Mensahe iti Visiting Teaching, Pebrero 2016
Inordenan ti Dios ti Kallaysa
Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawatyo iti “Ti Kaamaan: Maysa a Waragawag iti Lubong” ket mangpadakkel iti pammatiyo iti Dios ken mangbendision kadagiti ay-aywananyo babaen ti visiting teaching? Para iti ad-adu pay nga impormasion, mapan iti reliefsociety.lds.org.
Pammati • Pamilia • Tulong
Itultuloy dagiti propeta, apostol, ken dadaulo a “sipapasnek a mangipakdaar nga inordenan ti Dios ti panagkallaysa ti lalaki ken ti babai ken ti kaamaan ti kangrunaan iti plano ti Namarsua.”1
Ni Elder D. Todd Christofferson ti Korum dagiti Sangapulo-ket-dua nga Apostol kinunana: “Ti maysa a kaamaan a nabuangay iti kallaysa ti maysa a lalaki ken ti maysa a babai ket mangipaay iti kasayaatan a pagyanan tapno dumur-as ti plano ti Dios. …
“… Awan kadatayo wenno ti asino man a mortal ti makapagbalbaliw iti daytoy a nadiosan nga urnos ti kallaysa.”2
Ni Bonnie L. Oscarson, sapasap a presidente ti Young Women, kinunana: “Tunggal maysa, ania man ti kasasaadda iti panagasawa wenno bilang dagiti annak, ket makapagbalin a salaknib iti plano ti Apo a nailadawan iti waragawag ti kaamaan. No plano ti Apo daytoy, nasken a daytoy met ti agbalin a planotayo”3
Intuloy ni Elder Christofferson: “Sumagmamano kadakayo ti napaidaman iti bendision ti kallaysa gapu iti kinaawan namnama, panagrayo iti kapada iti katatao, kaadda ti pagkurangan iti bagi wenno panunot, wenno kaadda iti panagamak a mapaay. … Wenno mabalin a nagasawakayo, ngem naggibus dayta a panagasawa. … Sumagmamano kadakayo a naasawaan ti saan a makaipasngay kadagiti ubbing. …
“Uray pay no kasta, … makatulong ti tunggal maysa iti pannakapasamak ti nadiosan a plano iti tunggal henerasion.”4
Dagiti it Mainayon a Nasantuan a Kasuratan
Genesis 2:18–24; 1 Taga Corinto 11:11; Doktrina ken Katulagan 49:15–17
Estoria dagiti Sibibiag
Ni Kabsat a Larry M. Gibson, sigud nga umuna a mammagbaga iti sapasap a panguluen ti Young Men, nalagipna idi imbaga ni Shirley, asawana itan:
“‘Ay-ayatenka gapu ta ammok nga ad-adda nga ay-ayatem ti Apo ngem siak.’ …
“Nagsalpot iti pusok dayta a sungbat. …
“… [Ket] kayatko a kanayon a mariknana nga ay-ayatek ti Apo a kangrunaan iti amin.”5
Insuro ni Elder David A. Bednar ti Korum dagiti Sangapulo-ket-dua nga Apostol: “Ni Apo Jesucristo ti kangrunaan a paset ti relasion iti panagasawa iti katulagan. … [Panunoten a] nakapuesto ti Mangisalakan iti tuktok ti [maysa] a trayanggulo, nga adda ti maysa a babai iti pagbatayan ti maysa a suli ken ti maysa a lalaki iti pagbatayan ti sabali pay a suli. Ita panunoten no ania ti mapasamak iti relasion ti nagbaetan ti lalaki ken ti babai bayat ti panagtultuloy a ‘yaasidegda ken ni Cristo’ ken mangikarigatan nga agbalinda a ‘naan-anay Kenkuana’ (Moroni 10:32). Gapu ken babaen ti Mannubbot, ad-adda nga agassideg ti lalaki ken ti babai.”6
© 2016 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/15. Pannakaanamongna a maipatarus: 6/15. Pannakaipatarus ti Visiting Teaching Message, Pebrero 2016. Ilokano. 12862 864
Ibilang Daytoy
Kasano nga agmaymaysaak ken agtultuloyak a mangikarigatan nga “umasideg ken ni Cristo”?