Cov Mus Saib Xyuas Tom Tsev tsab Xov, Peb Hlis Ntuj 2016
Tsim Tau Kom Zoo Nkaus Li Vajtswv
Ua tib zoo thov Vajtswv kawm tej yam no thiab nug seb koj yuav tsum qhia dab tsi. Qhov uas koj to taub “Tsev Neeg: Ib zaj Lus Tshaj Tawm rau lub Ntiaj Teb” yuav ua li cas kom koj txoj kev ntseeg Vajtswv loj zuj zus thiab foom koob hmoov rau cov uas koj mus saib xyuas tom tsev? Kom tau ntaub ntawv xov xwm ntxiv, cia li txuas rau reliefsociety.lds.org.
Kev Ntseeg, Tsev Neeg, Kev Pab
“Vajtswv hais tias, Nim no peb yuav tsim neeg kom muaj yam ntxwv zoo li peb. …
“Vajtswv thiaj tsim neeg, kom lawv muaj yam ntxwv zoo li Vajtswv ntag. Nws tsim muaj tus txiv neej thiab tus poj niam” (Chiv Keeb 1:26–27).
Vajtswv yog peb Leej Txiv Saum Ntuj Ceeb Tsheej, thiab Nws tau tsim peb kom muaj yam ntxwv zoo li Nws. Thawj Tswj Hwm Thomas S. Monson hais txog qhov tseeb no hais tias: “Vajtswv peb Leej Txiv muaj pob ntseg hnov peb tej lus thov. Nws muaj qhov muag pom tej yam peb ua. Nws muaj qhov ncauj uas hais lus rau peb. Nws muaj ib lub siab hlub peb. Muaj Nws tiag tiag. Nws muaj txoj sia nyob. Peb yog nws cov me nyuam uas Nws tsim kom zoo li Nws. Peb muaj yam ntxwv zoo li Nws thiab Nws muaj yam ntxwv zoo li peb.”1
“Tsoom Haiv Neeg Ntseeg hauv Hnub Nyoog Kawg pom hais tias tag nrho txhua tus neeg yog Vajtswv cov me nyuam tiag tiag li; lawv xav hais tias txhua tus neeg muaj tus cwj pwm thiab muaj peev xwm rais los ua neeg zoo li Vajtswv.”2 Txhua tus yog “ib tug ntsuj plig tub los sis ntxhais ntawm ib khub niam txiv saum ntuj ceeb tsheej.”3
“[Tus Yaj Saub] Yauxej Xamiv kuj tau kawm hais tias Vajtswv xav kom Nws cov me nyuam txais kev tsa nto ib yam li Nws muaj.”4 Zoo li Vajtswv tau hais tias, nov yog Nws txoj hauj lwm thiab Nws lub yeeb koob—ua kom tib neeg tsis txawj tuag thiab tau txoj sia nyob mus ib txhis (saib Mauxes 1:39).
Vaj Lug Kub Ntxiv
Chiv Keeb 1:26–27; 1 Kauleethaus 3:17; Lus Qhuab Qhia thiab Kev Khi Lus 130:1
Los ntawm cov Vaj Lug Kub
Nyob hauv Phau Ntawv Maumoos Tsales tus tij laug nrhiav txoj kev kom muaj teeb nyob hauv yim lub nkoj uas yuav thauj cov Neeg Yales hla cov dej mus rau thaj av uas tau cog lus tseg lawm. Nws “tau muab ib lub pob zeb los nchuav ua kaum rau lub me nyuam pob zeb” thiab thov Vajtswv kom Nws “kov cov pob zeb no” nrog Nws tus ntiv tes “kom [cov pob zeb no] yuav ci pom kev nyob hauv qhov tsaus ntuj.” Thiab Vajtswv “tau cev nws txhais tes tawm thiab kov cov pob zeb ib lub dhau ib lub nrog nws tus ntiv tes.” Daim ntaub thaiv tau raug qhib tawm ntawm Tsales tus tij laug lub qhov muag, thiab “nws tau pom tus Tswv tus ntiv tes; thiab nws zoo li neeg tus ntiv tes. …
“Thiab tus Tswv tau hais rau nws tias: Koj puas ntseeg tej lus uas kuv yuav hais?
“Thiab nws tau teb tias: Muaj tseeb tiag, tus Tswv es.”
Thiab “tus Tswv tau ua nws tus kheej rau [Yales tus tij laug] pom” thiab hais tias, “Koj puas pom tias koj tau raug tsim muaj tus yam ntxwv ib yam li kuv?” Muaj tseeb tiag, tag nrho tib neeg sawv daws tau raug tsim thaum chiv keeb muaj tus yam ntxwv zoo ib yam li kuv.” (Saib Ethaws 3:1–17.)
© 2016 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam ua lus Akiv: 6/15. Pub txhais ua lus Hmoob: 6/15. Kev txhais Visiting Teaching Message, March 2016. Hmong. 12863 295
Xav Txog Qhov No
Qhov uas peb paub tias Vajtswv tau tsim txhua tus neeg kom muaj yam ntxwv zoo li Nws pab peb li cas thaum peb nrog lwm tus sib tham?