Eda yalataka me da taura vakaidina na Yacana, ka dau nanumi Koya, ka muria taucoko na Nona ivakaro. Kena iotioti, eda cakacakataka na vakabauta me rawa ni tiko ga kei keda na Yalo Tabu, na ikatolu ni Lewetolu Vakalou, ka vakadinadinataka tiko ki lomada me baleta na Tamada kei na Nona Gone ni iToko. (Raica na V&V 20:77, 79.)
Ena veitokani ni Yalo Tabu, sa na rawa ni veisau na yaloda me da vinakata ka marautaka na loloma ni Tamada Vakalomalagi kei na Turaga o Jisu Karisito. Na sala ni kena rawati na loloma ni Kalou ki lomada e ka rawarawa, me vakakina na sala ni kena yali na vakilai ni loloma o ya e lomada. Me kena ivakaraitaki, e dua beka ena digitaka me vakalailaitaka na nona masuta na Tamada Vakalomalagi se kakua ni sauma vakadodonu na nona ikatini se me muduka na wiliki ni vosa ni Kalou se me vakawaleni ira na dravudravua kei na vakaloloma.
Na digidigi cava ga ni kena sega ni muri na ivakaro ni Turaga ena rawa ni vakavuna me yali mai lomada na Yalotabu. Ena veika e leca o ya, sa yali kina na bulamarau.
Na bulamarau eda vinakata vei ira na noda daulomani ena vakatau tiko ena nodra digidigi. Se vakacava sara na noda lomana e dua na gone, dua na dauvakatataro, se noda itokani, eda na sega ni rawa ni vakaukauwataki ira mera muria na ivunau mera rawata kina na Yalo Tabu me tara ka veisautaka na lomadra.
Na veivuke levu ga eda rawa ni solia sa ikoya na cava ga e muataki ira eda lomana mera wanonova matua na nodra digidigi. E vakayacora o Alama ena dua na veisureti o na rairai solia:
“Dou vakamalumalumutaki kemudou vua na Turaga, ka masuta na yacana tabu; dou vakatawa ka masu tiko ga me kakua ni rawai kemudou na vere; ia ena tuberi kemudou na Yalo Tabu mo dou yalomalumalumu, yalomalua, talairawarawa ka yalovosota, io mo dou sinai ena loloma kei na vosota vakadede;
“Dou vakabauta na Turaga, mo dou rawata kina na bula tawamudu; ia me tiko ga e lomamudou na loloma ni Kalou, mo dou laveti cake kina ena siga mai muri, ka curu ki na nona ivakavakacegu” (Alama 13:28–29).
Au sa masulaka mera na ciqoma o ira o lomana na veisureti veivakauqeti mera digitaka na salatu ki na bulamarau tawayalani.
© 2016 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/15. Vakadonui me vakadewa: 6/15. Vakadewa ni First Presidency Message, January 2016. Fijian. 12861 858
Veivakavulici mai na iTukutuku Oqo
E vakatavuvulitaka o Peresitedi Eyring ni bulamarau eda vakila ena bula oqo ena vakatau mai na digidigi eda cakava. Ena nomu veivosakitaka na itukutuku oqo, navuca na veika e kaya o Peresitedi Eyring eda rawa ni digitaka ni cakava (me vaka na masu, cakacaka, cakacakataki ni vakabauta, kei na noda yalataki keda vakaidina) me muataki keda ki na salatu o ya ni bulamarau. Sa rawa ni ko sureti ira o vakavulica mera vola e rua se tolu na ka era na vinakata mera taura ka na muataki ira vakavinaka cake ki “na salatu ni bulamarau tawayalani.”