Mensahe ti Umuna a Panguluen, Pebrero 2016
Panagdisso a Sitatalged iti Daga iti baet ti Naungor a Panawen
Saan pay unay a nabayag addakami iti asawak a ni Harriet iti airport a mangbuybuya iti panagdisso iti daga dagiti nangangayed nga eroplano. Naangin nga aldaw idi ket pugpugsuan ti narungsot nga angin ti umas-asidegen nga eroplano, a mangigapu iti panagsuek ken panagbaribar ti tunggal maysa iti panaglandingda.
Bayat ti panangpalpaliiwmi iti daytoy a panagkarigatan iti nagbaetan ti nakaparsuaan ken makina, nalagipko ti mismo a panag-trainingko iti panagpatayab ken dagiti prinsipio a naadalko idiay—ket idi agangay insurok iti dadduma a piloto iti trainingda.
“Diyo ipapilit ti kayatyo nga aramiden ti eroplano iti naungor a panawen,” kunak kadakuada. “Agtalinaedkayo a kalmado; dikayo agdanag. Ipokusyo ti matayo iti nakasentro a linia ti runway. No sumiasika manipud iti tinarigagayam a papanan a dalan, agaramidka iti naannad a panagatur. Agtalekka iti kabaelan ti eroplanom. Pagtalinaeden a nakatayab ti eroplano agingga nga umawan ti angin.”
Maawatan dagiti addan padasna a piloto a saanda a kanayon makontrol dagiti banag a mapaspasamak iti lawlawda. Dida basta mapasardeng ti panagungor. Dida mabalin a pagpukawen ti tudo wenno niebe. Dida mabalin a pasardengen ti angin wenno isiasi ti turongenna.
Ngem maawatanda met a biddut a pagbutngan ti panagungor wenno napipigsa nga angin—ken nangnangruna ti saan a pannakabael nga agaksion gapu kadagitoy. Ti wagas tapno makapagdisso ti eroplano iti daga a sitatalged no saan a nasayaat dagiti kasasaad ket ti panagtalinaed iti umisu a dalan ti eroplano agingga a mabalin.
Bayat ti panangbuybuyak iti maysa nga eroplano kalpasan ti kaudian a panagdissona a kasaruno ti maysa pay ken nalagipko dagiti prinsipio a naadalko manipud kadagidi tawenko kas maysa a piloto, napanunotko no awan ngata ti leksion iti daytoy para iti aginaldaw a panagbiagtayo.
Ditayo kabaelan a pengdan dagiti bagyo a masarangettayo iti dalantayo. No dadduma saan a mapasamak dagiti banag a kayattayo a pagbalinanda. Maburiborantayo kadagiti rigat ti pannakapaay, panagduadua, panagbuteng, panagliday, wenno pannaka-stress.
Bayat dagita a panawen, nalaka a mairaman iti amin a banag nga agbalin a dakes ken nakapamaysa iti panunottayo dagiti riribuktayo. Ti sulisog ket agpokus kadagiti pannubok a pakaipaspasanguantayo imbes nga agpokustayo iti Mangisalakan ken ti pammaneknektayo iti kinapudno.
Ngem saan a dayta ti kasayaatan a wagas tapno malisiantayo dagiti pannubok iti biag.
Kas iti panangpatalinaed iti pokusna ti addan padasna a piloto saan nga iti bagyo no di iti sentro ti runway ken ti umno a punto ti pagdissuan ti eroplano, tapno makapagpokustayo iti sentro ti pammatitayo—ti Mangisalakantayo, ti ebangheliona, ken ti plano ti Nailangitan nga Amatayo—ken iti kangrunaan a panggeptayo a tun-oyen—makapagsubli a sitatalged iti nailangitan a pagtungpalantayo. Nasken nga agtalektayo iti Dios ken agpokustayo iti panagaramid kadagiti banag a nasken nga aramiden ti maysa a disipulo. Pagtalinaedentayo ti mata, puso, ken panunottayo iti panagbiag iti wagas nga ammotayo a nasken.
Ti panangipakitatayo iti pammati ken panagtalektayo iti Nailangitan nga Ama babaen ti panagtungpaltayo a sirarag-o kadagiti bilinna ket mangyeg kadatayo iti ragsak ken gloria. Ket no agtalinaedtayo iti dalan, marimbawantayo ti ania man a panangungor—kasano man ti kapigsa daytoy—ket makasublitayo a sitatalged iti nailangitan a pagtaengantayo.
Nalawag man dagiti tangatang iti aglawlawtayo wenno napno man daytoy iti napuskol nga ulep, kas disipulo ni Jesucristo, sapulentayo nga umuna ti pagarian ti Dios ken ti kinalintegna, iti pannakaammo a no aramidentayo daytoy, amin a banag a kasapulantayo ket maitedto iti kamaudianan (kitaen iti Mateo 6:33).
Anian a napateg a leksion ti biag!
Ti ad-adda a panangipokustayo iti rigrigattayo, iti panagkarigatantayo, iti duaduatayo, ken iti panagbutengtayo, ad-adda met a narigrigat ti pagbalinan dagiti banag. Ngem ti ad-adda a panangipokustayo iti maudi a nailangitan a papanantayo ken dagiti rag-o iti panangsurot iti dalan ti disipulo—panagayat iti Dios, panagserbi iti pada a tao—ad-adda met a naballigiantayo nga agibtur kadagiti panawen ti riribuk ken panagungor.
Patpatgek a kakabsat, kasano man ti kinarigat ti panagbiagtayo, ti ebanghelio ni Jesucristo ti kanayon a mangidiaya iti kasayaatan a dalan iti natalged a panagdissotayo iti pagarian ti Nailangitan nga Amatayo.
© 2016 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/15. Pannakaanamongna a maipatarus: 6/15. Pannakaipatarus ti First Presidency Message, February 2016. Ilokano. 12862 864
Panangisuro manipud iti Daytoy a Mensahe
Balakadannatayo ni Presidente Uchtdorf nga “agtalek iti Dios ken agtalinaed iti dalan ti kinadisipulo a mangipamaysa kadagiti aramidtayo a panagkagumaan.” Pagsaludsodam dagiti sursuruam no kasano a nakapagtalinaedda a nakapokus “iti maudi a nailangitan a pagtungpalantayo ken kadagiti rag-o ti panagsurot iti dalan ti kinadisipulo” kadagiti panawen a naipasangoda kadagiti pannubok. Mabalinmo ida nga awisen a mangpanunot kadagiti wagas a makapagpokusda iti pammaneknekda ken makapagpokusda ken Cristo kadagiti narigat a kanito ken sikakararag nga ikeddengda no kasano nga ipatungpalda ti maysa wenno ad-adu pay kadagita a kapanunotan iti panagbiagda.