iTukutuku ni Mataveiliutaki Taumada, FEPERUERI 2016
Tau Vakavinaka ena Ue
Sega soti ni dede, au a duri tu kei na watiqu, o Harriet, ena dua na iroro ni waqavuka ka sarava voli na nodra ro na waqavuka vakasakiti. E a siga cagicagi, ka sabaya na waqavuka basika tiko mai na cagi tataba, ka vakavuna vei ira yadua mera veimuayaki ka sakure donuya nodra basika.
Ni keirau vakadikeva na sasaga kaukauwa oqo ni veika bula kei na misini, a lesu noqu vakasama ki na noqu gauna ni vuli vuka kei na ivakavuvuli au vulica mai kina—ka vakatavulica kivei ira na pailate tale eso.
“Kakua ni vorata na veidusidusi donuya na ue,” au a dau kaya vei ira. “Toka vakamalua; kua ni tavaiyaya. Vakanamata voli ki na loma ni laini ena sala ni waqavuka. Kevaka o ceba tani mai na salatu o gadreva tiko, cakava na veivakadodonutaki matau sa vakarautaki. Nuitaka na sasagaka ni nomu waqavuka. Vodoka tani na ue.”
Era kila vakamatata na pailate matau ni na sega ni dau vakatau tu ga vei ira na veika e yaco wavoliti ira. E sega ni rawa ni ra na bokoca laivi na ue. E sega ni rawa ni ra vakayalia na uca se na waicevata. E sega ni rawa ni ra vakavuna na cagi me mudu na kena liwa se veimuayaki.
Ia era kila vakamatata talega ni sa cala me rerevaki na ue se cagi kaukauwa—vakabibi mera na vakamalumalumutaki mai kina. Na sala mo tau vakavinaka kina ni sega ni daumaka tu na ituvaki oya mo tu saraga ena mua dodonu kei na salatu dina ni vuka.
Niu sarava nodra sa basika mai na waqavuka yadua ka vakasamataka lesu na ivakavuvuli a vulici mai na noqu yabaki eso vakapailate, au vakananuma ke sega beka ni tiko e dua na lesoni ena ka oqo me baleta na noda bula e veisiga.
E sega ni rawa ni vakatau tu ga vei keda na cagi tataba eda sotava ena bula. So na gauna e sega ni na vaka na ka eda namaka na veika eso. Eda na rairai vakila ni da kuretaki ka cagina voli mai na ue ni lomaleqa, vakatitiqa, rere, yalorarawa, se nuiqawaqawa.
Ena gauna vakaoya, sa ka rawarawa meda vesuki tu ena ka kecega sa cala voli ka vakavuna na noda leqa me sa yaco me ilutua ni noda vakasama. Na veitemaki sa vakanamatataki ki na veivakatovolei eda sotakaya voli ka sega ena iVakabula kei na noda ivakadinadina.
Ia oya e sega ni sala vinaka sara meda lako curuma kina na noda bolebole ena bula.
Me vaka ga nona sega ni vakanamata tiko na pailate matau ki na cagi tataba ia ena maliwa ni sala ni waqavuka kei na idusidusi donu me ro kina, sa vakakina na noda vakanamata ki na maliwa ni noda vakabauta—noda iVakabula, Nona kosipeli, kei na ituvatuva ni Tamada Vakalomalagi—kei na noda icavacava ni takete—meda lesu vakavinaka ki na noda itikotiko vakalomalagi. Sa dodonu meda nuitaka na Kalou ka cakava na tiko voli ena mua ni bula vakatisaipeli na vakanamata ni noda sasaga. Sa dodonu meda vakanamatataka na matada, lomada, kei na vakasama ena sala eda kila vinaka meda bulataka.
Na ivakaraitaki ni noda vakabauta kei na vakanuinui vua na Tamada Vakalomalagi ena rekitaki ni muri ni Nona ivunau ena vakavurea vei keda na bula marau kei na lagilagi. Kevaka eda toka ga ena salatu, eda na lako curuma na ue cavaga—veitalia sara na kena kaukauwa—ka lesu vakavinaka ki na noda itikotiko vakalomalagi.
Se makare na maliwalala era wavoliti keda se ra vakatawani ena o veivakarerei, vaka-tisaipeli i Jisu Karisito, eda vakasaqara taumada na matanitu ni Kalou kei na Nona yalododonu, nida kila kevaka eda vakayacora vakakina, na ka kecega eda gadreva ena soli vakaidina (raica na Maciu 6:33).
Sa dua dina na lesoni bibi ni bula!
Na levu ni noda rawai ena noda sasaga dredre, noda vakatitiqa, kei na noda rere, na levu ni kena dredre na veika eso. Ia na levu ni noda vakanamata ki na noda icavacava ni itikotiko vakalomalagi kei na reki ni kena muri voli na salatu vakatisaipeli—lomana na Kalou, qarava na wekada—na levu ni noda qaqa ena lako curumi ni gauna eso ni leqa kei na ue.
Kemuni na veitokani, se vakacava sara na kena liwa wavoliti keda na cagi voravora ni noda bula vakayago, na kosipeli i Jisu Karisito ena vakarautaka tu ga na salatu vinaka sara ki na dua na itautau malumu ena matanitu ni Tamada Vakalomalagi.
© 2016 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/15. Vakadonui me vakadewa: 6/15. Vakadewa ni First Presidency Message, February 2016. Fijian. 12862 858
Veivakavulici mai na iTukutuku Oqo
Sa vakasalataki keda o Peresitedi Uchtdorf meda “nuitaka na Kalou ka cakava na tiko voli ena mua ni bula vakatisaipeli na vakanamata ni noda sasaga.” Navuca mo tarogi ira o vakatavulica ena iwalewale era sa tiko vakanamata “ena noda icavacava ni itikotiko vakalomalagi vata kei na reki ena muri ni salatu vakatisaipeli” ena gauna era sotava kina na veivakatovolei. O na rairai sureti ira mera vakasamataka na sala eso e rawa ni ra vakanamata kina ki na nodra ivakadinadina vakakina vei Karisito ena veigauna dredre ka mera navuca ena masumasu na iwalewale mera vakayacora kina e dua se sivia na vakasama oya ki na nodra bula.