Ennaan eo an Būreejtōnji eo Kein Kajuon, Jānwōde 2016
M̧ōņōņō kōn Ro Jej Iakwe Er
Jān Būreejtōn Henry B. Eyring
Rikakpilōklōk eo Kein Kajuon ilo Būreejtōnji eo Kein Kajuon
Kōj aolep im kōņaan m̧ōņōņō kōn ro jej iakwe er, im jej jab kōņaan bwe ren metak. N̄e jej riiti bwebwenato ko kōn m̧ōņōņō—im kōn metak—ilo Bok in Mormon eo, epoktak buruwōd n̄e jej ļōmņak kōn ro jej iakwe er. En̄in ej juon bwebwenato em̧ool kōn juon iien ekam̧ōņōņō:
“Im eaar ejjeļo̧k jum̧ae doon ilo āneo, kōnke iakwe eo an Anij eo eaar pād ilo buruōn armej ro.
“Im eaar ejjeļo̧k junm̧are ko, ak akwāāl ko, ak ailwaro ko, ak ļōn̄ ko, ak riab ko, ak uror ko, ak jabdewōt wāween m̧ōm̧ an kanniōk; im em̧ool eaar ejjeļo̧k bar armej re m̧ōņōņōļo̧k ilubwilijin armej ro otemjej kar ejaak jān pein Anij.
Innām kōm̧ ar riit:
“Im ekōjkan aer kar jeram̧m̧an! Bwe Irooj eaar kōjeram̧m̧an er ilo aolep kōm̧m̧an ko aer; aaet, em̧ool raar jeram̧m̧an im eddōkļo̧k m̧ae jibuki im jon̄oul iiō raar eļļāļo̧k; im epepen eo m̧oktata jān Kraist eaar eļļāļo̧k, im eaar ejjeļo̧k epelon̄lon̄ ilo aolepān āneo” (4 Nipai 1:15–16, 18).
Rikaļoor ro an Kraist im ewōr iakwe ippāer rej jar im jerbal kōn kain kōjeraam̧m̧an in n̄an ro jet im n̄an er make. Jān bwebwenato ko ilo Bok in Mormon eo im, n̄an elōn̄ iaadwōj, jān en̄jake ko ad, jejeļā bwe mennin letok eo kōn m̧ōņōņō epidodo bōke. Jej jeļā bwe iaļ eo n̄an m̧ōņōņō emōj barāinwōt kōkkaļļeiki. Jej barāinwōt jeļā bwe n̄an dāpijwōt m̧ōņōņō ilo kōj ej jab juon men epidodo m̧ae iien, āinļo̧k wōt RiNipai ro ālkin loļo̧k eo an Rilo̧mo̧o̧r eo, “iakwe eo an Anij” ej deļo̧n̄tok ilo būruwōd.
Iakwe in ekar pād ibūruwōn RiNipai ro kōnke rekar dāpij wōt kakien eo, eo ekar kapidodoikļo̧k menin. Tukaduin kakien in jej loe ilo jar in kwojkwoj eo, eo ej ijjino kōn juon akweļap in juon bōro erub n̄an Jemedwōj Ilan̄ eo eļap iakwe ippān. Jej jar kōn juon bōro eobrak kōn tōmak, im kōn juon iakwe em̧wilaļ n̄an, ad Rilo̧mo̧o̧r. Jej kallim̧ur kōn bōro em̧ool n̄an bōk iood Etan, n̄an keememej E, im kōjparok aolep kien ko An. Āliktata, jej kōjerbal tōmak bwe Jetōb Kwojarjar eo, eo ej membōr eo kein kajilu in Anij ko, bwe enaaj pād ippād iien otemjej, kam̧ool n̄an būruwōd kōn Jemān im kōn Nejin Ejitōn Bōro. (Lale K&B 20:77, 79.)
Kōn jem̧jerā eo an Jetōb Kwojarjar, būruwōd emaron̄ oktak bwe jej kōņaan im jej karuwaineneik iakwe eo an Jemedwōj Ilan̄ im Irooj Jisōs Kraist. Epidodo wāween in n̄an bōk iakwe eo an Anij ilo būruwōd, āinļo̧k wōt wāween ad luuji en̄jake in iakwe eo ilo būruwōd. N̄an waanjon̄ak, juon armej emaron̄ in kālet bwe en jab emakijkij an jar n̄an Jemedwōj Ilan̄ ak jab kōļļā juon m̧ōttan jon̄oul ak bōjrak an kwojkwoj ioon naan an Anij ak kōjekdo̧o̧n rijeramōl ro im ro riaikuj ro.
Jabdewōt kālet ko rej jab jejjet n̄an kōjparok kien ko an Irooj remaron̄ kōm̧m̧an bwe Jetōb eo en em̧m̧akūt jān būruwōd. Kōn jako in, m̧ōņōņō ej dikļo̧k.
M̧ōņōņō eo jekōņaan n̄an ro rejitōn bōro ippād ej pedped wōt ioon kālet ko aer. Jon̄an wōt ad iakwe juon ajri, juon rikkatak, ak ro m̧ōttad, jej jab maron̄ iuun er n̄an kōjparok kien ko bwe ren karbab n̄an Jetōb Kwojarjar eo n̄an un̄ūr im ukōt būruweer.
Kōn menin jipan̄ eo em̧m̧an tata komaron̄ leļo̧k ej jabdewōt men eo ej tōlļo̧k ro otemjej jej iakwe n̄an mijōk wōt kālet ko aer make. Alma ekar kōm̧m̧ane menin kōn juon kūr komaron̄ in leļo̧k:
“A bwe kom̧ naaj kōttāik kom̧ im̧aan Irooj, im kūr ioon Etan ekwojarjar, im ekkōl im jar im jab bōjrak, bwe kom̧in jab maron̄ ioon kapo ko reļļapļo̧k jān ami maron̄ inene, im āindein bōk tōl jān Jetōb Kwojarjar, im erom ri ettā bōro, kom̧in jeļāņae im jouj; kiplie; obrak kōn iakwe im meanwōd otemjeļo̧k;
“En wōr ami leke ioon Irooj; en wōr juon kōjatdikdik bwe kom̧ naaj bōk mour indeeo; en wōr iakwe an Anij iien otemjej ilo buruōmi, bwe kom̧ in maron̄ jerkak ilo raan eo āliktata im deļo̧n̄ļo̧k ilo kakkije eo An.” (Alma 13:28–29).
Ij jar bwe ro otemjej kom̧ij iakwe er ren maron̄ in bōk juon kūr eim̧we n̄an kālet iaļ eo n̄an m̧ōņōņō eo ejjeļo̧k jem̧ļo̧kin.
© 2016 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo kajin English: 6/15. Kōmālim an ukook: 6/15. Ukook eo an First Presidency Message, January 2016. Marshallese. 12861 874
Katakin jān Ennaan In
Būreejtōn Eyring ej katakin bwe m̧ōņōņō eo jej en̄jake ilo mour ko ad ej pedped wōt ioon kālet ko ad. N̄e kwonaaj katakin jān ennaan in, ļōmņak im pedped wōt ioon men ko Būreejtōn Eyring ekar kwaļo̧ki me jemaron̄ kālet n̄an kōm̧m̧ani (āinwōt jar, jerbal, kōjerbal tōmak, kallim̧uri kōj make kōn bōro em̧ool) n̄an tōlļo̧k kōj n̄an iaļ eo ekam̧ōņōņō. Komaron̄ kajjitōk ippān ro kwoj katakin bwe ren jeje ruo ak jilu m̧akūtkūt ko rekōņaan kōm̧m̧ani, ko me remaron̄ in em̧m̧anļo̧k aer tōlļo̧k er n̄an “iaļ eo n̄an m̧ōņōņō eo ejjeļo̧k jem̧ļo̧kin.”