iTukutuku ni Mataveiliutaki Taumada, Maji 2016
“Dou Vuli vei Au”
Mai vei Peresitedi Thomas S. Monson
Ena Lotu i Jisu Karisito ni Yalododonu Edaidai, eda sa qasenivuli taucoko ka da dauvuli taucoko. Vakataucoko sa lako mai vei keda na veisureti malumu oqo mai vua na Turaga: “Vuli vei au … dou na kunea kina na vakacegu ni yalomudou.”1
Au sureta taucoko na Yalododonu Edaidai mera vakasamataka vagumatua na nodra sasaga ni veivakatavulici ka vuli ni rai kivua na iVakabula me noda Dauveituberi ni caka vakakina. Eda kila ni “vakavuvuli sa lako mai vua na Kalou”2 e sa levu cake mai na dua ga na qasenivuli. O Koya ka vakatavulici keda meda lomana na Turaga na noda Kalou ena yaloda taucoko, na lomada taucoko, noda kaukauwa taucoko, kei na noda vakasama kecega, ka lomani ira na kainoda me vakataki keda, e sa Qasenivuli Levu Duadua ka sa Daunivakaraitaki ni bula vinaka sara.
Sa ikoya ka a cauraka: “Lako mai, mo muri au.”3 “Au sa laiva vei kemudou na ivakarau mo dou muria.”4
Kevaka Dou sa Sega ni Saumaki Mai
A vakatavulica o Jisu e dua na dina rawarawa ka momona me vaka e volai ena Maciu. Ni oti na Nona siro sobu mai na Ulunivanua ni Veivakamataliataki vata kei ira na Nona tisaipeli, era a cegu e Kalili ka qai gole ki Kapenaumi. Era qai lako mai vei Jisu na tisaipeli ekea, ka taroga:
“Ko cei sa levu cake ena matanitu vakalomalagi?
“A sa kaciva mai e dua na gone lailai ko Jisu, ka vakatura ena kedra maliwa,
“Ka sa kaya, Au sa kaya vakaidina vei kemudou, Kevaka dou sa sega ni saumaki mai, ka yaco me vaka na gone lailai, dou na sega sara ni curu ki na matanitu vakalomalagi.”5
Ena Lotu, na takete ni vakatavulici ni kosipeli e sega ni kena vakatawani na itukutuku ki na nodra vakasama na luve ni Kalou, se ena itikotiko, e koronivuli, se ena buturara ni kaulotu. E sega ni kena vakaraitaki na levu ni ka e kila tu na itubutubu, qasenivuli, se daukaulotu. Se ena kena vakalevutaki na kilaka me baleta na iVakabula kei na Nona Lotu.
Na takete matau ni veivakatavulici oya na nodra vukei na luvena tagane kei na yalewa na Tamada vakalomalagi mera lesu tale ki na Nona iserau ka marautaka vata kei Koya na bula tawamudu. Me caka oqo, sa dodonu na vakatavulici ni kosipeli me vakayaloqaqataki ira ena salatu vakatisaipeli kei na veiyalayalati tabu e veisiga. Na nakinaki oya me vakauqeta na tamata yadua me vakasamataka, vakila, ka qai cakacakataka na bulataki ni ivakavuvuli ni kosipeli. Na inaki oya me taracake na vakabauta vua na Turaga o Jisu Karisito ka saumaki rawa ki na Nona kosipeli.
Na veivakatavulici e veivakalougatataki ka veisaumakiti ka veivakabulai e sa veivakatavulici e vakatatamuria na ivakaraitaki ni iVakabula. Na qasenivuli era vakatatamuria na ivakaraitaki ni iVakabula era lomani ka qaravi ira era vakatavulica. Era vakauqeta na nodra dauvakarorogo ena veilesoni tawamudu ni dina vakalou. Era bulataka na bula e so sa kilikili me vakatatamuri.
Lomana ka Qarava
Na ilesilesi taucoko ni iVakabula sa ivakaraitaki ni loloma vakaveiwekani. E dina, na Nona loloma kei na veiqaravi e sa dau Nona lesoni tu ga. Ena ivakarau vataga, o ira na qasenivuli kau nanuma vinaka sara sai ira na qasenivuli ka kilai, lomani, ka kauwaitaki ira na nona gonevuli. Era a vakasaqara na sipi yali tu. Era vakatavulica na veilesoni ni bula au na dau nanuma tu ga.
Dua na qasenivuli vakaoya o Lucy Gertsch. E kilai ira yadudua na nona gonevuli o koya. Ena sega ni guce me lakovi ira era dau calata e dua na Sigatabu se o ira era sega ga ni lako mai. Keimami kila ni dau kauwaitaki keimami o koya. E sega ni dua vei keimami e bau guilecavi koya se na lesoni a vakavulica.
Ni oti e vuqa na yabaki, ni mai volekata voli o Lucy ni cava ni nona bula, au a laki sikovi koya. Keirau a veitalanoataka tale na veigauna o ya ena gauna sara a se neimami qasenivuli tu kina. Keirau a veitalanoataki ira yadua na lewe ni neimami kalasi ka veivosakitaka na ka era sa dui cakava tu oqo. E teteva yani na nona bula taucoko na nona loloma kei na veikauwaitaki.
Au taleitaka na ivakaro vakalawa ni Turaga ka kune ena Vunau kei na Veiyalayalati:
“Io au sa vakaroti kemudou talega mo dou veivakavulici vakai kemudou ena ivakavuvuli ni matanitu.
“Ia mo dou gumatua sara ena veivakavulici, raica au na qai vakalougatataki kemudou sara.”6
A vakatavuvuli vagumatua o Lucy Gertsch baleta ni sega ni oca na loloma.
Dolea na Vakanuinui kei na Dina
A vakasalataka na iApositolo o Pita, “Mo dou vakarau tiko mo dou tukuna vua na tamata yadua sa tarogi kemudou, na vu ni nuinui sa tu ena lomamudou.”7
Na inuinui levu duadua e rawa ni dolea e dua na qasenivuli oya na inuinui era kune ena dina ni kosipeli i Jisu Karisito.
“Ia na cava na nomudou inuinui? A taroga o Momani. “Raica au sa kaya vei kemudou sa nomudou inuinui na isoro i Karisito kei na kaukauwa ni nona tucake tale mai na mate, mo dou rawata kina na bula tawamudu, ia dou sa rawata oqo ena vuku ni nomudou vakabauti koya.”8
Kemuni na qasenivuli, tabalaka na domomuni ka vakadinadinataka na ituvaki dina ni Lewetolu Vakalou. Kacivaka na nomu ivakadinadina me baleta na iVola i Momani. Vakadewataka na veidina lagilagi ka totoka era tu ena yavu ni veivakabulai. Vakayagataka na veiyaya vakadonui ni Lotu, vakabibi na ivolanikalou, mo vakatavulica kina na dina ni kosipeli vakalesui mai i Jisu Karisito ena kena savasava ka matata taucoko. Nanuma na ivakaro vakalawa ni iVakabula “dou sa vakasaqaqara e nai Vola Tabu; ni dou sa nanuma ni dou sa rawata kina na bula tawamudu: ia nai vola oqo sa tukuni au.”9
Vukei ira na luve ni Kalou mera kila vakamatata na ka e taucoko ka bibi ena bula oqo. Vukei ira ni taracake na kaukauwa mera digitaka na salatu eso ena taqomaki ira ena sala ki na bula tawamudu.
Vakatavulica na dina, ka na vukea na nomu sasaga na Yalo Tabu.
”Dou Vuli vei Au”
Baleta ni a talairawarawa vakaoti ka lomasoli vei Tamana o Jisu Karisito, a “tubu cake [ko Koya] ena vuku kei na yagona talega, a sa vinakati koya vakalevu cake tikoga na Kalou kei ira talega na tamata”10 E tiko beka vei keda na sasaga meda cakava vakakina? Me vaka ga a “rawata na loloma e vakaikuritaki” o Jisu11 sa dodonu meda vakasaqara vakamalua ka gugumatua na rarama kei na kilaka mai vua na Kalou ena noda sasaga ni vulica na kosipeli.
Na vakarorogo e sa dua na ivalavala veiganiti ni vuli. Ni vakavakarau voli meda vakatavulici, eda qara ena masumasu na veivakauqeti kei na veivakadeitaki ni Yalo Tabu. Eda vakasama vagumatua, eda masu, eda tutaka na lesoni ni kosipeli, ka da qara na loma ni Tamada kivei keda.12
O Jisu a “vakatavulica … e vuqa na ka ena vosa vakatautauvata,”13 ka sa gadreva na daliga me rogoca, mata me raica, kei na yalo me vakila. Ni da bula kilikili voli, sa rawa ni da rogoca vakavinaka cake na vakasolokakana ni Yalo Tabu, ka sa rawa ni “vakavulici [keda] ena ka kecega a vosataka vei [keda].”14
Ni da vakadonuya na veisureti malumu ni Turaga, “Dou vuli vei au,” sa yaco meda dauivakayagataki ni Nona kaukauwa vakalou. Meda, sa qai, lako yani ena yalo ni talairawarawa, ni muri voli na noda Daunivakaraitaki ena ivakavuvuli ena vinakata o Koya meda vakatavulica kei na vuli ena vinakata o Koya meda vulica.
© 2016 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/15. Vakadonui me vakadewa: 6/15. Vakadewa ni ni First Presidency Message, March 2016. Fijian. 12863 858.
Veivakavulici mai na itukutuku oqo
E sureti keda o Peresitedi Monson meda “vakasamataka vagumatua na [noda] sasaga ni veivakatavulici ka vuli ka rai kivua na iVakabula me noda Dauveituberi ni caka vakakina. O na rairai navuca na vaqarai voli ni ivolanikalou vata kei ira o sikova mo kunea eso na raiyawa ena ivalavala a veivakatavulici ka vuli kina o Jisu Karisito. Sa rawa ni o tekivu ena so na ivolanikalou a vakatura o Peresitedi Monson, me vaka na Maciu 11:29, Joni 5:30, kei na Marika 4:2. Sa rawa ni o veivosakitaka na iwalewale e rawa ni vukei iko kina na ka o sa vulica me baleti Karisito ka “yaco mo dauivakayagataki ni Nona kaukauwa vakalou.”