Fas Presidensi Mesej, Febwari 2016
Mekem Plen i foldaon gud long Taem Blong Strong Win
I no longtaem i pas, waef blong mi Hariet mo mi, i stap long eapot mo stap luk ol bigbigfala plen oli stap foldaon Win i blo bigwan long dei ia mo ol strong win oli stap fas long ol plen we oli stap kam, mekem se wanwan long olgeta i stap leilei mo seksek olbaot taem oli stap kam blong foldaon.
Taem mitufala i stap luk olsem wanem win i faet wetem wan masin, tingting blong mi i go bak long ol trening blong mi taem we mi stap lan blong flae mo ol prinsipol we mi bin lanem longwe - mo afta mi tijim ol nara paelot long taem blong trening.
“No fosem plen blong mekem wanem we yu wantem long medel blong taem blong strong win” mi bin stap talem long olgeta. “Yu stap kwaet; no mekem samting olbaot. Mekem ae blong yu i lukluk nomo long laen we i stap long medel blong kolda we plen bae i foldaon long hem. Sapos yu aot smol long rod we yu wantem foldaon long hem, wetem kea, stretem kwiktaem rod blong yu. Trastem wanem we plen blong yu i save mekem. Gohed blong flae kasem taem blong strong win ia i stop.”
Ol paelot we oli gat eksperiens, oli andastadem se, oltaem bae oli no save kontrolem ol samting we oli stap hapen raon long olgeta. Oli no save stopem ol strong win olsem ia nomo. Oli no save mekem ren o sno i kamaot Oli no save mekem win i stop blong blo o jenisim wea ples win i stap blo i go long hem.
Be oli adastandem tu se hem i wan mistek blong fraet long win o ol strong win, speseli blong no tekem wan aksen. Fasin blong tekem plen i go daon gud long ol nogud taem, i blong yu folem gud stret, olsem we yu save mekem, rod we yu stap flae folem.
Taem mi stap luk wan plen afta narawan i stap mekem rod blong hem blong i kam foldaon mo tingting bak long ol prinsipol we mi bin lanem long ol yia blong mi olsem wan paelot, mi stap tingting sapos i gat wan lesen long hemia blong ol evridei laef blong yumi.
Bae oltaem yumi no save kontrolem ol hariken we laef i putum long ol rod blong yumi. Samtaem ol samting i no folem isi nomo, wanem we yumi wantem. Maet bae yumi filim se strong win blong no filim gud, gat tu tingting, fraet, no glad o presa, i stap seksekem mo blo long yumi olbaot.
Long ol taem olsem ia, hem i isi blong ol nogud samting i kasem yumi mo mekem se tingting blong yumi i stap nomo long ol trabol blong yumi. Temtesen long ples ia, i blong tingting nomo long ol hadtaem we yumi stap fesem be i no long Sevya mo testemoni blong yumi long trutok.
Be hemia i no wei ia we i moa gud, blong faenem rod blong folem long ol jalenj blong yumi long laef.
Olsem wan eksperiens paelot we lukluk blong hem i no stap long strong win, be long medel blong kolda mo stret ples we plen bae i foldaon long hem, yumi tu lukluk blong yumi i mas stamba blong fet blong yumi-Sevya blong yumi, gospel blong Hem, mo plan blong Papa blong Yumi long Heven-mo stamba gol blong yumi - i blong gobak sef long ples blong yumi long heven. Yumi mas trastem God mo stap long rod blong stap olsem wan disaepol mo mekem hemia olsem stamba samting we yumi traehad from. Yumi mas kipim ae, hat mo maen blong yumi i stap nomo long laef folem wanem we yumi save se yumi mas laef folem.
Taem yumi stap soem fet mo tras long Papa long Heven tru long fasin blong stap kipim ol komanmen blong Hem wetem glad, hapines mo glori bae i kam long yumi. Mo sapos yumi stap long stret rod, bae yumi go tru long eni strong win-i nomata i strong olsem wanem - mo gobak sef long hom blong yumi long heven.
Nomata ol skae raon long yumi oli klia o fulap wetem dak klaod, olsem ol disaepol blong Jisas Kraes, fastaem yumi mas lukaotem kingdom blong God mo klin mo stret fasin blong hem, wetem save ia se sapos yumi mekem olsem, evri samting we yumi nidim bae yumi kasem (luk Matiu 6:33).
!Hemia i wan impoten lesen long laef!
Moa yumi tingting nomo long ol hadtaem blong yumi, ol traehad blong yumi, mo ol fraet blong yumi, ol samting oli save kam moa had. Be moa yumi lukluk nomo long heven olsem ples we yumi stap go from mo long ol glad blong stap folem rod blong wan disaepol - stap lavem God, givim seves long neiba blong yumi - moa bae yumi gat sakses blong faenem rod ia blong go tru long ol taem blong trabol mo long taem blong strong win.
Ol dia fren, nomata ol strong win blong laef long wol ia oli blo strong olsem wanem raon long yumi, gospel blong Jisas Kraes, oltaem, bae i givim rod ia we i moa gud blong yumi go bak sef long kingdom blong Papa blong Yumi long Heven.
© 2016 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/15. Oli letem translesen: 6/15. Translesen blong First Presidency Message, February 2016. Bislama. 12862 852
Yusum Mesej Ia blong Tij
Presiden Ukdof i givim kaonsel long yumi blong “trastem God mo stap long rod blong stap olsem wan disaepol mo mekem hemia olsem stamba samting we yumi hadwok from.” Maet bae yu wantem askem olgeta we yu tijim, olsem wanem lukluk blong olgeta i bin stap nomo long “heven olsem ples we yumi stap go from mo glad ia blong stap olsem wan disaepol” long taem we oli bin fesem ol hadtaem. Maet yu wantem invaetem olgeta blong tingting long ol wei we oli save lukluk nomo long testemoni blong olgeta mo long Kraes long ol taem we i had mo blong prea blong save olsem wanem blong mekem wan o tu tingting we i stap ia long ol laef blong olgeta.