Poraus seni ewe Aewin Presetensi, February 2016
Sotiw non Kinamwe non Mochunguchungun Asapwan
Ese pwan mo tam fansoun a no, ngang me punuwei we, Harriet, am aiwa nom non ewe nenien soson sepenin aiwa katon amwararen kewe sepenin ra sotiw. Ewe ran mi fokkun akasapwan, me watten ngusungusun asapwan a peni ekkewe sepenin mi sato, a esenipata ar repwe machunguchung me tokorikirik nupwen repwene sotiw.
Nupwen aua kakaton ei osukosuk nefinen mwesin me pusin masowen ei fonufan, ai ekiek a niwin sefan ngeni ewe fansoun uwa kaeo ngeni aiwe sikunen uwou sepenin me ekkewe nongonong uwa kaeo—iwe mwirin uwa aiti ekkoch chon sikunen uwou sepenin me ikena.
“Kosap fiu ngeni ewe mettoch a wisen afetena ewe sepenin nupwen epwe machunguchung ren asapwan,” Uwa kan soun urenir. “Kopwe chok kinamwe; ousap atapwanapwan non ami mokutukut. Mesemi epwe chok newenewen ngeni ewe esisin mi wenechar nukanapen ewe nenien saan sepenin. Ika ouwa rikiseni ewe an ouwa mochen fetan non, mwitir opungu non tumunoch. Nukunuk non tufichin wami we sepenin. Fitau ewe mochunguchugun asapwan.”
Chon uwou sepenin mi nipwakoch ra weweiti pwe esap iteitan repwe nemeni ekkewe mettoch a fis unukur. Rese tongeni chok awesano ewe machunguchungun asapwan. Rese tongeni repwe fori an ewe ran me snow repwe morono. Rese tongeni fori enienin ewe asapwan epwe kouno me siwini fetanin.
Nge ra pwan weweiti pwe ese pung ar repwe nuokusiti osukosuken fan nang me pochokunen asapwan—me akkaewin ar resap fori ar resap chiwen tongeni mokutukut. Ewe anen ar repwe sotiw non kinamwe nupwen nonomun ewe osukosuk a murinono repwe nom won ewe an mi pung me sapwetete non pungochun me mecheresin.
Nupwen uwa katon efoch sepenin me pwan mwirin efoch nupwen ar ra fori ar amuchunon ar repwene sosotiw iwe ua chemeni ekkewe nongonong uwa kaeo seni ekkewe ier nupwen uwa emon chon uwou sepenin, uwa ekieki ika esap pwan wor ew nesen non ei ren manauach.
Sise tongeni ach sipwe chok nemeni iteitan ekkewe osukosuk ei manau a ngeni kich non anach. Fan ekkoch ekkewe mettoch ese mecheres ar repwe fetan non met ewe sia mochen. Sipwe mefi chechech me changefetan ren ewe osukosuken tipemwaramwar, ekiekingaw, nuokus, netipengaw; ika riaffoun inisich.
Non ekkana fansoun, a mecheres ach sipwe ono non mettoch meinisin a mwanino me fori an ach osukosuk epwe nukanapen ach ekiek. Ewe sossot a anongonong won ekkewe osukosuk sia ekieki nap seni won ewe Chon Amanau me ach kapasen pwaratan ewe ennet.
Nge esap ina ew an mi mwirino ach sipwe kasini ach ekkewe osukosuken non ei manau.
Ussun chok emon chon uwou sepenin mi angeoch ese anonga an ekiek won ewe asapwan nge won nukanapen ewe nenien saan sepenin me ewe pungun nenien sotiw, nge kich sipwe pwan anonga ach ekiek nukanapen ach nuku—ach ewe Chon Amanau, An ewe kapas allim, me ewe kokkot an Samach won Nang—me amuchunon met sia angang ngeni—ach sipwe niwino non kinamwe ngeni nenien nang. Sipwe apinukunuku Kot me fori ach sipwe nom won ewe anen chon tapweno mwirin Jises ewe nongonongun ach pochokunen inis me ekiek. Sipwe tumunu masach, netipach, me ach ekiek repwe anonga ar repwe manaueni ew manau sia sinei pwe sipwe manaueni.
Pwarano ach nuku me apinukunuk non Samach won Nang ren ach pwapwa ne aponueta an kewe annuk epwe ngenikich pwapwa me mwareiti. Iwe ika sia nom won ewe an, sipwe tongeni tou seni non sokkun osukosuk—inamo ika epwe pochokun—me sia tongeni niwinsefan non kinamwe ngeni imwach non nang.
Ika mwo ekkewe fan nang mi pwenikich mei kurufat ika masoweni ekewe kuchu mi kiroch, ussun noun Jises Kraist kewe chon kaeo, iwe nge, oupwe fen ekieki ussun ewe muun Kot o kutta met a mochen oupwe fori, iwe epwe ngeni kemi ekkewe ekkoch mettoch meinisin (nengeni Matthew 6:33).
Met me auchean ew nesenin manau!
Ew me napenon ach chok ekieki ussun ach kewe riaffou, ach osukosuk, ach nukunukumang, me ach nuokus, pwan ina me napenon weiresin mettoch. Nge ew me napenon ach anonga ach ekiek won ach amuchunon neni non nang me won ewe pwapwan tapweno non anen ekkewe chon kaeo—tongei Kot, anisi chon oruch—a ina me ach sipwe tufichin ngaseno non fansoun osukosuk me mochunguchugun asapwan.
Chienei achengicheng, inamo ika ekkewe asapwanin winiaruch ra okurangarang, ewe kapas allimen Jises Kraist epwe awora ewe an mi mwirino ngeni ach sipwe sotiw non kinamwe non muun samach Kot non Nang.
© 2016 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/15. Kapungunon awewen: 6/15. Chiaku seni First Presidency Message, February 2016. Chuukese. 12862 901
Afanafan seni Ei Poraus
Preseten Uchtdorf a aitikich ach sipwe “apinukunuku Kot me nom won ewe anen chon kaeo ewe nongonongun ach pochokun.” Awora om kopwe eisini ekkewe ka aitir ifa ussun ar anonga ar ekiek “ won ach amuchunon neni non nang me won ewe pwapwan tapweno non anen ekkewe chon kaeo” non fansoun ra churi osukosuk. Ka tongeni tingorer ar repwe ekieki ussun ekkoch an ar repwe tongeni anonga ar ekiek won ar kapasen pwarata me won Kraist non fansoun weires me ioteki ar repwe ekieki ifa ussun met repwe fori ika pwe ra churi sossot weires non manauer.