Agtutubo
Maysa a Pundasion para iti Pammaneknekko
Agnaed ti nagsurat iti Idaho, USA.
Idi agtawenak iti 16, immay ti maysa a gayyem iti pagtaenganmi a kaduana dagiti misionario. Iti uneg ti makabulan ti umuna a paglilinnawagan, nasungbatan a silalawag ti amin a saludsodko. Nariknak a nagpaneknek ti Espiritu Santo maipapan iti kinapudno dagiti mensahe maipanggep iti Pannakaisubli. Kasla saan a maipada iti ania man a banag a nariknak idin, ken ammok a pudno amin daytoy.
Nupay kasta, napadasak ti ad-adda a pannakapadisi ken pannakasuppiat ngem idi kasakbayanna. Nariknak ti kinaagmaymaysak, nabannog, ken matiktikaw. No naaramidko met ti umno a banag, apay a maipaspasangoak iti adu a panagrigrigat? Diak maawatan idi nga agpaay a pagsayaatak dagiti pannubokko. Insuro idi kaniak dagiti misionario nga agayuno ken agkararagak, uray iti tengnga ti aldaw a panagklase. No diakon kabaelan nga ibturan dagiti banag ibukbokko no kua ti kaunggak ket dagus a mariknak ti panangliwliwa ti Espiritu.
Dayta a lawas a panagbuniagko ket napnuan iti pannubok. Binutbutengnak ti bossko nga ikkatennak iti trabahok no diak liklikan ti panagbuniagko ket adda maysa nga isukatna, idi agangay naospitalak gapu ta adda bato dagiti pantogko, ket kiniddaw dagiti nagannak kaniak a pumanawak iti pagtaenganmi. Gapu ta diakon makontrol dagiti adu a banag, ti laeng kakaisuna a maaramidko ket umasidegak iti Apo.
Tunggal maysa kadagita a pannubok ket nagbalin a pagsayaatak. Nakatulong dagitoy kaniak a makasursuro maipapan kadagiti doktrina ti ebanghelio, a nangipaay kaniak iti pundasion para iti pammaneknekko.