iVaqa ni Veisiko, Maji 2016
Buli me Ucuya na Kalou
Vulica ena masumasu na itukutuku oqo ka vakasaqara mo kila na ka mo na wasea. E rawa vakacava na kilai vakamatata ni “Na Matavuvale: Ai Vakaro ki Vuravura Raraba” me vakalevutaka na nomu vakabauta na Kalou ka vakalougatataki ira o vakaraica voli ena veisiko? Me ikuri ni itukutuku, lako ki na reliefsociety.lds.org.
Vakabauta, Matavuvale, Veivukei
“A sa kaya na Kalou, Me datou bulia na tamata mei tovo vata kei kedatou, ka me ucui kedatou. …
“A sa bulia na tamata na Kalou mei tovo vata kei koya, e nai tovo ni Kalou sa buli koya ko koya; na tagane kei na yalewa sa buli rau ko koya” (Nai Vakatekivu 1:26–27).
Na Kalou sa Tamada Vakalomalagi, ka sa buli keda meda itovo vata kei Koya. Ena dina oqo, a kaya o Peresitedi Thomas S. Monson: “Sa vakadaligana na Kalou na Tamada me rogoca kina na noda masu. Sa vakamatana o Koya me raica kina na noda cakacaka. Sa vakagusuna o Koya me vosa kina vei keda. Sa vakayalo o Koya me vakila kina na kauwai kei na loloma. Sa tiko vakaidina o Koya. Sa bula tiko o Koya. Eda sa luvena ka caka meda itovo vata kei koya. Na keda irairai sa vakataki koya ka sa vakataki keda na kena irairai.”1
“Era raici ira kece na tamata na Yalododonu Edaidai me luvena na Kalou ena vakasama vakataucoko saraga; era okata me vakalou na tamata yadua ena ituvaki, ivalavala, kei na sasaga.”2 Oi keda yadua “eda sa luvedrau tagane se yalewa lomani vakayalo na noda itubutubu vakalomalagi.”3
“[Na Parofita] o Josefa Simici a vulica talega ni sa gadreva na Kalou mera ciqoma na Luvena na mataqali bula veivakacerecerei vataga e vakayagataka voli o Koya.”4 Me vaka e kaya na Kalou, “Raica, oqo na inaki kei na lagilagi ni noqu cakacaka—io me ra tucake tale mai na mate na tamata kece ga ka rawata na bula tawamudu” (Mosese 1:39).
iKuri ni iVolanikalou
Nai Vakatekivu 1:26–27; 1 Korinica 3:17; Vunau kei na Veiyalayalati 130:1
Mai na iVolanikalou
Na taci Jereti ena iVola i Momani a saga e dua na sala me vakararamataki kina na walu na waqa ka nanumi me na kauti ira takoso na Jereti ena wasawasa ki na vanua yalataki. E “vakawaicalataka kina e dua na vatu levu ka bulia mai kina e tinikaono na vatu lalai” ka masuta na Kalou me “tara mada na vatu oqo” ena Nona iqaqalo “me serau mai ena butobuto.” Na Kalou sa “dodoka mai na ligana ka tara na vatu yadua.” A sa lau na mata i taci Jereti, ka “raica na iqaqalo ni liga ni Turaga; raica sa vaka ga na iqaqalo ni liga ni tamata. …
“A sa kaya vua na Turaga: Ko sa vakabauta li na noqu vunau?
“A sa kaya: Io, Turaga.”
Sa qai “vakaraitaki koya na Turaga ki [na taci Jereti]” ka kaya, “Ko sa qai kila ni ko a buli mo ucui au? Raica, sa buli na tamata kece ga mai na ivakatekivu me ucui au.” (Raica na Ica 3:1–17.)
© 2016 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/15. Vakadonui me vakadewa: 6/15. Vakadewa ni Visiting Teaching Message, March 2016. Fijian. 12863 858
Vakasamataka Oqo
E vukei keda vakacava ena noda veimaliwai vata kei ira tale eso na kena kilai ni tamata yadua e sa buli me ucuya na Kalou?