Visiting Teaching Amandzɛɛbɔ, Ebɔw 2016
Wɔbɔɔ wo Nyankopɔn no Su Do
Mpaabɔ mu ara sũa adzesũadze yi na hwehwɛ dɛ ibohu dza ibɛkyɛ. Eretse “Ebusua No: Dawurbɔ a wɔdze ma Wiadze” ase no besi dɛn bɛma wo Gyedzi wɔ Nyankopɔn mu enyin na woehyira hɔn a idua visiting teaching do ehwɛ hɔn do no? Ho nsɛm mbordo no, kɔ reliefsociety.lds.org.
Gyedzi, Ebusua, Mboa
“Na Nyankopɔn see dɛ, Wɔmma yɛnyɛ nyimpa wɔ hɛn su do, wɔ hɛn saso do. …
“Na Nyankopɔn bɔɔ nyimpa wɔ nankasa no su so do, Nyankopɔn no su do na ɔbɔɔ no; ɔbɔɔ hɔn ɔbanyin nye ɔbaa” (Genesis 1:26–27)
Nyankopɔn yɛ hɛn Ɔsor Egya, na Ɔbɔɔ hɛn wɔ No su do. Nokwar yi ho no, President Thomas S. Monson kãa dɛ: “Nyankopɔn hɛn Egya wɔ asowa a Ɔdze tsie hɛn mpaabɔ. Ɔwɔ enyiwa a Ɔdze hu hɛn ndzeyɛɛ. Ɔwɔ ano a Ɔdze kãsa kyerɛ hɛn. Ɔwɔ akoma ɔdze tse ayamuhyehye na Ɔdze dɔ. Ɔwɔ hɔ ampara. Ɔtse ase. Yɛyɛ ne mba wɔyɛɛ hɛn wɔ no su do. Yɛnye no sɛ na ɔnye hɛn sɛ.”1
“Nda a Odzi ekyir Ahotseweefo hu nyimpa nyina dɛ Nyankopɔn ne mba ankasa wɔ biribira mu; wosusu dɛ nyimpa biara wɔ fibea, awosu, na ndaamba krɔnkrɔn.”2 Kor biara yɛ “sor awofo hɔn sunsum mu dɔ babanyin anaa babaa.”3
“[Nkɔnkyɛnyi] Joseph Smith no so sũaa dɛ Nyankopɔn pɛ dɛ Ne mba nya asetsena a ɔkrɔn kor noara a Ɔno ɔwɔ mu no.”4 Dɛ mbrɛ Nyankopɔn kãe no, “Na hwɛ, iyi nye m’edwuma na m’enymnyam—dɛ medze nyimpa ne bɛkyebo na onnyiewiei nkwa bɔbɔ adze” (Moses 1:39).
Kyerɛwsɛm a Ɔkã ho
Genesis 1:26–27; 1 Corinthfo 3:17; Nkyerɛkyerɛ na Ahyɛmudzi 130:1
Fi Kyerɛwsɛm no mu
Jared no nuabanyin a ɔwɔ Mormon Nwoma mu no hwehwɛɛ kwan a wɔdze kan bɛba ahɛn awɔtwe no a wɔpaam dɛ ɔdze Jaredfo no botwa esu no akɔ anohoba asaase no do. “Ɔnaan abotan no bi yii mboba nkakraba duesia fii mu” na ɔbɔɔ mpaa dɛ Nyankopɔn mfa Ne nsatseaba “[n]kã abo yi, … ama wɔaahyerɛn wɔ sum mu.” Na Nyankopɔn “tseen ne nsa na ɔdze ne nsatseaba kãa abo no nkorkor.” Na woyii ntwamutam no a ɔkata Jared no nuabanyin n’enyido no, na “ohun Ewuradze ne nsatseaba; na ɔtse dɛ nyimpa ne nsatseaba. …
“Na Ewuradze see no dɛ: Ana ebɛgye nsɛm a mebɛkã yi edzi?
“Na obuaa dɛ: Nyew, Ewuradze.”
Na “Ewuradze yii noho kyerɛɛ [Jared no nuabanyin]” na ɔsee dɛ, “Ehu dɛ wɔbɔɔ wo ma mankasa me saso? Nyew, wɔbɔɔ nyimpa nyina ahyɛse no wɔ mankasa me saso.” (Hwɛ Ether 3:1–17.)
© 2016 Intellectual Reserve, Inc. Wɔakora ho tumdzi nyina. USA na wotsintsimii. Ngyirisi kasa ho mpendo: 6/15. Nkyerɛasee ho mpendo: 6/15. Visiting Teaching Message, March 2016 ne Nkyerɛasee. Fante. 12863 502
Susu Iyi Ho
Sɛ yenyim dɛ nyimpa kor biara wɔbɔɔ no wɔ Nyankopɔn ne nsaso do a, obesi dɛn aboa hɛn wɔ yɛnye binom nkitahodzi ho?