Pweng sin Prestuhnsi Se Met, Mahs 2016
“Luti Keik”
Sel Prestuhn Thomas S. Monson
Ke Alu luhn Jisus Kraist luhn Mwet Luhlahlfongi ke Lwen-sahflah, kuht nuh kwewa mwet luti ac mwet lutlut. Nuh sin mwet nuh kwewa solsol se inge ma tuhkuh sin Leum: “Lutlut sik … ac kowos fah konauk mongla.”1
Nga suli kowos kwewa Mwet Luhlahlfongi ke Lwen-sahflah in nuhnkuh ke kuh lalos in lotwelah ac in ngwet nuh sin Mwet Lahngo in pa Kolyuck lasr ke kuht orekma uh. Kuht etuh lah “mwet luti supweyukme sin God”2 el sruhluhn ekihn yohk sie mwet luti. El suc luti kuht in luhngse na Leum God lasr ke insiyacsr kwewa uh, ke nguhnasr kwewa, kuhiyacsr kwewa, ac nuhnak lasr kwewa, ac in luhngse mwet tuhlan lasr oacna kuht sifacna, in pa ma Mwet Luti ac Mwet Srihkasrak ke moul suwohswohs uh.
El pa suc tuh fahk muh: “Fahsruh fahsr tukuk.”3 “Nga oakiyac sie mwe srihkasrak nuh suwos.”4
Sahyacn Kowos In Eklac
Jesus El luti mwe luti na fihsrwacsr se arlacna loal ma sihmlac in puk lal Mattu. Tukun El ac mwet tuhma lutlut Lal oactui fin Eol in Eklac uh, elos tui fin acn Galilee ac na som nuh Capernaum. We pa mwet tuhma lutlut uh tuhkuh nuh yohrohl Jisus, siyuck:
“Su fulwat oemeet in Tokosrai lun kusrao uh?
“Na Jisus el pangonma tulik srihsrihk se ac sap elan tu ye mutahlos,
“Ac el fahk, ‘Pwayena nga fahk nu suwos, kowos fin tia ekla in oana tulik srihsrihk, kowos ac koflana in ilyak nu in Tokosrai lun kusrao.’”5
Ke Alu uh, finsrak kuh ke lutiyacn wosasuc uh tiac ma in nwacklah ahluhn sihfen tuhlihk nuhtin God uh ke ma uh, ke iwaclos, lohm lutlut, kuh in misin lalos uh. Tiac ma in fahkwack pihsen ma ninac pahpah, mwet luti, kuh misineri etuh uh. Tiac ma pac in ahkyohkye etwacack ke Mwet Lahngo ac Alu Lal.
Yohkiyacn ma tuhkuh ke luti uh pa in kahsruh wen ac acn nuhtin Pahpah Lucng in fohlohk nuh Yohrohl ac engankihn moul ma pahtpaht Yohrohl. In oruh ma se inge, luti luhn wosasuc uh in mwe ahkkweyaclos ke innek in moul in srihke pengana lwen ac olwelah muhtahl uh. Ke uh pa in mokle kuht in motko, puhla, ac na orekma kac ke moulkihnyacn mwe luti ke wosasuc uh. Finsrak uh pa in ahkkapye luhlahlfongi in Leum Jisus Kraist ac in ekuhllah moul an nuh ke wosasuc Lal uh.
Luti in ahkinsewowoye ac ekuhllah ac molwelah uh pa lutlut ma etahi srihkasrak luhn Mwet Lahngo uh. Mwet Luti ma etahi srihkasrak luhn Mwet Lahngo uh luhngse ac kuhlwacnsuhpuh mwet elos luti uh. Elos pihrihk mwet porongwaclos uh ke mwe luti ma pahtpaht luhn ma pwacye wolacna uh. Elos moulkihn moul na fal in ukweyuck.
Luhngse ac Kuhlwacnsuhpuh
Moul in kuhlwacnsap luhn Mwet Lahngo uh ahkkahlwemye kwewa srihkasrak in luhngse mwet tuhlan. Ahok, luhngse ac kuhlwacnsap Lal kwacna pa mwe luti Lal uh. In oacna kain ohiyac inge, mwet luti ma nga esam ah pa mwet luti ma etuh, luhngse, ac ngalkihn tuhlihk lutlut lalos uh. Elos suk sip tuhlac uh. Elos luti mwe luti luhn moul uh ma nga tiac kuh in muhlkuhnlah.
Sie sin kain mwet luti inge pa Lucy Gertsch. El etuh kais sie tuhlihk lutlut lal uh. El soenna wi muhlkuhnlah in pahngonwack elos suc ma tiac yorack ke Sacnri kuh suc ma tiac tuhkuh uh. Kuht etuh lah el arulacna ai kuht. Tiac sie sesr kuh in muhlkuhnuhllah kuh mwe luti el luti ac.
Yac pucspucs tohkoh, ke fototoyang Lucy elan misac ah, nga muhtwacta nuh yohrohl. Kuht esamwack yoh sac met liki na el ekihn mwet luti se lasr ah. Kuht sramsram ke kais sie mempucr ke kuhlahs lasr uh ac sramsramkihn ma kais sie oruh ingena. Luhngse ac karihngihn wowo ke lusen moul lal.
Nga luhngse pohloh kahs se luhn Leum ma fwack in Doctrine and Covenants uh:
Nga usot nuh sum masap se ma kom ac enenuh in luti sie sin sie ke mwe luti luhn tohkohsrahi (liye D&C 88:77).
Insacnweacng in lutlut ac pahkotwen luhk fah wi kowos.6
Lucy Gertsch el insacnweacng in luti ke srihpen luhngse tiac tohtohlah lal.
Sang Finsrak ac Ma Pwacye
Mwet Sap Peter el fahk, “Akola pacl nukewa in topuk kutena mwet su siyuk ke finsrak se su oan in kowos.”7
Sahp finsrak se ma yohk emet ma mwet luti se kuh in kihte uh pa finsrak se ma loh ke ma pwacye ke wosasuc luhn Jisus Kraist uh.
“Ac meac se kowos ac finsrakkihn an?” Mormon el siyuck. “Liye nga fahk nuh suwos tuh ac fah oasr finsrak lowos ke iwaclah luhn Kraist ac ke kuh luhn sifilpac moulyak Lal, in moulyak nuh ke moul ma pahtpaht, ac ma inge ke srihpen luhlahlfongi lom Kacl.”8
Mwet Luti, sruhkwack puhsrewos ac fahkwack luhlahlfongi ke luhman God na pwacye. Fahkwack mwe loh lom ke Puk luhn Mormon. Fahkwack in kahlwem ke wolacna ac kahtoiyacn ma pwacye oasr in plwacn in molwelah uh. Orekmakihn kuhfwen mwe luti luhn Alu uh, yohkiyac na ma suhmuhslah an, in luti ma pwacye ke fohlohkyak ke wosasuc luhn Jisus Kraist ke nwacsnwacsiyac ac fihsrwacsrlacnaiyac. Esam pohloh kahs se luhn Mwet Lahngo uh ma fahk ke “lutlut ke Ma Simusla mweyen nuknuk mu kowos ku in konauk moul ma pahtpat kac. Ac Ma Simusla inge fahkak pa keik!”9
Kahsruh tuhlihk nuhtin God in elakihn lah meac ma pwacye ac yohk srihpac ke moul se inge. Kahsrwelos sramtweack kuh se in sulaclah innek ma e karuhnguhnuhlos ke fuhfahsryucsr nuh tok ma pahtpaht uh.
Luti ma pwacye, ac Nguhn Muhtahl fah ahtol orekma lowos an.
“Luti Keik”
Ke srihpen Jisus Kraist El ahkostwen in suwohswohs ac puhsisacl nuh sin Pahpah Tuhmwacl, El “kapkapak in lalmwetmet ac in lumahl, ac el arulacna ohi yurin God ac yurin mwet uh.”10 Kuh oasr mihsaclah lasr in oruh oacna? Oacna Jisus El ipeis pahkotwen nuh ke pahkotwen,11 kuht enenuh in mongfihsrwacsr ac sikalweni na in suk kahlwem ac etwacack sin God ke kuhiyacsr in luti wosasuc uh.
Porongo el ip na yohk srihpac se ke lutlut uh. Ke ahkoeyuck in luti uh, kuht insacnweacng in pruhe suk etwacack ac ma suwohs luhn Nguhn Muhtahl. Kuht lihpsre, kuht pruhe, kuht ipeis mwe luti luhn wosasuc, ac kuht suk luhngse luhn Pahpah nuh sesr.12
Jisus “El luti ma puspis … ke kas in pupulyuk,”13 suc ma enenuh insroac in lohng, muhta in liye ac insiyac in akihlen. Ke kuht moul ahkwoyac uh, kuht e fihsrwacsr in lihpsrei Nguhn Muhtahl, suc ma kuh in “luti [kuht] ma nukewa, ac oru [kuht] in esamak ma nukewa ma nga fahk tari nu [sesr].”14
Ke kuht topuk solsol se luhn Leum ah muh, “Luti keik,” kuht ipeis ke kuh wolacna Lal. Lwelah kuht in, tuh ohinge, fahsr nuh met ke nguhnnguhn in ahkostwen, ukweyacn Mwet Srihkasrak lasr uh luti oacna ke El sapkihn nuh sesr in luti ac lotwelah oacna ke El ke kuht in lutlut kac uh.
© 2016 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/15. Ahkkweyeyucklac ke lweng: 6/15. Lwenglah luhn First Presidency Message, March 2016. Kosraean. 12863 868
Luti ke Pweng se inge
Prestuhn Monson el suli kuht in “motko loal ke kuh [lasr] in luti ac elakihn ac in ngwet nuh sin Mwet Lahngo lasr in pa mwe kolyuck lasr ke kuht oruh uh.” Kom ac kuh in sahp motkoelah in suk ke ma suhmuhslah yurin elos suc kowos muhtwacta yohroh in suk ma loal ke innek ma Jisus Kraist El luti ac lotwelah ah. Kom kuh in ahkwot ke kuhtuh ma suhmuhslah ma Prestuhn Monson el tahfuh ah, kain fwack lun Matthew 11:29, John 5:30, ac Mark 4:2. Kom kuh in sruhmuhn lah fuhkah ma kom lotwelah kacl Kraist lah El kuh in kahsrwe kowos “in eklac wi ipeis ke kuh Lal lucng me.”