ຂ່າວສານການຢ້ຽມສອນ ເດືອນມິນາ 2016
ໄດ້ຖືກສ້າງຂຶ້ນຕາມຮູບລັກສະນະຂອງພຣະເຈົ້າ
ໃຫ້ສຶກສາຂ່າວສານນີ້ດ້ວຍການອະທິຖານ ແລະ ສະແຫວງຫາເພື່ອຈະໄດ້ຮູ້ຈັກສິ່ງທີ່ຄວນແບ່ງປັນ. ການເຂົ້າໃຈ ໃບ “ຄອບຄົວ: ການປະກາດຕໍ່ໂລກ” ຈະເພີ່ມສັດທາຂອງທ່ານໃນພຣະເຈົ້າ ແລະ ເປັນພອນໃຫ້ແກ່ຄົນທີ່ທ່ານດູແລ ຜ່ານການຢ້ຽມສອນ ໄດ້ແນວໃດ? ສຳລັບລາຍລະອຽດເພີ່ມເຕີມ, ໃຫ້ເປີດເບິ່ງທີ່ reliefsociety.lds.org.
ສັດທາ, ຄອບຄົວ, ສົງເຄາະ
“ແລ້ວພຣະເຈົ້າກໍກ່າວວ່າ, ບັດນີ້ ເຮົາຈະສ້າງມະນຸດໃຫ້ມີຮູບລັກສະນະຄືເຮົາ. …
“ດັ່ງນັ້ນ ພຣະເຈົ້າຈຶ່ງສ້າງມະນຸດໃຫ້ຄືພຣະອົງ, ພຣະອົງສ້າງເຂົາໃຫ້ເປັນຊາຍ ແລະ ຍິງ” (ປະຖົມມະການ 1:26–27).
ພຣະເຈົ້າເປັນພຣະບິດາເທິງສະຫວັນຂອງເຮົາ, ແລະ ພຣະອົງໄດ້ສ້າງເຮົາຕາມຮູບລັກສະນະຂອງພຣະອົງ. ເຖິງຄວາມຈິງນີ້, ປະທານທອມມັສ ແອັສ ມອນສັນ ໄດ້ກ່າວວ່າ: “ພຣະເຈົ້າ ອົງເປັນພຣະບິດາຂອງເຮົາ ຊຶ່ງມີພຣະກັນ ທີ່ຈະຟັງຄຳອະທິຖານຂອງເຮົາ. ພຣະອົງມີພຣະເນດ ທີ່ຈະເຫັນການກະທຳຂອງເຮົາ. ພຣະອົງມີພຣະໂອດ ທີ່ຈະກ່າວກັບເຮົາ. ພຣະອົງມີພຣະໄທ ທີ່ຈະຮູ້ສຶກ ຄວາມເຫັນອົກເຫັນໃຈ ແລະ ຄວາມຮັກ. ພຣະອົງມີຈິງ. ພຣະອົງຊົງພຣະຊົນຢູ່. ເຮົາເປັນລູກໆຂອງພຣະອົງ ທີ່ໄດ້ຖືກສ້າງຂຶ້ນຕາມຮູບລັກສະນະຂອງພຣະອົງ ເຮົາເບິ່ງຄືພຣະອົງ ແລະ ພຣະອົງເບິ່ງຄືເຮົາ.”1
“ໄພ່ພົນຍຸກສຸດທ້າຍ ນັບຖືທຸກຄົນວ່າເປັນລູກໆຂອງພຣະເຈົ້າ ໃນທຸກປະການ; ເຂົາເຈົ້ານັບຖືທຸກຄົນວ່າ ສູງສົ່ງໃນຕົ້ນກຳເນີດ, ໃນທຳມະຊາດ, ແລະ ໃນຄວາມສາມາດ.”2 ແຕ່ລະຄົນ ເປັນ “ບຸດ ຫລື ທິດາທີ່ຮັກທາງວິນຍານຂອງພຣະບິດາມານດາເທິງສະຫວັນ.”3
“[ສາດສະດາ] ໂຈເຊັບ ສະມິດ ໄດ້ຮຽນຮູ້ອີກວ່າ ພຣະເຈົ້າປະສົງໃຫ້ລູກໆຂອງພຣະອົງ ມີຊີວິດຢ່າງສູງສົ່ງ ດັ່ງທີ່ພຣະອົງມີ.”4 ດັ່ງທີ່ພຣະເຈົ້າໄດ້ກ່າວໄວ້ວ່າ, ນີ້ຄືວຽກງານຂອງພຣະອົງ ແລະ ລັດສະໝີພາບຂອງພຣະອົງ—ຄືການທີ່ຈະເຮັດໃຫ້ເກີດຄວາມເປັນອະມະຕະ ແລະ ຊີວິດນິລັນດອນຂອງມະນຸດ (ເບິ່ງ ໂມເຊ 1:39).
ຂໍ້ພຣະຄຳພີເພີ່ມເຕີມ
ປະຖົມມະການ 1:26–27; 1 ໂກຣິນໂທ 3:17; Doctrine and Covenants 130:1
ຈາກພຣະຄຳພີ
ນ້ອງຊາຍຂອງຢາເຣັດໃນພຣະຄຳພີມໍມອນ ໄດ້ຊອກຫາວິທີທີ່ຈະໃຫ້ມີຄວາມສະຫວ່າງຢູ່ໃນເຮືອ ເພື່ອພາຊາວຢາເຣັດຂ້າມນ້ຳ ໄປຫາແຜ່ນດິນແຫ່ງຄຳສັນຍາ. ລາວ “ໄດ້ຫລອມຫີນໃຫ້ເປັນກ້ອນນ້ອຍສິບຫົກກ້ອນ” ແລະ ໄດ້ອະທິຖານຂໍໃຫ້ພຣະເຈົ້າ “ແຕະຕ້ອງຫີນເຫລົ່ານີ້” ດ້ວຍພຣະຫັດຂອງພຣະອົງ “ເພື່ອມັນຈະສ່ອງແສງອອກມາໃນຄວາມມືດ.” ແລະ ພຣະເຈົ້າ “ໄດ້ເດ່ພຣະຫັດຂອງພຣະອົງອອກມາ ແລະ ແຕະຕ້ອງຫີນເຫລົ່ານັ້ນເທື່ອລະກ້ອນ.” ເຄື່ອງປິດບັງໄດ້ຖືກເອົາໄປຈາກສາຍຕາຂອງນ້ອງຊາຍຂອງຢາເຣັດ, ແລະ “ລາວໄດ້ເຫັນນິ້ວພຣະຫັດຂອງພຣະຜູ້ເປັນເຈົ້າ; ແລະ ມັນຄືກັນກັບນິ້ວມືຂອງມະນຸດ. …
“ແລະ ພຣະຜູ້ເປັນເຈົ້າໄດ້ກ່າວກັບລາວວ່າ: ເຈົ້າເຊື່ອຄຳເວົ້າຂອງເຮົາບໍ່?
“ແລະ ລາວໄດ້ຕອບວ່າ: ເຊື່ອ, ພຣະອົງເຈົ້າເອີຍ.”
ແລະ “ພຣະຜູ້ເປັນເຈົ້າໄດ້ປະກົດຕົວໃຫ້ [ນ້ອງຊາຍຂອງຢາເຣັດ] ເຫັນ” ແລະ ໄດ້ກ່າວວ່າ, “ເຈົ້າເຫັນແລ້ວບໍ່ວ່າ ເຈົ້າຖືກສ້າງຂຶ້ນຕາມຮູບລັກສະນະຂອງເຮົາ? ແທ້ຈິງແລ້ວ, ມະນຸດທັງໝົດໄດ້ຖືກສ້າງຂຶ້ນຕັ້ງແຕ່ຕົ້ນຕາມຮູບລັກສະນະຂອງເຮົາເອງ.” (ເບິ່ງ ອີເທີ 3:1–17.)
© 2016 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/15. ການແປໄດ້ຮັບອະນຸຍາດ: 6/15. ແປຈາກ Visiting Teaching Message, March 2016. Laotian. 12863 331
ໃຫ້ພິຈາລະນາສິ່ງນີ້
ການທີ່ຮູ້ວ່າ ແຕ່ລະຄົນໄດ້ຖືກສ້າງຂຶ້ນຕາມຮູບລັກສະນະຂອງພຣະເຈົ້າ ຊ່ອຍເຮົາໃນຄວາມສຳພັນຂອງເຮົາ ກັບຄົນອື່ນແນວໃດ?