Yut
Wan Fandesen blong Testemoni blong Mi
Man ia we i raet, i stap long Aedaho, YSA.
Taem mi bin gat 16 yia, wan fren i kam long hom blong mifala wetem ol misinari. Long wan manis nomo afta ol fasfala diskasen, evri kwestin blong mi oli bin ansarem i klia i gud. Mi filim Tabu Spirit i testifae se ol mesej abaot Gospel we i kambak oli tru. Neva mi bin filim wan samting olsem ia bifo, mo mi save se evri samting ia oli tru.
Be mi bin eksperiensem se plante oli no wantem mi mo agensem mi bitim fastaem. Mi filim se mi stap miwan, mi taed mo mi konfius. Sapos mi stap mekem samting we i raet, ?from wanem mi stap fesem tumas agens? Mi no save adastandem olsem wanem nao ol hadtaem blong mi oli blong gud blong mi. Ol misinari oli bin tijim mi blong livim kakae mo prea, iven long medel blong wan dei blong skul. Taem ol samting i kam had tumas blong mi tekem, mi prea wetem tru hat mo stret afta mi filim kamfot we i kam long Spirit.
Wik blong baptaes blong mi i bin fulap wetem ol tes. Bos blong mi i talem se bae hem i sakem mi long wok sapos mi no go tekem ples blong wan wokman we i no save kam long wok long taem ia, mi bin slip long hospitol from mi gat ston long kidni blong mi, mo papa mo mama blong mi oli askem mi blong aot long haos. Wetem plante samting we i aot long kontrol blong mi, wan samting ia nomo we mi save mekem, i blong lukluk i go long Lod.
Wanwan long ol tes ia i hapen blong gud blong mi. Oli helpem mi blong lanem ol doktrin blong gospel we i bin givim long mi, fandesen blong testemoni blong mi.