Mensahe iti Visiting Teaching, Marso 2016
Naparsua iti Ladawan ti Dios
Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawat iti “Ti Kaamaan: Maysa a Waragawag iti Lubong” ket mangpadakkel iti pammatiyo iti Dios ken mangparabur kadagiti ay-aywananyo babaen ti visiting teaching? Para iti ad-adu pay nga impormasion mapan iti reliefsociety.lds.org.
Pammati, Pamilia, Tulong
“Ket ti Dios kinunana, Aramidentayo koma ti tao iti ladawantayo, kas kaaspingtayo. …
“Ket ti Dios pinarsuana ti tao a kaladawanna met laeng, iti ladawan ti Dios pinarsuana; pinarsuana ida a lalaki ken babai” (Genesis 1:26–27).
Ti Dios ti Nailangitan nga Amatayo, ket pinarsuanatayo iti ladawanna. Maipapan itoy a kinapudno, kinuna ni Presidente Thomas S. Monson: “Addaan ti Dios nga Amatayo kadagiti lapayag a pangdengganna kadagiti kararagtayo. Addaan isuna kadagiti mata a pangkitaanna kadagiti aramid wenno tignaytayo. Addaan isuna iti ngiwat a pakisaritaanna kadatayo. Addaan isuna iti puso a pangriknaanna iti panangngaasi ken ayat. Isu ket pudno. Isu ket sibibiag. Datayo dagiti annakna a naaramid iti ladawanna. Kalanglangatayo isuna ket kalanglanganatayo.”1
“Dagiti Santo iti Ud-udina nga Aldaw ket ibilangda ti amin a tao kas annak ti Dios iti naan-anay ken kumpleto a kaipapanan; ibilangda ti tunggal tao a nadiosan iti nagtaudan, nakaparsuaan, ken potensial.”2 Tunggal maysa ket “maipatpateg nga espiritu nga anak a lalaki ken anak a babai dagiti nailangitan a nagannak.”3
“Nasursuro met [ni Propeta] Joseph Smith a tarigagayan ti Dios nga awaten dagiti annakna ti isu met laeng a kita ti naitan-ok a panagbiag nga aw-awatenna.”4 Kas kinuna ti Dios, “Ta adtoy, daytoy ti aramidko ken gloriak—ti mangipatungpal iti saan nga ipapatay ken agnanayon a biag ti tao” (Moises 1:39).
Dagiti Mainayon a Nasantuan a Kasuratan
Genesis 1:26–27; 1 Taga Corinto 3:17; Doktrina ken Katulagan 130:1
Manipud kadagiti Nasantuan a Kasuratan
Ti kabsat ni Jared iti Libro ni Mormon ket nagsapul iti maysa a wagas a mangsilaw iti walo a sasakayan a mangiballasiw iti danum ti baybay kadagiti Jaredite nga agturong iti naikari a daga. Isu ket “nangsukog manipud iti bato iti sangapulo-ket-innem a babassit a bato” ket nagkararag a ti Dios “sagidenna dagitoy a bato” iti ramayna “tapno agrimatda iti kasipngetan.” Ket ti Dios “intag-ayna ti imana ket sinagidna dagiti bato a saggaysa iti ramayna.” Ket naikkat ti belo iti mata ti kabsat ni Jared, ket “nakitana ti ramay ti Apo; ket kasla iti ramay ti tao. …
“Ket kinuna ti Apo kenkuana: Mamatika kadi kadagiti balikas nga ibagak?
“Ket kinunana: Wen, Apo.”
Ket “nagpakita ti Apo [iti kabsat ni Jared]” ket kinunana, “Makitam a naparsuaka a kalanglangak? Wen, kasta met a naparsua amin a tao manipud pay idi punganay a kalanglangak.” (Kitaen iti Ether 3:1–17)
© 2016 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/15. Pannakaanamongna a maipatarus: 6/15. Pannakaipatarus ti Visiting Teaching Message, March 2016. Ilokano 12863 864
Ibilang Daytoy
Kasano a ti pannakaammo a naparsua ti tunggal tao a kalanglanga ti Dios ket makatulong kadatayo iti pannakipulapoltayo kadagiti dadduma?