Mesaj Premye Prezidans lan, Janvye 2016
Kontantmanpou Sila Nou Renmen Yo
Prezidan Henry B. Eyring
Premye Konseye nan Premye Prezidans lan
Nou tout vle kontantman pou moun nou renmen yo, e nou vle minimòm lapenn pou yo ke posib. Lè n ap li istwa kontantman—ak istwa lapenn— yo nan liv Mòmon an, kè nou vibre pandan n’ ap panse ak moun nou renmen yo. Men yon vrè istwa konsènan yon tan kontantman:
Epi, se te konsa, pa t gen chirepit nan peyi a, poutèt lanmou Bondye ki te nan kè pèp la.
“Epi pa t gen anvi, ni mètdam, ni lobo, ni idolatri seksyèl, ni manti, ni asasina, ni okenn kalte anvi sal; e reyèlman pa t kapab gen yon pèp ki pi kontan nan pami tout pèp men Bondye te kreye.”
Apresa nou li:
“Epi yo te beni anpil! Paske Senyè a te beni yo nan tout zèv yo; wi, yo te beni, e yo te pwospere jistan sandis ane te pase; e premye jenerasyon depi epòk Kris la te pase, e pa t gen chirepit nan tout peyi a” (4 Nefi 1:15–16, 18).
Disip eman Kris la priye epi yo travay pou yon benediksyon konsa pou lòt moun e pou tèt pa yo. Apati istwa nan Liv Mòmon an, e pou anpil nan nou, atravè pwòp eksperyans nou, nou konnen nou kapab rive atenn kado kontantman an. Nou konnen chemen pou kontantman an byen make. Nou konnen tou ke li pa fasil pou nou kenbe kontantman amwenske, menm jan avèk Nefit yo apre vizit Sovè a, “lanmou Bondye” rete nan kè nou.
Lanmou sa a te nan kè Nefit yo paske yo te respekte lwa ki te fè sa posib la. Nou jwenn yon rezime lwa sa a nan priyè sentsèn yo, ki kòmanse avèk yon priyè sensè a Papa Nou Ki Nan Syèl la. Nou priye avèk yon kè plen lafwa nan Sovè pèsonèl nou an, ak yon lanmou pwofon pou li. Nou pran angajman avèk entansyon reyèl pou nou pran non Li sou tèt nou, pou nou sonje li, epi pou nou respekte tout kòmandman Li yo. Finalman, nou egzèse lafwa ke Sentespri a, twazyèm manm Divinite a, kapab toujou avèk nou, pou temwanye kè nou de Papa a avèk Pitit Gason Byeneme a. (Gade D&A 20:77, 79
Avèk konpayi Sentespri a, kè nou kapab chanje pou fè nou vle ak akeyi lanmou Papa Nou Ki Nan Syèl La ak Senyè a, Jezikri. Fason pou nou resevwa lanmou Bondye nan kè nou an senp, menm jan avèk fason pou nou pèdi santiman lanmou sa a nan kè nou an. Pa egzanp, yon moun gen dwa chwazi pou l priye Papa nou ki nan Syèl la mwen souvan, oubyen pa peye yon dim konplèt, oubyen sispann fete ak pawòl Bondye a oubyen pa okipe pòv yo ak moun ki nan nesesite yo.
Nenpòt chwa pou nou pa kenbe kòmandman Senyè a kapab lakoz Lespri a retire kò l nan kè nou. Avèk pèt sa a, kontantman nou diminye.
Kontantman nou ta renmen pou pwòch nou yo depann de chwa yo. Kèlkeswa jan nou renmen yon timoun, on envestigatè, oubyen zanmi nou, nou paka fòse yo respekte kòmandman yo pou yo ka kalifye pou Sentespri a touche epi chanje kè yo.
Konsa, pi bon èd nou kapab bay se bay tout sa ki ka pouse moun nou renmen yo fè atansyon ak pwòp chwa pa yo. Alma te fè sa avèk yon envitasyon ou ta ka bay:
“Imilye tèt nou devan Senyè a, epi rele non li, veye e priye tout tan, pou nou kapab pa tante plis pase nou kapab sipòte, e konsa, pou Lespri Sen an dirije nou pou nou kapab vin enb, dou, soumi, pasyan, chaje avèk lanmou ak andirans;
“Pou nou gen lafwa nan Senyè a; pou nou gen on espwa ke n’ap resevwa lavi etènèl; pou nou gen lanmou Bondye nan kè nou tout tan pou nou kapab leve nan dènye jou yo, epi antre nan repo li” (Alma 13:28–29).
Mwen priye pou moun nou renmen yo ka akspete envitasyon enspire pou yo chwazi chemen kontantman dirab la.
© 2016 pa Intellectual Reserve, Inc. Tout dwa rezève. Enprime nan Etazini Damerik. Apwobasyon Anglè: 6/15. Apwobasyon tradiksyon: 6/15. Tradiksyon First Presidency Message, January 2016. Haitian Creole 12861 036
Ansèyman nan mesaj sa a
Prezidan Eyring anseye ke kontantman nou santi nan lavi a depann de desizyon nou pran yo. Pandan w ap pale sou mesaj sa a, panse pou w konsantre sou sa Prezidan Eyring di nou kapab chwazi pou n fè yo (tankou priye, travay, egzèse lafwa, epi angaje tèt nou avèk entansyon reyèl) pou dirije nou sou chemen kontantman sa a. Ou kapab envite moun w ap anseye yo pou yo ekri de oubyen twa aksyon yo ta renmen fè ki kapab pi byen dirije yo al nan “chemen kontantman dirab la.”