2016
Baam̧le Eo: Juon Naan in Kean̄ n̄an Laļ in
Jānwōde 2016

Naan in Katak ko an Kōra, Jānwōde 2016

Baam̧le Eo: Juōn Naan in Kean̄ n̄an Laļ in

Kanooj jar ilo am̧ ekkatak kōn katak in im pukōt n̄an jeļā ta eo kwonaaj kwaļo̧k. Ilo am̧ meļeļe kōn katak ko an baam̧le, ewi wāween aer naaj kōjeraam̧an ro kwoj oņaake er itok wōt jān loļo̧k ko an kōrā? N̄an meļeļe ko reļļapļo̧k, etal n̄an reliefsociety.lds.org.

Tōmak, Baam̧le, Deeor

Jān kweilo̧k eo eļap an Doulul eo an Kōrā ro ilo 1995, ke Būreejtōn Gordon B. Hinckley (1910–2008) ekar jino riiti “Baam̧le Eo: Juon Naan in Kean̄ n̄an Laļ in,” Bonnie L. Oscarson, būreejtōn eo eutiej an Doulul eo an Jiron̄ ro, ekar ba: “Jej m̧ōņōņō kake im kaorōke, pedped in, im m̧ōdenļo̧k eo em̧ool an peba in. … Kean̄ eo an baam̧le eaar erom pedped in katak eo ad n̄an jum̧ae jeļā ko an laļ in, im ij kam̧ool bwe pedped ko kar kwaļo̧ki ilo ennaan in rej m̧ool rainin āinwōt aer kar litok n̄an kōj jen juōn rikanaan an Anij enan̄in 20 iiō rem̧ootļo̧k.”1

“Jān naan in kean̄ eo an baam̧le,” Carole M. Stephens, rikapilōklōk eo kein kajuon ilo būreejtōnji eo eutiej an Doulul eo an Kōrā ro ekar kwaļo̧k, “jej katak, ‘Ilo jikin eo ilo mour eo m̧okta, ajri in jetōb ro nejin raar jeļā im kabun̄jar n̄an Anij āinwōt eo Jemeir Indeeo’2 …

“… Kōj kajjojo jej an im aikuj ilo baam̧le eo an Anij.”3

Jej mour ilo juon tōre im ro jinen im jemān rej aikuj kōjparok m̧ōko m̧weer im baam̧le ko aer. “Baam̧le Eo: Juon Naan Kean̄ n̄an Laļ in” n̄an tōl kōj.

Bar Jet Eoon Ko

Mosaia 8:16–17; Katak im Bujen ko 1:38

Bwebwenato ko rem̧ool raan kein emōj Jeiki

“Lee Mei Chen Ho jān Tao Yuan Third Ward, Tao Yuan Taiwan Stake, ekar ba bwe naan in kean̄ eo ekar katakin e bwe kōtaan ko an baam̧le eo ej jipan̄ ejaake kadkad ko rekwojarjar āinwōt tōmak, kijenmej, im iakwe. ‘N̄e ij kajjieon̄ kaddōkļo̧k n̄a make ekkar n̄an naan in kean̄ eo, imaron̄ en̄jake m̧ōņōņō eo em̧ool,’ liin ekar ba.”4

Barbara Thompson, eo ekar kwaļo̧k ke ekar pād ilo tōre eo jinoin an tilmaake naan in kean̄ eo an baam̧le im tokālik ekar jerbal āinwōt juon rikakpilōklōk ilo būreejtōnji eo eutiej an Doulul eo an Kōrā ro, ekar ba: “Ikar ļōmņak ium̧win jidik iien bwe [naan in kean̄ eo an baam̧le] ekar jab lukkuun jelet n̄a ke ikar jan̄in m̧are im ekar ejjeļo̧k nejū ajri. Ak emōkaj aō kar bar ļōmņake, ‘Ak menin ebar jelet eō. N̄aij juon membōr in juon baam̧le. Ij juon leddik nejin, juon sister, juon aunt, juon rilikin, juon eo nej nejin, im juon jibwin. … Aaet men̄e ikar make wōt membōr in baam̧le eo im emour, ij juon membōr in baam̧le eo an Anij.’”5

© 2016 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo kajin English: 6/15. Kōmālim an ukook: 6/15. Ukook eo an Visiting Teaching Message, January 2016. Marshallese. 12861 874.

Kakeememej ko

  1. Bonnie L. Oscarson, “Rijojomar ro an Naan in Kean̄ eo an Baam̧le,” Liaona, Māe 2015, 14–15.

  2. “Baam̧le Eo: Juon Naan in Kean̄ n̄an Laļ in,” Liaona, Nov. 2010,129.

  3. Carole M. Stephens, “Baam̧le eo Ej An Anij,” Liaona, Māe 2015, 11.

  4. Nicole Seymour, “‘The Family: A Proclamation to the World’ reaches 10-Year Milestone, Liahona, Nov. 2005, 127.

  5. Barbara Thompson, ilo Daughters in My Kingdom: The History and Work of Relief Society (2011), 148.

Ļōmņak kōn Menin

Ekōjkan an menin “Baam̧le Eo: Juon Naan in Kean̄ n̄an Laļ in” juon ennaan n̄an raan kein ad?