Mensahe sa Visiting Teaching, Marso 2016

Gintuga sa dagway sang Dios

Tun-i sing mainampuon ining materyal kag magpangamuyo agud mahibaloan kon ano ang ipaambit. Paano ang paghangop sang “Ang Panimalay: Isa ka Proklamasyon sa Kalibutan” makapadugang sang inyo pagtuo sa Dios kag magabugay sa ila nga inyo ginabantayan paagi sa visiting teaching? Para sa dugang nga impormasyon maglog-on sa reliefsociety.lds.org.

Pagtuo, Pamilya, Bulig

“Niyan ang Dios nagsiling, himuon ta ang tawo sa dagway naton. …

“Gani ang Dios nagtuga sang tawo sa iya kaugalingon nga dagway, sa dagway sang Dios gintuga niya sia, lalaki kag babaye gintuga niya sila.” (Genesis 1:26–27).

Ang Dios amo ang aton Langitnon nga Amay, kag Iya kita ginhimo sa Iya dagway. Sa sining kamatuoran, si Pangulong Thomas S. Monson nagsiling: “Ang aton Dios nga Amay may mga dulunggan nga among makabati sa aton mga pangamuyo. May mga mata Sia nga among makakita sang aton mga buhat. May baba Sia nga among makighambal sa aton. May tagipusuon Sia nga among magabatyag sang kaluoy kag paghigugma. Matuodtuod Sia. Buhi Sia. Mga anak Niya kita nga ginhimo sa iya dagway. Kita pareho sang itsura sa Iya kag Sia pareho sang itsura sa aton.”¹

“Ang mga Santos sa Ulihing mga Adlaw nagatulok sa tanan nga tawo bilang mga anak sang Dios sa bug-os kag kompleto nga kahulugan; ginakabig nila ang tagsa katawo nga diosnon ang ginhalinan, kinaiya, kag ikasarang.”² Ang tagsa “isa ka pinalangga nga anak nga espiritu nga lalaki kag anak nga espiritu nga babayi nga may langitnon nga mga ginikanan.”³

“[Ang Propetang] si Joseph Smith nakatuon man nga ang Dios nagahandum nga ang Iya mga anak makaangkon sang kasubong nga pagkahitaas nga Iya ginaambit.”⁴ Subong sa ginsiling sang Dios, “Kay yari karon, amo ini ang akon buluhaton kag ang akon himaya—ang magpahanabo sang imortalidad kag wala’y katapusan nga kabuhi sang tawo” (Moses 1:39).

Dugang nga Balaan nga mga Kasulatan

Genesis 1:26-27; 1 Mga Taga-Corinto 3:17; Doctrine and Covenants 130:1

Gikan sa Balaan nga mga Kasulatan

Ang utod ni Jared sa Libro ni Mormon nagpangita sang paagi agud sugaan ang walo ka barko nga gindisenyo sa pagdala sang mga Jarednon patabok sa mga tubig pakadto sa dutang panaad. Iya “gintunaw gikan sa isa ka bato ang anum ka magagmay nga mga bato” kag nagpangamuyo sa Dios nga “tandugon ining mga bato” sang Iya tudlo agud “magabanaag ang ini sa kadudulman.” Kag “gin-untay (sang Dios) ang iya kamot kag gintandog ang mga bato sing isa-isa.” Kag ang kumbong nakuha gikan sa mga mata sang utod ni Jared, kag nakita niya ang tudlo sang Ginuo; kag subong ini sang tudlo sang isa ka tawo. …

“Kag ang Ginuo nagsiling sa iya: Magapati ka bala sa mga pulong nga akon igahambal?

“Kag nagsabat sia: Huo, Ginuo.”

Kag “ginpakita sang Ginuo ang Iya kaugalingon sa [utod ni Jared]” kag nagsiling, “Nakita mo bala nga ikaw gintuga suno sa akon dagway? Huo, bisan ang tanan nga mga tawo gintuga sa ginsuguran suno sa akon kaugalingon nga dagway.” (Tan-awa sa Eter 3:1-17.)

© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/15. Pagtugot sa paglubad: 6/15. Paglubad sang Visiting Teaching Message, March 2016. Hiligaynon. 12863 861

Binagbinaga Ini

Paano ang pagkahibalo nga ang tagsa katawo gintuga sa dagway sang Dios makabulig sa aton sa aton mga kaangtanan sa iban nga mga tawo?