Mensahe sang Unang Panguluhan, Marso 2016
“Magtuon Kamo sa Akon”
Ni Pangulong Thomas S. Monson
Sa Ang Simbahan ni Jesucristo sang mga Santos sa Ulihing mga Adlaw, tanan kita mga manunudlo kag tanan kita mga tumuluon. Sa tanan nagaabot ining malulo nga pangagda gikan sa aton Ginuo. “Magtuon kamo sa akon … kag makakita kamo sang kapahuwayan sa inyo mga kalag.”1
Ginaagda ko ang tanan nga mga Santos sa Ulihing mga Adlaw sa pagbinagbinag sang ila mga paghimud-os sa pagtudlo kag sa pagtuon kag magtulok sa Manluluwas bilang aton Giya sa paghimo sing amo. Nakahibalo kita nga “ining manunudlo nga naghalin sa Dios”2 mas labi pa sa isa lang ka manunudlo. Sia nga nagtudlo sa aton sa paghigugma sa Ginuo nga aton Dios sa bug-os naton nga mga tagipusuon, bug-os naton nga mga kalag, bug-os naton nga kusog, kag bug-os naton nga mga panghunahuna, kag sa paghigugma sa aton mga kaingod subong sa aton mga kaugalingon, amo ang Halangdon nga Manunudlo kag ang Ehemplo sang perpekto nga kabuhi.
Sia amo yadto ang nagsiling nga: “Kari, magsunod kamo sa akon.”3 “Nagpahamtang ako sang halimbawa para sa inyo.”4
Luwas Kon Kamo Magbag-o
Si Jesus nagtudlo sang isa ka simple apang madalom nga kamatuoran suno sa nasulat sa Mateo. Pagkatapos nga Sia kag ang Iya mga disipulo nagpanaog gikan sa Bukid sang Pagbalhin sang Dagway, nagdulog sila sa Galilea kag nagpadulong sa Capernaum. Didto ang mga disipulo nagpalapit kay Jesus, nga nagapamangkot:
“Sin-o bala ang labing dako sa ginharian sang langit?
“Kag ginpatawag ni Jesus ang diutay nga mga bata kag ginpatunga sia sa ila,
“Kag nagsabat, Sa pagkamatuod nagsiling ako sa inyo, kon indi kamo magliso kag mangin kaangay sang kabataan, indi kamo nga mas-a makasulod sa ginharian sang langit.”5
Sa Simbahan, ang lkatuyuan sang pagtudlo sang ebanghelyo indi ang pagbubo sang impormasyon sa mga hunahuna sang mga anak sang Dios, sa panimalay man, sa hulot sang klase, ukon sa patag sang misyon. Ini indi ang pagpakita kon ano kadamo ang nahibaloan sang ginikanan, manunudlo, ukon misyonero. Ukon ang pagdugang lamang sang ihibalo parte sa Manluluwas kag sa Iya Simbahan.
Ang mayor nga katuyuan sang pagtudlo amo nga buligan ang mga anak nga lalaki kag babayi sang Langitnon nga Amay sa pagbalik sa Iya presensya kag magkalipay sa kabuhi nga wala’y katapusan upod sa Iya. Agud mahimo ini, ang pagtudlo sang ebanghelyo kinahanglan magpaisog sa ila sa pag-usoy sa dalanon sang adlaw-adlaw nga pagkadisipulo kag sagrado nga mga kasugtanan. Ang tuyo amo ang pagpaisog sang mga indibidwal sa paghunahuna, pagbatyag, kag dayon sa paghimo sang mga tikang agud ipangabuhi ang mga prinsipyo sang ebanghelyo. Ang katuyuan amo ang pagpalambo sang pagtuo sa Ginuong Jesucristo kag magliso sa Iya ebanghelyo.
Ang pagpanudlo nga nagapakamaayo kag nagapabag-o kag nagaluwas amo ang pagpanudlo nga nagasunod sa halimbawa sang Manluluwas. Ang mga manunudlo nga nagasunod sa halimbawa sang Manluluwas nagahigugma kag nagaalagad sa ila mga ginatudloan. Ginainspirar nila ang ila mga tagpalamati sang mga leksyon nga may diosnon nga kamatuoran. Nagakabuhi sila sing kabuhi nga nagakabagay sundon.
Maghigugma kag Mag-alagad
Ang kabug-osan sang pag-alagad sang Manluluwas maathag nga nagpakita sing paghigugma sa kaingod. Sa pagkamatuod, ang Iya gugma kag pag-alagad ang masami Niya nga leksyon. Sa pareho man nga pamaagi, ang mga manunudlo nga madumduman ko sing maayo amo yadtong mga manunudlo nga nakakilala, naghigugma kag nag-ulikid sa ila mga estudyante. Ginpangita nila ang nadula nga karnero. Gintudlo nila ang mga leksyon sa kabuhi nga padayon ko nga pagadumdumon.
Isa ka manunudlo nga kasubong sina amo si Lucy Gertsch. Kilala niya ang tagsa niya ka estudyante. Wala’y palta niya nga ginabisitahan ang mga nagalaktaw sa pagsimba isa ka Domingo ukon ang wala na gid nagakadto para magsimba. Nakahibalo kami nga nagaulikid sia sa amon. Wala sa amon sing nalipat sa iya ukon sang mga leksyon nga iya gintudlo.
Madamo nga tinuig ang nagligad, sang si Lucy nagahilapit na sa katapusan sang iya kabuhi, ginbisitahan ko sia. Amon ginhanduraw yadtong mga adlaw nga madugay na kaayo sang sia amon nangin manunudlo. Ginhambalan namon ang tagsa ka miyembro sang amon klase kag kon ano na sila subong. Ang iya paghigugma kag pag-ulikid naglawig sa bug-os nga kabuhi.
Nanamian ako sa layi sang Ginuo nga makita sa Doctrine and Covenants:
“Ginahatag ko sa inyo ang isa ka kasuguan nga inyo dapat tudloan ang tagsa-tagsa sang doktrina sang ginharian.
“Magtudlo sing maukod kag ang akon grasya mangin yara sa inyo.”6
Si Lucy Gertsch nagtudlo sing maukod tungod naghigugma sia sing wala’y pagka-kapoy.
Magtanyag sang Paglaum kag Kamatuoran
Ang Apostoles nga si Pedro naglaygay, “Maghanda gihapon sa pag-apin sa paglaum nga yara sa inyo sa bisan kay sin-o nga magpamangkot sa inyo.”7
Ayhan ang pinakadako nga paglaum nga sarang matanyag sang isa ka manunudlo amo ang paglaum nga masalapuan sa mga kamatuoran sang ebanghelyo ni Jesucristo.
“Kag ano ini nga inyo pagalauman?” Si Mormon nagpamangkot. “Yari karon ginasiling ko sa inyo nga makaangkon kamo sing paglaum paagi sa pagpasag-uli ni Cristo kag sang gahum sang iya pagkabanhaw, nga pagabangunon sa wala’y katapusan nga kabuhi, kag ini tungod sang inyo pagtuo sa iya.”8
Mga manunudlo, ibayaw ang inyo mga tingug kag magsaksi sa matuod nga kinaugali sang Panguluhan sang Dios. I-deklarar ang inyo pagsaksi nahanungod sa Libro ni Mormon. Ipabutyag ang mahimayaon kag matahum nga mga kamatuoran nga yara sa plano sang kaluwasan. Gamita ang mga materyales nga ginapahanugutan sang Simbahan, ilabi na ang balaan nga mga kasulatan, sa pagtudlo sang mga kamatuoran sang ginpanumbalik nga ebanghelyo ni Jesucristo sa ila kaulay kag kasimple. Panumduma ang kasuguan sang Manluluwas sa pag- “usisa sang balaan nga mga kasulatan; tungod sa ila imo mahunahuna nga sa ila ikaw may kabuhi nga wala’y katapusan: kag sila amo ang magasaksi sa akon.”9
Buligi ang mga anak sang Dios nga mahangpan kon ano ang matuodtuod kag importante sa sini nga kabuhi. Buligi sila nga mapalambo ang kusog sa pagpili sang mga banas nga magatipig sa ila nga luwas padulong sa kabuhi nga wala’y katapusan.
Itudlo ang kamatuoran, kag ang Balaan nga Espiritu magaupod sa imo mga pagpaninguha.
“Magtuon Kamo sa Akon”
Tungod si Jesucristo nangin himpit nga matinumanon kag nagpaidalom sa Iya Amay, Sia “nagdugang sa kaalam kag sa kataason, kag nahamut-an sang Dios kag sang mga tawo.”10 May yara bala kita sang determinasyon nga himuon ang subong man? Subong nga si Jesus “nagbaton sang bugay para sa bugay,”11 kinahanglan kita nga mangin mapasensyahon kag mapahinunuton sa pagpangita sing kasanag kag kaalam gikan sa Dios sa aton mga paghimud-os sa pagtuon sa ebanghelyo.
Ang pagpamati isa ka importante nga elemento sa pagtuon. Kon nagahanda nga tudloan, mapinangamuyuon kita nga mangita sang inspirasyon kag kompirmasyon gikan sa Balaan nga Espiritu. Nagabinagbinag kita, nagapangamuyo kita, ginadapat naton ang mga prinsipyo sang ebanghelyo, kag ginahibalo naton ang kabubut-on sang Langitnon nga Amay para sa aton.12
Si Jesus “nagtudlo… sing madamo nga mga butang paagi sa mga paanggid,”13 nga nagapangayo sing mga dulunggan nga magapamati, mga mata nga magatulok, kag mga tagipusuon nga magahangop. Kon kita nagapangabuhi sing takos, sarang naton mabatian sing mas maathag ang mga hutik sang Balaan nga Espiritu, nga sarang maga“tudlo sa [aton] sang tanan nga mga butang, kag magapahanumdum [sa aton] sang tanan nga Iya ginsiling sa [aton].”14
Kon ginabaton naton ang mga malulo nga pangagda sang Ginuo, “Magtuon kamo sa akon” kita mangin mga umalambit sang Iya diosnon nga gahum. Gani, magpadayon kita sa espiritu sang pagkamatinumanon, nga nagasunod sa aton Ehemplo paagi sa pagtudlo subong sa Iya luyag nga kita magtudlo kag pagtuon subong sa Iya luyag nga kita magtuon.
© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/15. Pagtugot sa paglubad: 6/15. Paglubad sang First Presidency Message, March 2016. Hiligaynon. 12863 861
Pagtudlo gikan sa Sining Mensahe
Si Pangulong Monson nagaagda sa aton sa pag-“binagbinag sang [aton] mga paghimud-os sa pagtudlo kag pagtuon kag sa pagtulok sa Manluluwas bilang aton Giya sa paghimo sang subong.” Ayhan luyag mo binagbinagon ang pagtuon sa balaan nga mga kasulatan upod sa ila nga inyo ginabisitahan agud makakuha sang mga ihibalo sa mga paagi nga si Jesucristo nagtudlo kag nagtuon. Mahimo mo suguran sa pila ka balaan nga mga kasulatan nga gintumod ni Pangulong Monson subong abi sang Mateo 11:29, Juan 5:30, kag Marcos 4:2. Mahimo ninyo hambalan kon paano ninyo natun-an nga si Cristo sarang makabulig sa inyo nga “mangin umalambit sang Iya diosnon nga gahum.”