Thawj Pawg Thawj Tswj Hwm tsab Xov, Peb Hlis Ntuj 2016
“Kawm tej uas Kuv Qhia”
Los ntawm Thawj Tswj Hwm Thomas S. Monson
Nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, peb txhua tus yog cov kws qhia thiab peb txhua tus yog cov uas kawm. Tus Tswv caw txhua tus los ua li no: “Kawm tej uas kuv qhia … nej thiaj yuav tau so.”1
Kuv caw txhua tus Neeg Ntseeg hauv Hnub Nyoog Kawg kom xav txog tej yam uas lawv ua tau kom qhia thiab kawm thiab cia tus Cawm Seej coj peb thaum peb ua li ntawd. Peb paub hais tias “tus xib hwb uas Vajtswv txib los”2 tsis yog ib tug xib hwb xwb. Tus uas qhia peb kom peb hlub tus Tswv peb tus Vajtswv kawg siab kawg ntsws kawg dag kawg zog, thiab hlub peb cov kwv tij ib yam li peb hlub peb tus kheej, Nws yog tus Xib Hwb thiab tus Coj Yam Ntxwv txog lub neej zoo tag nrho.
Nws yog tus uas tau tshaj tawm hais tias: “Los nrog kuv mus,”3 “Kuv tau ua ib tug yam ntxwv rau nej.”4
Yog Nej Tsis Hloov Siab Los Ntseeg
Yexus tau qhia ib qho tseeb uas yooj yim to taub thiab tseem ceeb nyob hauv phau Mathais. Tom qab Nws thiab Nws cov thwj tim tau nqis los ntawm lub Roob Hloov Hlo los, lawv so ib chim nyob ntawm Kalilais ces mus rau Kapena-us. Nyob ntawd cov thwj tim tuaj nug Yexus, hais tias:
“Leej twg yog tus loj dua ntais saum ntuj ceeb tsheej”
“Yexus hu ib tug me nyuam yaus los sawv ntawm lawv xub ntiag,
“Thiab hais tias, Kuv qhia tseeb rau nej hais tias, yog nej tsis hloov [siab los ntseeg] kom zoo li tug me nyuam yaus no …, ces nej yuav tsis tau mus saum ntuj ceeb tsheej.5
Nyob hauv lub Koom Txoos no, lub hom phiaj ntawm kev qhia txog txoj moo zoo tsis yog ua kom tso tej lus qhia nyob rau hauv Vajtswv cov me nyuam lub siab, txawm yog lawv nyob hauv tsev, hauv chav kawm, los yog qhov chaw tshaj tawm txoj moo zoo. Lub hom phiaj tsis yog ua kom lawv paub tias ib tug niam tsev, txiv tsev, tus xib hwb, los yog tus tub txib txawj ntse npaum li cas. Tsis yog ua kom tib neeg paub ntxiv txog tus Cawm Seej thiab Nws lub Koom Txoos.
Lub hom phiaj ntawm kev qhia txog txoj moo zoo yog ua kom pab Leej Txiv Saum Ntuj Ceeb Tsheej cov tub thiab cov ntxhais rov qab mus nrog Nws nyob thiab muaj txoj sia nyob mus ib txhis nrog Nws. Yog peb xav ua li no, kev qhia txog txoj moo zoo yuav tsum pab lawv xav coj raws li Nws txhua hnub thiab ua raws li tej kev khi lus dawb ceev. Lub hom phiaj yog kev tshoov tib neeg lub siab kom lawv xav txog, ces coj raws li tej ntsiab cai ntawm txoj moo zoo. Lub hom phiaj yog qhov uas peb yuav muaj kev ntseeg tus Tswv Yexus Khetos thiab hloov siab los ntseeg Nws txoj moo zoo.
Tej lus qhia uas foom koob hmoov thiab hloov siab los ntseeg thiab cawm lwm tus yog tej lus qhia Cov xib hwb uas coj yam ntxwv zoo li tus Cawm Seej yog cov uas hlub thiab pab cov uas lawv qhia. Lawv tshoov cov uas mloog lawv tej lus qhia lub siab thaum lawv qhia txog qhov tseeb uas nyob mus ib txhis. Lawv ua neej uas tsim nyog coj raws li lawv tus yam ntxwv.
Hlub thiab Pab
Tag nrho tus Cawm Seej txoj hauj lwm qhuab qhia yeej ua yam ntxwv txog kev hub yus tus neeg zej zog. Muaj tseeb tiag, tej yam Nws qhia yeej yog los ntawm Nws txoj kev hlub thiab txoj kev pab lwm tus. Yog li ntawd, cov xib hwb uas kuv nco ntsoov yog cov xib hwb uas paub, hlub, thiab saib xyuas lawv cov tub ntxhais kawm. Lawv nrhiav cov yaj uas poob zoo. Lawv qhia tej yam txog lub neej no uas kuv yeej yuav nco ntsoov.
Ib tug xib hwb kuv nco txog yog Lucy Gertsch. Nws paub nws txhua tus tub ntxhais kawm ntawv. Cov uas tsis tuaj thaum Hnub Caiv ib zaug los sis yeej tsis tuaj los nws yeej hu tsis tu tsis tseg. Peb twb paub tias nws hlub peb. Peb txhua tus yeej nco ntsoov nws thiab nws tej lus qhia.
Ntau xyoo tom qab ntawd, thaum Lucy yuav luag tas sim neej no, kuv mus ntsib nws. Wb tau sib tham txog lub sij hawm dhau los thaum nws yog peb tus xib hwb. Wb sib tham txog txhua tus nyob hauv peb chav kawm thiab sib tham txog qhov uas txhua tus ua neej li cas. Nws txoj kev hlub twb kav ntev tas ib sim neej.
Kuv nyiam tus Tswv tej lus txib uas nyob hauv phau Lus Qhuab Qhia thiab Kev Khi Lus uas hais tias:
Tus Tswv muab ib lo lus txib rau peb kom peb ib leeg qhia ib leeg txog txoj lus qhuab qhia ntawm lub nceeg vaj.
Peb yuav tsum rau siab ntso qhia thiab Nws lub hwj chim yuav nrog peb nyob.6
Lucy Gertsch rau siab ntso qhia vim nws hlub peb tsis tu tsis tseg.
Ua Kom Lwm Tus Muaj Kev Cia Siab thiab Qhia Qhov Tseeb
Tus Thwj Tim Pov Lauj hais tias: “Nej yuav tsum npaj tos txhua lub sij hawm, yog thaum twg muaj neeg nug nej hais tias vim li cas nej muaj chaw cia siab, thaum ntawd nej thiaj paub teb lawv.”7
Tej zaum qhov kev cia siab loj tshaj plaws uas ib tug xib hwb qhia tau yog los ntawm qhov tseeb ntawm Yexus Khetos txoj moo zoo.
“Thiab nej yuav cia siab rau yam dab tsi? Maumoos nug hais tias, “Saib seb kuv hais rau nej tias nej yuav tsum muaj txoj kev cia siab dhau los ntawm Khetos thiab lub hwj chim ntawm nws txoj kev sawv hauv qhov tuag rov qab los, tias yuav sawv los mus rau txoj sia nyob mus ib txhis, thiab tau qhov no los vim nej txoj kev ntseeg … nws.”8
Cov xib hwb, cia li tsa nej lub suab thiab ua tim khawv txog qhov uas Pawg Vajtswv tej cwj pwm zoo li cas tiag. Hais nej zaj lus tim khawv txog Phau Ntawv Maumoos. Cia li qhia qhov tseeb zoo tshaj plaws uas nyob hauv txoj kev cawm seej. Siv cov ntaub ntawv uas lub Koom Txoos pom zoo rau, qhov tseem ceeb tshaj plaws yog cov vaj lug kub, kom qhia qhov tseeb txog Yexus Khetos txoj moo zoo uas tau muab txum tim rov qab los. Cia li nco txog tus Cawm Seej cov lus txib kom “tshawb nrhiav tej vaj lug kub; rau qhov nej xav hais tias tej vaj lug kub ntawd yuav cawm tau nej txoj sia mus ib txhis; thiab tej no yog ua tim khawv txog kuv.”9
Cia li pab Vajtswv cov me nyuam to taub hais tias qhov twg yog qhov tseem ceeb thiab qhov tseeb ntawm lub neej no. Pab lawv muaj dag muaj zog txaus xaiv tej kev uas yuav pab lawv mus txais txoj sia nyob mus ib txhis.
Cia li qhia qhov tseeb, thiab tus Vaj Ntsuj Plig Dawb Huv yuav pab nej.
“Kawm tej uas Kuv Qhia”
Vim Yexus Khetos mloog lus tag nrho thiab ua raws li Nws Leej Txiv hais, Nws “loj hlob zoo, muaj tswv yim, [thiab] ua haum Vajtswv siab thiab haum neeg siab.”10 Peb puas rau siab ua ib yam li ntawd? Ib yam li Yexus nws txais ib qho txuj ci tas mam li txais ib qho ntxiv,11 peb yuav tsum ua siab ntev thiab rau siab nrhiav qhov kaj thiab kev txawj ntse los ntawm Vajtswv thaum peb kawm txog txoj moo zoo.
Kev mloog lus yog ib qho tseem ceeb ntawm kev kawm. Thaum peb npaj siab kawm, peb thov Vajtswv kom txais tau kev tshoov siab thiab kev pom zoo los ntawm tus Vaj Ntsuj Plig Dawb Huv. Peb xav ntsoov, thov Vajtwv, ua raws li tej lus qhia txog txoj moo zoo, thiab peb nrhiav kom paub Leej Txiv lub siab nyiam rau peb.12
Yexus “ua lus piv txwv qhia ntau zaj,”13; uas ua kom yus yuav tsum muaj pob ntseg mloog lus, qhov muag pom kev, thiab lub siab uas xav to taub. Thaum peb ua neej tsim nyog, peb haj yam muaj peev xwm hnov tau tus Vaj Ntsuj Plig Dawb Huv tej lus ntxhi, uas “qhia [peb] txhua yam, thiab ua rau [peb] nco qab txog txhua yam.”14
Thaum peb teb tus Tswv tej lus caw mos muag kom peb “Kawm tej uas kuv qhia,” peb txais yuav Nws lub hwj chim saum ntuj ceeb tsheej. Yog li ntawd, cia peb muaj zog mus tom ntej mloog lus, ua raws li tus uas Coj Yam Ntxwv Zoo qhia raws li Nws xav kom peb qhia thiab kawm raws li Nws xav kom peb kawm.
© 2016 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam ua lus Akiv: 6/15. Pub txhais ua lus Hmoob: 6/15. Kev txhais First Presidency Message, March 2016. Hmong. 12863 295
Qhia los ntawm tsab xov no
Thawj Tswj Hwm Monson caw peb kom “xav txog tej yam uas [peb] ua kom qhia thiab kawm thiab cia tus Cawm Seej coj peb thaum peb ua li ntawd.” Tej zaum koj yuav xav nrhiav hauv cov vaj lug kub nrog cov uas koj mus xyuas kom kawm txog Yexus Khetos txoj kev qhia thiab txoj kev kawm. Tej zaum koj yuav xav siv tej nqe vaj lug kub uas Thawj Tswj Hwm Monson hais, xws li Mathais 11:29, Yauhas 5:30, thiab Malakaus 4:2. Tej zaum koj yuav xav sib tham txog qhov uas tej uas yus tau kawm txog Khetos yuav ua li cas pab yus “txais yuav Nws lub hwj chim uas los saum ntuj ceeb tsheej los.”