Pweng ke Forfor Luti, Mahs 2016
Sruhlweyucklac ke Luhman God
Pruhe in lutlutkihn kuhfa inge ac suk in etuh ma in akacsruhi kac. In etwaclah ke “Sucu: Sie Mwe Fahkwack nuh fin Facluh” ac ahkyohkye fuhkah luhlahlfongi ke God ac e ahkinsewowoye fuhkah mwet suc kuht liyacacng ke forfor luti yohroh uh? Nuh ke kuhtuh pac ma in etuh, som nuh ke reliefsociety.lds.org.
Luhlahlfongi, Sucu, Kahsruh
“Ac God El fahk, Lwelah kuht in oruh luhman mwet in atacsr, na in oacna luhmahsr. …
“Ouinge God El orala mwet uh, ac oralosla oana lumahl. El oralosla mukul ac muhtwacn” (Genesis 1:26–27).
God pa Pahpah tuhmasr Inkuhsrao, ac El luhmwekuhtlac ke Luhmahl sifacna. Ke ma pwacye inge, Prestuhn Thomas S. Monson el fahk: “God Pahpah tuhmasr oasr insrwacl in porongo pruhe lasr uh. Oasr muhtahl suc ma in kuh in liye orekma lasr uh. Oasr oaluhl suc ma in sramsram nuh sesr. Oasr sie insiyacl ma in puhla pahkomuhta ac luhngse. El pwacye. El moul. Kuht tuhlihk nahtuhl oreklac ke luhmahl. Ngwetngwetasr oacna el ac el oacna kuht.”1
“Mwet Luhlahlfongi ke Lwen-sahflah liye mwet uh nuh kwewa sruhluhn ekihn tuhlihk nuhtin God ke kahlwem ac etwacack lalos kwewa uh; motkoeyac selos muh mwet nuh kwewa ma lucng me, ke kuh ac luhmweyacsr.”2 Kais sie sesr “tuhlihk mukul nguhn ac tuhlihk muhtwacn nguhn wolacna nuhtin pahpah ac ninac inkuhsrao.”3
“[Tuh Mwet Pahluh] Joseph Smith el elakihn pac lah God El kena tuh tuhlihk Nahtuhl uh in wi ipeis ke wolacna ma pahtpaht suc oasr Yorohl uh.”4 Oacna ke God El fahk uh, Tuh liye, pa inge orekma ac wolacna luhk—in ahkfahsrye moul kawihl ac moul ma pahtpaht luhn mwet uh (liye Moses 1:39).
Ma Suhmuhslah Ituckyang Sahyac
Genesis 1:26–27; 1 Corinth 3:17; Doctrine and Covenants 130:1
Ke Ma Suhmuhslah uh
Tamuhlwel lal Jared ke Puk luhn Mormon uh suk innek in tohlwack oak oalkosr okwaclos uh ma taflweyucklac in kohlohloslac in meoa uh nuh yen olwelah selos uh. El “ahkmuhlwesryelah yot se ac oraclah yot srihsrihk singucul ohnkohsr” ac pruhe tuh God elan “kahlyac yot inge” ke pahol “ma inge tuh in kuh in tohlwack lohsr uh.” Ac God “El kohllah pahol ac kahlyac yot uh sie sin sie.” Mwe lihsrlihsr sac sahrlah liki ye muhtuhn tamuhlwel lal Jared uh, ac “el liye kihfihn poun Leum; ac ma inge oacna kihfihn poun sie mwet. …
“Ac Leum El fahk nuh sel: Yac kom luhlahlfongi kahs ma Nga ac fah sruhmuhn?
“Ac el topuk: Ahok, Leum.”
Ac “Leum El ahkkahlwemyacl sifacna nuh sel [tamuhlwel lal Jared]” ac fahk, “Liye lah kom oreklac oacna luhmuhk sifacna? Ahok, finne mwet nuhkwewa tuh oreklac ke muhtwacwacackiyac ah oacna luhmuhk sifacna.” (Liye Ether 3:1–17.)
© 2016 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/15. Ahkkweyeyucklac ke lweng: 6/15. Lwenglah luhn Visiting Teaching Message, March 2016. Kosraean. 12863 868
Nuhnkuh Ma Inge
Elakihn lah kais sie sesr sruhlweyucklac ke luhman God e kahsrwe kuht fuhkah ke sie sin sie lasr nuh sahyac uh?