Mensahe ti Umuna a Panguluen, Marso 2016
“Agsursurokayo Kaniak”
Ni Presidente Thomas S. Monson
Iti Ti Simbaan ni Jesucristo dagiti Santo iti Ud-udina nga Aldaw, mannursurotayo amin ken agsursurotayo amin. Nangted ti Apo iti naayat nga awis iti amin: “Agsursurokayo kaniak … ket makasarakkayto ti inana a maipaay kadagiti kararuayo.”1
Awisek ti amin a Santo a mangutob kadagiti panagkagumaanda a mangisuro ken agsursuro ken kumita iti Mangisalakan a kas Tarabaytayo iti panangaramidtayo iti daytoy. Ammotayo a daytoy a “mannursuro a naggapu iti Dios”2 ket ad-adda pay ngem iti basta laeng maysa a mannursuro. Isu a nangisuro kadatayo nga ayatentayo ti Apo a Dios iti amin a pusotayo, iti amin a kararuatayo, iti amin a pigsatayo, iti amin a panunottayo, ket ayatentayo dagiti padatayo a tao a kas iti bagbagitayo, ket ti Apo a Mannursuro ken ti Pagwadan ti naan-anay a biag.
Isu ti nangipakdaar: “Umayka, surotennak.”3 “Nangaramidak iti pagulidananyo.”4
Malaksid No
Insuro ni Jesus ti simple ngem nauneg a kinapudno kas naisurat iti Mateo. Kalpasan a bimmaba Isuna ken dagiti disipulona manipud iti Bantay ti Pagbalbaliwan Langa, nagsardengda iti Galilea ket kalpasanna napanda iti Capernaum. Idiay nga immasideg dagiti disipulo ken ni Jesus, a kunkunada:
“Asino ti kadakkelan idiay pagarian ti langit?
“Ket ni Jesus immayab ti maysa a bassit nga ubing ket isu inkabilna iti nagtengngaanda.
“Ket kinunana, Pudno kunak kadakayo, No dikayto agsubli, ken agbalin a kasla ub-ubbing, dikayto sumrek iti pagarian ti langit.”5
Iti Simbaan, ti panggep a tun-oyen ti panangisuro iti ebanghelio ket mangibukbok iti impormasion iti panunot dagiti annak ti Dios, iti may pagtaengan, iti siled ti klase, wenno iti tay-ak ti mision. Daytoy ket saan a panangipakita no kasano ti kadakkel ti ammo ti nagannak, ti mannursuro, wenno ti misionario. Wenno saan laeng a panangpadakkel iti pannakaammo maipanggep iti Mangisalakan ken ti Simbaanna.
Ti kangrunaan a panggep a tun-oyen ti panangisuro ket tapno matulongan dagiti annak a lallaki ken babbai ti Nailangitan nga Ama a makasubli iti sidongna ken mangsagrap iti agnanayon a biag Kenkuana. Tapno maaramid daytoy, ti panangisuro iti ebanghelio ket nasken a mangallukoy kadakuada iti dalan ti inaldaw a panagbalin a disipulo ken sagrado a katulagan. Ti panggep ket mangparegta kadagiti indibidual nga agpanunot, mangrikna, ket kalpasanna agaramid iti maysa a banag maipapan iti panangbiag kadagiti pagbatayan ti ebanghelio. Ti panggep ket mangpapigsa iti pammati ken ni Apo Jesucristo ken agbalin a nabalbaliwan iti ebangheliona.
Ti panangisuro a mangparabur ken mangpasurot ken mangispal ken panangisuro a mangtulad iti pagwadan ti Mangisalakan. Dagiti mannursuro a mangtulad iti pagwadan ti Mangisalakan ket agayat ken agserbida kadagiti sursuruanda. Paregtaenda dagiti dumdumngeg kadakuada kadagiti adalen a mainaig iti agnanayon maipapan iti nadiosan a kinapudno. Agbibiagda iti biag a maikari a tuladen.
Agayat ken Agserbi
Ti unos ti panagserbi ti Mangisalakan ket nangipagwadan iti ayat iti pada a tao. Kinapudnona, ti ayat ken serbisiona ti masansan nga iyadalna. Kasta met a, dagiti mannursuro a malagipko unay ket dagiti mannursuro a nangam-ammo, nangayat, ken nangipateg kadagiti estudianteda. Sinapulda ti napukaw a karnero. Nangisuroda kadagiti adalen iti biag a kanayonto a malaglagipko.
Maysa ti kasta a mannursuro ni Lucy Gertsch. Am-ammona ti tunggal maysa kadagiti estudiantena. Awan sarday nga inawaganna dagiti naglibtaw iti Domingo wenno saan nga immay. Ammomi nga ipatpategnakami. Awan kadakami ti nakalipat kenkuana wenno dagiti adalen nga insurona.
Kalpasan ti adu a tawen, idi umadani aggibus ti biag ni Lucy, simmarungkarak kenkuana. Malagipmi maipanggep dagita nga aldaw a nabayagen a panawen idi isu ti mannursuromi. Nagsaritaanmi maipapan ti tunggal miembro ti klasemi ket pinaglilinnawagannmi no ania itan ti ar-aramiden ti tunggal maysa. Ti ayat ken pammategna ket agpaut iti tungpal biag.
Pagay-ayatko ti balakad ti Apo a masarakan iti Doktrina ken Katulagan:
“Itedko kadakayo ti bilin nga isuroyo iti tunggal maysa ti doktrina ti pagarian.
“Mangisurokayo a sireregta ket tarabayennakayo ti paraburko.”6
Nangisuro a sireregta ni Lucy Gertsch gapu ta nagayat nga awan sardayna.
Mangidiaya iti Namnama ken Kinapudno
Imbalakad ni Apostol Pedro, “Madadaankayo a sumungbat iti isu amin a mangintuudto kadakayo ti gapu ti inanama nga adda kadakayo.”7
Nalabit a ti kadakkelan a namnama a mabalin nga idiaya ti maysa a mannursuro ket ti namnama a masarakan kadagiti kinapudno ti ebanghelio ni Jesucristo.
“Ket ania ti namnamaenyo?” Sinaludsod ni Mormon. “Adtoy kunak kadakayo nga addanto namnamayo gapu iti panangsubbot ni Cristo ken ti pannakabalin ti panagungarna, nga agungar iti biag nga agnanayon, ket daytoy gapu iti pammatiyo kenkuana.”8
Mannursuro, itag-ayyo dagiti timekyo ket paneknekanyo ti pudno a kinatao ti Kinadios. Ipakdaaryo ti pammaneknekyo maipanggep ti Libro ni Mormon. Idanonyo dagiti nadayag ken napintas a kinapudno a naglaon iti plano ti pannakaisalakan. Usarenyo dagiti material nga inanamongan ti Simbaan, nangnangruna dagiti nasantuan a kasuratan,a mangisuro kadagiti kinapudno ti naisubli nga ebanghelio ni Jesucristo iti kinatarnaw ken kinasimple dagitoy. Laglagipenyo ti balakad ti Mangisalakan a “sukimatenyo dagiti nasantuan a kasuratan; agsipud ta pagarupenyo nga adda kadakuada ti biagyo nga agnanayon: ken dagitoy isuda ti mangpaneknek ti maipapan kaniak.”9
Tulonganyo dagiti annak ti Dios a makaawat no ania ti napudno ken napateg iti daytoy a biag. Tulonganyo ida a maaddaan iti pigsa a mangpili kadagiti dana a mangpatalinaed kadakuada a natalged iti dalan nga agturong iti agnanayon a biag.
Isuroyo ti kinapudno, ket kaduaennakayto ti Espiritu Santo kadagiti panagkagumaanyo.
“Agsursurokayo Kaniak”
Gapu ta naan-anay a managtungpal ken natulnog ni Jesucristo iti Amana, Isu ket “dimmakkel iti kinasirib ken kinatayag, ken ti gundaway iti Dios ken iti tao.”10 Addaantayo kadi iti determinasion a mangaramid met iti kastoy? Kas ken ni Jesus nga “immawat iti ad-adu pay a parabur,”11 nasken a siaanus ken agtultuloytayo nga agsapul iti lawag ken pannakaammo manipud iti Dios kadagiti panagkagumaantayo nga agsursuro iti ebanghelio.
Ti panagdengngeg ket maysa a napateg nga elemento ti panagsursuro. No agsagsagana a pasursuruan. sikakararagtayo nga agkalikagum iti pammaregta ken pammatalged manipud iti Espiritu Santo. Agutobtayo, agkararagtayo, tayo dagiti adalen iti ebanghelio, ken kalikagumantayo ti pagayatan ti Ama para kadatayo.12
Ni Jesus “isursurona … kadagiti adu a banag kadagiti pangngarig,”13 nga agkasapulan kadagiti lapayag a dumngeg, kadagiti mata a kumita, ken puspuso nga umawat. No agbiagtayo a maikari, nasaysayaat a mangngegtayo dagiti arasaas ti Espiritu Santo, a “makaisuronto [kadatayo] ti amin a banag, ken ipalagipnanto dagiti isu amin nga imbagana [kadatayo].”14
No sumungbattayo iti naayat nga awis ti Apo, “Agsursurokayo kaniak,” agbalintayo nga umaw-awat iti nadiosan a bilegna. Ngarud, agtultuloytayo koma iti panagtungpal, a mangsursurot iti Pagwadantayo babaen ti panangisuro a kas iti kayatna a panangisurotayo ken panagsursuro a kas iti kayatna a panagsursurotayo.
© 2016 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/15. Pannakaanamongna a maipatarus: 6/15. Pannakaipatarus ti First Presidency Message, March 2016. Ilokano. 12863 864
Panangisuro manipud iti daytoy a mensahe
Awisennatayo ni Presidente Monson a “mangutob kadagiti panagkagumaan[tayo] a mangisuro ken agsursuro ken kumita iti Mangisalakan a kas Tarabaytayo iti panangaramidtayo iti kastoy.” Mabalinyo nga ibilang ti panagsukisok kadagiti nasantuan a kasuratan a kaduayo dagiti sarungkaranyo tapno agsapul kadagiti kadagiti wagas nga insuro ken nasursuro ni Jesucristo. Mabalinyo nga irugi iti sumagmamano a nasantuan a kasuratan nga imbasar ni Presidente Monson, kas iti Mateo 11:29, Juan 5:30, ken Marcos 4:2. Mabalinyo nga ilawlawag no kasano a no ania ti nasursuroyon maipapan ken Cristo ket makatulong kadakayo nga “agbalin nga umaw-awat iti nadiosan a bilegna.”