iVaqa ni Veisiko, Janueri 2016

Na Matavuvale: Ai Vakaro ki Vuravura Raraba

Vulica ena masumasu na itukutuku oqo ka vakasaqara mo kila na ka me wasei. Ena vakalougatataki ira vakacava o vakaraica voli ena veisiko na kilai vakamatata ni ivunau ni matavuvale? Me ikuri ni itukutuku, lako ki na reliefsociety.lds.org.

Vakabauta, Matavuvale, Veivukei

Ena soqoni raraba ni iSoqosoqo ni Veivukei ena 1995, ka wilika kina o Peresitedi Gordon B. Hinckley (1910–2008) ena imatai ni gauna “Na Matavuvale: Ai Vakaro ki Vuravura Raraba,” a kaya o Bonnie L Oscarson, na peresitedi raraba ni Goneyalewa: “Keimami a vakavinavinakataka ka vakamareqeta na kena matata, rawarawa, ka dina ni itukutuku vakatakilai mai oqo. … Na ivakaro ena matavuvale e sa mai noda ivakatagedegede ni kena vakatulewataki na veivakasama ni vuravura, kau sa vakadinadinataka ni veivakavuvuli e sa tuvai no … era sa dina tu nikua me vaka ena gauna era a solia kina vei keda mai vua e dua na parofita ni Kalou rauta ni 20 na yabaki sa oti.”¹

“Mai na ivakaro ni matavuvale,” e tomana o Carole M. Stephens, na imatai ni daunivakasala ena mataveiliutaki raraba ni iSoqosoqo ni Veivukei, “eda vulica, ‘Ena gauna ni bula mai liu, era sa kila ka dau qarava na Kalou na luvena tagane kei na yalewa vakayalo me vaka ni Tamadra Tawamudu’² …

“… Eda sa dui lewena ka sa gadrevi ena matavuvale ni Kalou.”³

Eda sa bula ena dua na gauna mera sa na taqomaka kina na itubutubu na nodra itikotiko kei na matavuvale. “Na Matavuvale: Ai Vakaro ki Vuravura Raraba” sa rawa ni tuberi keda.

iKuri ni iVolanikalou

Mosaia 8:16-17; Vunau kei na Veiyalayalati 1:38

Veitalanoa Bula

“A kaya o Lee Mei Chen Ho mai na iKatolu ni Tabanalevu e Tao Yuan, ena iTeki o Tao Yuan Taiwan, ni sa vakatavulici koya na ivakaro ni veiwekani vakamatavuvale e vukea na taraicake ni ituvaki ni bula vakalou me vaka na vakabauta, dauvosota, kei na loloma. ‘Niu saga meu vakavinakataki au me vaka e kainaki ena ivakaro, au sotava sara ga na bulamarau dina,’ a kaya o koya.”⁴

O Barbara Thompson, ka a tiko ena gauna e wiliki kina na ivakaro ena imatai ni gauna ka qai veiqaravi e muri vaka daunivakasala ena mataveiliutaki raraba ni iSoqosoqo ni Veivukei a kaya: “Au vakasamataka toka vakamalua ni [na ivakaro ni matavuvale] a sega dina niu oka vakalevu sara baleta niu a sega tu ni vakawati ka sega ni vakaluveni. Ia au mani vakasamataka totolo tale, ‘Ia au oka sara ga kina. Au lewe ni dua na matavuvale. O au e dua na luve yalewa, e dua na tacina yalewa, dua na nei, dua na tavale, dua na vugona, ka dua na makubuna yalewa. … Kevaka mada ga meu a lewe taudua ni noqu matavuvale e bula tiko, au se lewe tiko ga ni matavuvale ni Kalou.’”⁵

© 2016 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/15. Vakadonui me vakadewa: 6/15. Vakadewa ni Visiting Teaching Message, January 2016. Fijian. 12861 858

iDusidusi

1. Bonnie L. Oscarson, “Ira na Dautaqomaka na iVakaro ni Matavuvale,” Liaona, Me 2015, 14-15.

2. “Na Matavuvale: Ai Vakaro ki Vuravura Raraba,” Liaona, Nove. 2010, 129.

3. Carole M. Stephens, “Na Matavuvale sa Mai Vua na Kalou,” Liaona, Me 2015, 11.

4. Nicole Seymore, “‘Na Matavuvale: Ai Vakaro ki Vuravura Raraba’ e sa yacova nai ka 10-ni Yabaki ni kena Vakananumi, Liaona, Nove. 2005, 127.

5. Barbara Thompson, ena Luvequ Yalewa ena Noqu Matanitu: Na iTukutuku kei na Cakacaka ni iSoqosoqo ni Veivukei (2011), 148.

Vakasamataka Oqo

Sa vakacava tiko “Na Matavuvale: Ai Vakaro ki Vuravura Raraba” e dua na itukutuku me baleta na noda gauna?