President a Odzi Kan na n’Apamfo Amandzɛɛbɔ, Ebɔw 2016
“Hom Nsũa Me”
President Thomas S. Monson kãe
Jesus Christ n’Asɔr a ɔwɔ hɔ ma Nda a Odzi Ekyir Ahotseweefo mu no, hɛn nyina yɛyɛ akyerɛkyerɛfo na adzesũafo. Ɔfrɛ bɔkɔɔ yi fi hɛn Ewuradze hɔ ba hɛn nyina hɔ: “Hom nsũa me … na hom benya ahomgye ama hom akra.”1
Moto nsa frɛ Nda a Odzi Ekyir Ahotseweefo nyina dɛ wɔndwendwen hɔn mbɔdzembɔ a wɔdze kyerɛkyerɛ ho na wonsũa na wɔnhwɛ Agyenkwa no dɛ hɛn Kwankyerɛfo wɔ ne nyɛe mu. Yenyim dɛ onyia “ifi Nyankopɔn nkyɛn na aba dɛ kyerɛkyerɛfo no”2 bor dɛ ɔyɛ kyerɛkyerɛnyi ara. Ɔno a ɔkyerɛkyerɛɛ hɛn dɛ yɛmfa hɛn akoma nyina, hɛn akra nyina, hɛn ahoɔdzen nyina, na hɛn ahom nyina ndɔ Ewuradze hɛn Nyankopɔn no, na yɛndɔ hɛn nyɛnko dɛ hɛnara hɛnho no, nye Kyerɛkyerɛfo Pa no, na emudzi abrabɔ no ne Fasusu no.
Ɔno na ɔpaa mu kãa dɛ: “Bra bɛka mo do.”3 “Mayɛ fasusu ama hom.”4
Gyedɛ Hom Dan
Jesus kyerɛkyerɛɛ nokwar trɔdɔdɔɔ a ɔda famu ara yie a wɔakyerɛw no wɔ Matthew nwoma mu. Ɔnye N’esuafo sianee fii Nsakyeree Bepɔw do no ekyir no, wɔhomee wɔ Galilee na afei wɔkɔr Capernaum. Hɔ na esuafo no baa Jesus nkyɛn, bisaa dɛ:
“Woana na ɔyɛ kɛse wɔ sor ahenman no mu?
“Na Jesus frɛɛ abofraba baa ne nkyɛn, na ɔdze no sii hɔn finimfin,
“Na ɔsee dɛ, Nokwar mese hom dɛ, Gyedɛ hom dan, na hom yɛ dɛ mbofraba, ɔno hom runntum nnhɛn Nyankopɔn ahenman no mu da.”5
Asɔr no mu no, nnyɛ asɛmpa nkyerɛkyerɛ no botae nye dɛ ibohue nsɛm egu Nyankopɔn ne mba hɔn adwen mu, wɔ fie o, adzesũa dan mu o, anaa wɔ asɛmpakã mbew do. Nnyɛ dɛ ibɛkyerɛ mbrɛ ɔwofo, kyerɛkyerɛnyi anaa asɛmpasomafo nyim dodow bi a. Nna ɔnnyɛ dɛ nyimdzee wɔ Agyenkwa no na N’Asɔr ho bɔdɔɔsõ ara.
Adzekyerɛ no botae fapem nye dɛ ibɔboa Ɔsor Egya ne mba mbanyin na mbabaa ma wɔasan akɔ Ne nkyɛn na wɔnye No enya onnyiewiei nkwa mu enyigye. Ama wɔayɛ iyi no, otwar dɛ asɛmpa adzekyerɛ no hyɛ hɔn nkuran wɔ daa daa osuanyiyɛ ndwuma na ahyɛmudzi krɔnkrɔn anamɔn kwan ho. Yɛhwɛ kan dɛ yebekenyan ankorankor ma wɔadwen ho, wɔatse ho nkã, na nkyii wɔakekã hɔnho dze asɛmpa fapem no abɔ bra. Botae no nye dɛ obenya gyedzi wɔ Ewuradze Jesus Christ mu na ɔadan aba N’asɛmpa ho.
Adzekyerɛ a ohyira na ɔsakyer na ɔgye nkwa nye adzekyerɛ a ɔhwɛ Agyenkwa no ne fasusu. Akyerɛkyerɛfo a wɔhwɛ Agyenkwa no ne fasusu no wɔdɔ hɔn a wɔkyerɛkyerɛ hɔn no na wɔsom hɔn. Wɔdze daapem adzesũadze ho nokwar krɔnkrɔn no kenyan hɔn etsiefo. Wɔbɔ bra a ɔfata dɛ nkaafo sũa.
Hom Ndɔ na Hom Nsom.
Agyenkwa no no somdwuma nyina kyerɛɛ nyɛnko ho dɔ fasusu. Nokwar, nna adzesũadze a Ɔkyerɛkyerɛɛ no taa yɛ No dɔ na No som. Dɛmara so, akyerɛkyerɛfo a mekaa hɔn yie no nye akyerɛkyerɛfo a wonyim hɔn adzesũafo, wɔdɔɔ hɔn na wɔdween hɔn ho. Wɔhwehwɛɛ nguan a wɔayew no. Wɔkyerɛkyerɛɛ abrabɔ adzesũadze a mebɛkãa no daa.
Nna kyerɛkyerɛnyi kor a ɔtse dɛm nye Lucy Gertsch. Nna onyim n’adzesũafo no hɔn mu kor biara. Hɔn a Kwesida bi wenntum ammba anaa hɔn a ɔammba ara no, ɔkɛseraa hɔn nyinara. Nna yenyim dɛ ɔdwen hɛn ho. Hɛn mu biara no werɛ mmfirii no anaa adzesuadze a ɔkyerɛkyerɛɛ no.
Mfe pii ekyir no a nna Lucy n’abrabɔ reba ewiei no, mekɛseraa no. Yɛkaakaa mber no a ɔabɛsen dadaada no, ber a nna ɔyɛ hɛn kyerɛkyerɛnyi no. Yɛkasaa faa hɛn adzesũafo kuw no mu kor biara ho, na yɛpɛnsapɛnsa dza kor biara reyɛ no sesieara. No dɔ na mbrɛ ɔdwen hɛnho no tserɛɛw mber tsentsen.
Modɔ Ewuradze n’afotusɛm a yehu no wɔ Nkyerɛkyerɛ na Ahyɛmudzi mu no:
“Na mbrasɛm a medze ma hom nye dɛ hom mfa ahenman ne nkyerɛkyerɛ no nkyerɛkyerɛ hom ho nkorkor.
“Hom nkyerɛkyerɛ enyiber do na m’adom bɛba hom do.”6
Lucy Gertsch kyerɛkyerɛɛ enyiber do osian no dɔ mbordo no.
Hom Mma Enyidado na Nokwar.
Ɔsomafo Paul tuu fo dɛ, “Hom nsiesie homho daa dɛ hom beyi ano akyerɛ obiara a obisa hom enyidado a ɔwɔ hom mu no ase.”7
Ebia enyidado kɛsenara a kyerɛkyerɛnyi botum dze ama nye enyidado a wohu no wɔ Jesus Christ asɛmpa no nokwar mu ho.
“Na ɔyɛ ebɛnadze na hom benya enyidado wɔ mu?” Mormon bisae. “Hwɛ mese hom dɛ hom benya enyidado efi Christ no werdambɔ nye no wusoɛr tum no mu, dɛ hom bɔsoɛr akɔ onnyiewiei nkwa mu, osian hom gyedzi a ɔwɔ no mu wɔ anohoba a ɔdze abɔ hom no ntsi.”8
Akyerɛkyerɛfo, hom ma hom ndze do na hom ngye dase wɔ Nyametsir no nokwar su ho. Hom mpaa mu ngye hom dase mfa Mormon Nwoma no ho. Hom mma nokwar krɔngyenn no a ɔyɛ enyimnyam a ɔwɔ nkwagye nhyehyɛɛ no mu no nda edzi. Hom mfa Asɔr-ndzɛmba a wɔagye ato mu, tsitsir ara kyerɛwsɛm no, nkyerɛkyerɛ Jesus Christ asɛmpa nsan-ananmu no nokwar horow no, wɔ ahotsew na ne pefeeyɛ mu. Hom nkaa Agyenkwa no n’afotusɛm dɛ “hom [n]hwehwɛ kyerɛwsɛm no mu; osiandɛ hom susu dɛ yinom mu na hom wɔ onnyiewiei nkwa: naaso yinom nye dza wɔgye mo ho dase.”9
Boa Nyankopɔn ne mba ma wɔntse dza ɔyɛ nokwar na ohia tsitsir wɔ abrabɔ yi mu no ase. Boa hɔn ma wonya ahoɔdzen dɛ wɔbɛsan mu afa anamɔn kwan a obegya hɔn dwudwoodwo akɔ onnyiewiei nkwa kwan ho.
Fa nokwar kyerɛkyerɛ, na Sunsum Krɔnkrɔn no bɔboa wo mbɔdzembɔ.
“Hom Nsũa Me”
Osiandɛ Jesus Christ yɛɛ setsie a odzi mu maa N’Egya na ɔbrɛɛ noho adze ntsi, “Ɔkɔr kan wɔ nyansa nye tsipɛn mu, na Nyankopɔn nye nyimpa hɔ enyimpa mu.”10 Ana yɛwɔ enyimpi no a yɛdze bɛyɛ dɛmara a? Tse dɛ Jesus “onyae fii adom mu kɔr adom mu,”11 no, otwar dɛ abotar mu ara yɛwɔwdo hwehwɛ kan na nyimdzee fi Nyankopɔn hɔ wɔ hɛn mbɔdzembɔ dɛ yebosũa asɛmpa no.
Yɛretsie obi yɛ adzesũa mu adzehia tsitsir. Sɛ yɛreyɛ ahosiesie ma wɔakyerɛ hɛn adze a, mpaabɔ mu ara yɛhwehwɛ nkenyan na pisi fi Sunsum Krɔnkrɔn no hɔ. Yɛdwendwen ho, yɛbɔ mpaa, yɛdze asɛmpa adzesũadze horow no bɔ bra, na yɛhwehwɛ Egya no Ne pɛ a Ɔwɔ ma hɛn no.12
Jesus “kyerɛkyerɛɛ … ndzɛmba pii wɔ mbɛbu mu,”13 a ohia asowa a wɔdze tsie, enyiwa a wɔdze hwɛ, na akoma a wɔdze tse ase Ber a yɛbɔ bra emudzi mu no, yebotum atse Sunsum Krɔnkrɔn no n’awɔse no yie, a obotum “akyerɛkyerɛ [hɛn] ndzɛmba nyina, na ɔbɛkaa [hɛn] ndzɛmba nyina.”14
Sɛ yɛgye Ewuradze ne nsato bɔkɔɔ no do dɛ, “Hom nsũa me” a, yɛbɛyɛ No tum krɔnkrɔn no mu adzedzifo. Dɛm ntsi, hom mma yɛnkɔ kan wɔ setsie sunsum mu a, yeridzi hɛn Fasusu mapã ekyir ber a yɛrekyerɛkyerɛ dɛ mbrɛ nkyɛ Ɔbɛma yɛakyerɛkyerɛ na yerusũa adze dɛ mbrɛ nkyɛ Ɔbɛma yesũa adze no.
© 2016 Intellectual Reserve, Inc. Wɔakora ho tumdzi nyina. USA na wotsintsimii. Ngyirisi kasa ho mpendo: 6/15. Nkyereasee ho mpendo: 6/15. First Presidency Message, March 2016 ne Nkyerɛasee. Fante. 12863 502
Erekyerɛkyerɛ efi Amandzɛɛbɔ Yi Mu
President Monson to nsa frɛ hɛn dɛ “yɛndwendwen [hɛn] mbɔdzembɔ ho dɛ yɛbɛkyerɛkyerɛ na yesũa na yɛahwɛ Agyenkwa no dɛ hɛn Kwankyerɛfo wɔ ne nyɛe mu.” Ibotum esusu nye hɔn a esera hɔn no ahwehwɛ kyerɛwsɛm no mu dze enya nhumu wɔ akwan horow a Jesus Christ duaa do dze kyerɛkyerɛe na Ɔdze sũaa adze. Ibotum edze kyerɛwsɛm no bi a President Monson dze yɛɛ ntõtõho no ahyɛ ase, tse dɛ Matthew 11:29, John 5:30, na Mark 4:2. Ibotum apɛnsapɛnsam mbrɛ dza hom esũa wɔ Jesus Christ ho no botum bɔboa hom ma “[hom] abɛyɛ No tum krɔnkrɔn no n’adzedzifo.”