ຂ່າວສານຈາກຝ່າຍປະທານສູງສຸດ, ເດືອນມິນາ 2016
“ຈົ່ງຮຽນຮູ້ຈາກເຮົາ”
ໂດຍ ປະທານທອມມັສ ແອັສ ມອນສັນ
ໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ເຮົາທຸກຄົນເປັນຄູສອນ ແລະ ເຮົາທຸກຄົນເປັນຜູ້ຮຽນ. ການເຊື້ອເຊີນທີ່ອ່ອນຫວານຈາກພຣະຜູ້ເປັນເຈົ້າຂອງເຮົາ ໄດ້ມາເຖິງທຸກຄົນ ທີ່ວ່າ: “ຈົ່ງຮຽນຮູ້ຈາກເຮົາ … ແລ້ວຈິດໃຈຂອງພວກເຈົ້າ ຈະໄດ້ພົບຄວາມເຊົາເມື່ອຍ.”1
ຂ້າພະເຈົ້າຂໍເຊື້ອເຊີນໄພ່ພົນຍຸກສຸດທ້າຍທຸກຄົນ ໃຫ້ໄຕ່ຕອງຄວາມພະຍາຍາມ ຂອງເຂົາເຈົ້າ ທີ່ຈະສອນ ແລະ ທີ່ຈະຮຽນ ແລະ ອີງຕໍ່ພຣະຜູ້ຊ່ອຍໃຫ້ລອດ ໃຫ້ເປັນຜູ້ນຳພາເຮົາ ໃນການເຮັດສິ່ງນີ້. ເຮົາຮູ້ດີວ່າ “ຄູສອນມາຈາກພຣະເຈົ້າ”2 ອົງນີ້ ເປັນຫລາຍກວ່າພຽງແຕ່ຄູສອນທຳມະດາເທົ່ານັ້ນ. ພຣະອົງ ອົງນັ້ນທີ່ໄດ້ສອນເຮົາໃຫ້ຮັກພຣະຜູ້ເປັນເຈົ້າ ອົງເປັນພຣະເຈົ້າຂອງເຮົາ ດ້ວຍສຸດໃຈ, ດ້ວຍສຸດຈິດ, ດ້ວຍສຸດກຳລັງ, ແລະ ດ້ວຍສຸດຄວາມຄິດ, ແລະ ໃຫ້ຮັກເພື່ອນບ້ານ ເໝືອນຮັກຕົນເອງ, ຄືພຣະອາຈານ ແລະ ເປັນແບບຢ່າງຂອງຊີວິດທີ່ດີພ້ອມທຸກຢ່າງ.
ພຣະອົງ ຄືຜູ້ທີ່ໄດ້ປະກາດວ່າ: “ຈົ່ງຕິດຕາມເຮົາມາ.”3 “ເຮົາໄດ້ເຮັດເປັນຕົວຢ່າງໄວ້ໃຫ້ເຈົ້າແລ້ວ.”4
ຖ້າຫາກພວກເຈົ້າບໍ່ປ່ຽນໃຈເຫລື້ອມໃສ
ພຣະເຢຊູໄດ້ສອນຄວາມຈິງທີ່ລຽບງ່າຍ ແຕ່ຊາບຊຶ້ງ ດັ່ງທີ່ມີບັນທຶກໄວ້ຢູ່ໃນພຣະທຳມັດທາຍ. ຫລັງຈາກພຣະອົງ ແລະ ສານຸສິດຂອງພຣະອົງ ໄດ້ລົງມາຈາກພູແຫ່ງການປ່ຽນສະພາບ, ພຣະອົງພ້ອມດ້ວຍເຂົາເຈົ້າ ໄດ້ຢຸດພັກຢູ່ຄາລີເລ ແລະ ແລ້ວໄດ້ໄປຍັງກາເປນາອູມ. ຢູ່ທີ່ນັ້ນ ສານຸສິດໄດ້ມາຫາພຣະເຢຊູ, ຖາມວ່າ:
“ຜູ້ໃດເປັນໃຫຍ່ ໃນລາຊາອານາຈັກສະຫວັນ?
“ພຣະເຢຊູເອີ້ນເອົາເດັກນ້ອຍຄົນໜຶ່ງມາຢືນຢູ່ທ່າມກາງພວກເພິ່ນ,
“ແລະ ກ່າວວ່າ, ເຮົາບອກພວກເຈົ້າຕາມຈິງວ່າ, ຖ້າພວກເຈົ້າບໍ່ກັບໃຈ, ແລະ ກາຍເປັນເໝືອນດັ່ງເດັກນ້ອຍ, ພວກເຈົ້າຈະເຂົ້າໄປໃນລາຊາອານາຈັກສະຫວັນບໍ່ໄດ້ຈັກເທື່ອ.”5
ໃນສາດສະໜາຈັກ, ເປົ້າໝາຍຂອງການສອນພຣະກິດຕິຄຸນ ບໍ່ແມ່ນການຖອກເທຂໍ້ມູນເຂົ້າໃນຄວາມຄິດຂອງລູກໆຂອງພຣະເຈົ້າ, ບໍ່ວ່າຈະເປັນຢູ່ໃນບ້ານ, ຢູ່ໃນຫ້ອງຮຽນ, ຫລື ຢູ່ໃນສະໜາມເຜີຍແຜ່ກໍຕາມ. ມັນບໍ່ແມ່ນການສະແດງວ່າ ພໍ່ແມ່, ຄູສອນ, ຫລື ຜູ້ສອນສາດສະໜາຮູ້ຫລາຍຂະໜາດໃດ. ແລະ ບໍ່ແມ່ນການພຽງແຕ່ເພື່ອເພີ່ມຄວາມຮູ້ເລື່ອງພຣະຜູ້ຊ່ອຍໃຫ້ລອດ ແລະ ສາດສະໜາຈັກຂອງພຣະອົງເທົ່ານັ້ນ.
ເປົ້າໝາຍຕົ້ນຕໍຂອງການສອນ ແມ່ນເພື່ອຊ່ອຍບຸດ ແລະ ທິດາຂອງພຣະບິດາເທິງສະຫວັນ ໃຫ້ກັບຄືນໄປສູ່ທີ່ປະທັບຂອງພຣະອົງ ແລະ ຊື່ນຊົມນຳຊີວິດນິລັນດອນ ຮ່ວມກັບພຣະອົງ. ໃນການເຮັດສິ່ງນີ້, ການສອນພຣະກິດຕິຄຸນ ຈະຕ້ອງເປັນການຊຸກຍູ້ເຂົາເຈົ້າໄປໃນເສັ້ນທາງແຫ່ງການເປັນສານຸສິດທຸກວັນ ແລະ ໃນພັນທະສັນຍາອັນສັກສິດ. ເປົ້າໝາຍຄືການດົນໃຈບຸກຄົນໃຫ້ຄິດກ່ຽວກັບ, ຮູ້ສຶກກ່ຽວກັບ, ແລະ ແລ້ວເຮັດບາງສິ່ງກ່ຽວກັບການດຳລົງຊີວິດຕາມຫລັກທຳພຣະກິດຕິຄຸນ. ຈຸດປະສົງຄືການພັດທະນາສັດທາໃນອົງພຣະເຢຊູຄຣິດເຈົ້າ ແລະ ກາຍເປັນຜູ້ ເຫລື້ອມໃສ ຕໍ່ພຣະກິດຕິຄຸນຂອງພຣະອົງ.
ການສອນທີ່ເປັນພອນ ແລະ ຊ່ອຍໃຫ້ເຫລື້ອມໃສ ແລະ ຊ່ອຍກູ້ ຄືການສອນຕາມແບບຢ່າງຂອງພຣະຜູ້ຊ່ອຍໃຫ້ລອດ. ຄູສອນທີ່ເຮັດຕາມແບບຢ່າງຂອງພຣະຜູ້ຊ່ອຍໃຫ້ລອດ ຈະຮັກ ແລະ ຮັບໃຊ້ຄົນທີ່ເຂົາເຈົ້າສອນ. ເຂົາເຈົ້າດົນໃຈຜູ້ຟັງ ດ້ວຍບົດຮຽນນິລັນດອນ ເຖິງຄວາມຈິງຈາກສະຫວັນ. ເຂົາເຈົ້າດຳລົງຊີວິດໃຫ້ມີຄ່າຄວນພໍທີ່ຈະເປັນແບບຢ່າງ.
ຮັກ ແລະ ຮັບໃຊ້
ການປະຕິບັດສາດສະໜາກິດທັງໝົດຂອງພຣະຜູ້ຊ່ອຍໃຫ້ລອດ ໄດ້ເປັນແບບຢ່າງເຖິງການຮັກເພື່ອນບ້ານ. ແນ່ນອນ, ຄວາມຮັກ ແລະ ການຮັບໃຊ້ຂອງພຣະອົງ ສ່ວນຫລາຍເປັນບົດຮຽນຂອງພຣະອົງ. ເໝືອນກັນນີ້, ຄູສອນທີ່ຂ້າພະເຈົ້າຈື່ໄດ້ດີທີ່ສຸດ ແມ່ນຄູສອນຜູ້ທີ່ຮູ້ຈັກ, ຜູ້ທີ່ຮັກ, ແລະ ຜູ້ທີ່ເປັນຫ່ວງເປັນໃຍ ນຳນັກຮຽນຂອງພວກເພິ່ນ. ພວກເພິ່ນໄດ້ໄປຊອກຫາແກະທີ່ເສຍໄປ. ພວກເພິ່ນໄດ້ສອນບົດຮຽນແຫ່ງຊີວິດ ຊຶ່ງຂ້າພະເຈົ້າຈະຈື່ຕະຫລອດໄປ.
ຄູສອນຄົນໜຶ່ງແມ່ນ ປ້າລູສີ ເກີດສ໌. ເພິ່ນຮູ້ຈັກນັກຮຽນທຸກຄົນຂອງເພິ່ນ. ເພິ່ນໄດ້ແວະໄປຫາຜູ້ທີ່ບໍ່ໄດ້ມາໂບດໃນວັນອາທິດນັ້ນ ຫລື ຜູ້ທີ່ບໍ່ມາໂບດເລີຍ ຢ່າງບໍ່ລົດລະ. ພວກເຮົາໄດ້ຮູ້ວ່າ ເພິ່ນເປັນຫ່ວງເປັນໃຍ ພວກເຮົາ. ບໍ່ມີຄົນໃດໃນພວກເຮົາ ທີ່ລືມບົດຮຽນ ທີ່ເພິ່ນໄດ້ສອນ.
ຫລາຍປີຈາກນັ້ນ, ໃນ. ບັ້ນທ້າຍຊີວິດຂອງປ້າລູສີ, ຂ້າພະເຈົ້າໄດ້ໄປຢ້ຽມຢາມເພິ່ນ. ພວກເຮົາໄດ້ເວົ້າລົມກັນເຖິງອະດີດ ເມື່ອຫລາຍປີກ່ອນ ຕອນເພິ່ນໄດ້ເປັນຄູສອນຂອງພວກເຮົາ. ພວກເຮົາໄດ້ເວົ້າເຖິງນັກຮຽນແຕ່ລະຄົນຢູ່ໃນຫ້ອງຮຽນ ແລະ ໄດ້ສົນທະນາກັນກ່ຽວກັບວ່າ ແຕ່ລະຄົນເປັນຈັ່ງໃດໃນເວລານີ້. ຄວາມຮັກ ແລະ ຄວາມເປັນຫ່ວງເປັນໃຍຂອງເພິ່ນ ຍືນຍົງ ໄປຕະຫລອດຊີວິດ.
ຂ້າພະເຈົ້າມັກຄຳສັ່ງສອນຂອງພຣະຜູ້ເປັນເຈົ້າ ທີ່ພົບເຫັນຢູ່ໃນ Doctrine and Covenants ທີ່ວ່າ,
ພຣະອົງ ໄດ້ປະທານພຣະບັນຍັດຂໍ້ໜຶ່ງແກ່ເຮົາ ວ່າເຮົາຄວນສອນຄຳສອນຂອງອານາຈັກໃຫ້ກັນແລະກັນ.
ວ່າໃຫ້ເຮົາສອນຢ່າງພາກພຽນ ແລະ ພຣະຄຸນຂອງພຣະອົງ ຈະຢູ່ກັບເຮົາ.6
ປ້າລູສີ ເກີດສ໌ ໄດ້ສອນຢ່າງພາກພຽນ ເພາະເພິ່ນຮັກຢ່າງບໍ່ອິດບໍ່ເມື່ອຍ.
ໃຫ້ຄວາມຫວັງ ແລະ ຄວາມຈິງ
ອັກຄະສາວົກເປໂຕ ໄດ້ແນະນຳວ່າ, “ຈົ່ງພ້ອມຢູ່ສະເໝີ ເພື່ອພວກເຈົ້າຈະສາມາດຕອບແກ້ຕົວໄດ້ ຕໍ່ທຸກຄົນທີ່ຖາມພວກເຈົ້າວ່າ ເຈົ້າມີເຫດຜົນປະການໃດຈຶ່ງມີຄວາມຫວັງຢ່າງນີ້.”7
ບາງທີ ຄວາມຫວັງທີ່ຍິ່ງໃຫຍ່ທີ່ສຸດ ທີ່ຄູສອນສາມາດມອບໃຫ້ແມ່ນ ຄວາມຫວັງທີ່ພົບເຫັນ ໃນຄວາມຈິງຂອງພຣະກິດຕິຄຸນຂອງພຣະເຢຊູຄຣິດ.
“ແລະ ແມ່ນອັນໃດທີ່ທ່ານຈະຫວັງ?” ມໍມອນໄດ້ຖາມ. “ຈົ່ງເບິ່ງ ຂ້າພະເຈົ້າກ່າວກັບທ່ານວ່າ ທ່ານຈະມີຄວາມຫວັງໂດຍທາງການຊົດໃຊ້ຂອງພຣະຄຣິດ ແລະ ໂດຍອຳນາດຂອງການຟື້ນຄືນພຣະຊົນຂອງພຣະອົງ, ເພື່ອຖືກຍົກຂຶ້ນສູ່ຊີວິດນິລັນດອນ, ແລະ ນີ້ເພາະສັດທາຂອງທ່ານທີ່ມີໃນພຣະອົງ.”8
ຄູສອນທັງຫລາຍ, ຈົ່ງເປັ່ງສຽງ ແລະ ເປັນພະຍານເຖິງລັກສະນະທີ່ແທ້ຈິງ ຂອງຝ່າຍພຣະເຈົ້າ. ຈົ່ງປະກາດການເປັນພະຍານຂອງທ່ານ ກ່ຽວກັບພຣະຄຳພີມໍມອນ. ບອກເຖິງຄວາມຈິງ ທີ່ດີເລີດ ແລະ ສວຍງາມ ຊຶ່ງບັນຈຸຢູ່ໃນແຜນແຫ່ງຄວາມລອດ. ຈົ່ງໃຊ້ອຸປະກອນຂອງສາດສະໜາຈັກທີ່ໄດ້ຖືກອະນຸມັດໃຫ້ແລ້ວ, ໂດຍສະເພາະ ພຣະຄຳພີ, ເພື່ອສອນຄວາມຈິງທີ່ຖືກຟື້ນຟູຄືນມາໃໝ່ ຂອງພຣະເຢຊູຄຣິດ ໃນຄວາມບໍລິສຸດ ແລະ ໃນຄວາມລຽບງ່າຍຂອງມັນ. ຈົ່ງຈື່ຈຳຄຳສັ່ງສອນຂອງພຣະຜູ້ຊ່ອຍໃຫ້ລອດ ທີ່ວ່າ “ໃຫ້ຄົ້ນຫາໃນພຣະຄຳພີ, ເພາະຄິດວ່າ ຈະພົບຊີວິດນິລັນດອນ: ແມ່ນພຣະຄຳພີນີ້ແຫລະ ທີ່ເປັນພະຍານໃຫ້ເຮົາ.”9
ຈົ່ງຊ່ອຍລູກໆຂອງພຣະເຈົ້າ ໃຫ້ເຂົ້າໃຈວ່າ ສິ່ງໃດເປັນສິ່ງທີ່ແທ້ຈິງ ແລະ ສຳຄັນ ໃນຊີວິດນີ້. ຈົ່ງຊ່ອຍເຫລືອເຂົາເຈົ້າພັດທະນາຄວາມເຂັ້ມແຂງ ທີ່ຈະເລືອກເສັ້ນທາງ ທີ່ຈະຮັກສາເຂົາເຈົ້າໄວ້ໃນຄວາມປອດໄພ ໃນຂະນະທີ່ດຳເນີນໄປສູ່ຊີວິດນິລັນດອນ.
ຈົ່ງສອນຄວາມຈິງ, ແລະ ພຣະວິນຍານບໍລິສຸດ ຈະຊ່ອຍເຫລືອທ່ານ ໃນຄວາມພະຍາຍາມຂອງທ່ານ.
“ຈົ່ງຮຽນຮູ້ຈາກເຮົາ”
ເພາະພຣະເຢຊູໄດ້ເຊື່ອ ແລະ ໄດ້ອ່ອນນ້ອມຍອມຟັງຕໍ່ພຣະບິດາຂອງພຣະອົງຢ່າງສົມບູນ, ພຣະອົງຈຶ່ງ “ໄດ້ຈະເລີນເຕີບໃຫຍ່ຂຶ້ນ ໃນດ້ານສະຕິປັນຍາ ແລະ ໃນດ້ານຮ່າງກາຍ, ເປັນທີ່ພໍພຣະໄທຕໍ່ພຣະເຈົ້າ ແລະ ຕໍ່ມະນຸດດ້ວຍ.”10 ເຮົາມີຄວາມຕັ້ງໃຈທີ່ຈະເຮັດເຊັ່ນນັ້ນເໝືອນກັນບໍ? ເຊັ່ນດຽວກັບ ພຣະເຢຊູ ໄດ້ຮັບຈາກພຣະຄຸນໜຶ່ງ ຫາອີກພຣະຄຸນໜຶ່ງ,11 ເຮົາຕ້ອງສະແຫວງຫາຄວາມສະຫວ່າງ ແລະ ຄວາມຈິງ ຈາກພຣະເຈົ້າ ດ້ວຍຄວາມອົດທົນ ແລະ ບໍ່ລົດລະ ໃນຄວາມພະຍາຍາມຂອງເຮົາ ທີ່ຈະຮ່ຳຮຽນພຣະກິດຕິຄຸນ.
ການຮັບຟັງ ເປັນພາກສ່ວນສຳຄັນຂອງການຮຽນຮູ້. ເມື່ອຕຽມທີ່ຈະຮັບການສັ່ງສອນ, ເຮົາຕ້ອງອະທິຖານເພື່ອຂໍການດົນໃຈ ແລະ ການຢືນຢັນ ຈາກພຣະວິນຍານບໍລິສຸດ. ເຮົາໄຕ່ຕອງ, ເຮົາອະທິຖານ, ເຮົານຳໃຊ້ບົດຮຽນກ່ຽວກັບພຣະກິດຕິຄຸນ, ແລະ ເຮົາສະແຫວງທີ່ຈະເຮັດຕາມພຣະປະສົງຂອງພຣະບິດາ ທີ່ມີສຳລັບເຮົາ.12
ພຣະເຢຊູ “ໄດ້ໃຊ້ຄຳອຸປະມາຫລາຍເລື່ອງເພື່ອສອນ… ,”13 ຊຶ່ງຮຽກຮ້ອງຫູໃຫ້ຟັງ, ຕາໃຫ້ເຫັນ, ແລະ ຫົວໃຈໃຫ້ເຂົ້າໃຈ. ເມື່ອເຮົາດຳລົງຊີວິດຢ່າງມີຄ່າຄວນ, ເຮົາຈະໄດ້ຍິນສຽງຊື່ມຂອງພຣະວິນຍານບໍລິສຸດ ໄດ້ດີກວ່າເກົ່າ, ຊຶ່ງຈະ “ສັ່ງສອນ [ເຮົາ] ທຸກສິ່ງ, ແລະ ຈະເຕືອນໃຫ້ [ເຮົາ] ລະນຶກເຖິງທຸກສິ່ງ.”14
ເມື່ອເຮົາຮັບເອົາການເຊື້ອເຊີນອັນອ່ອນຫວານຂອງພຣະຜູ້ຊ່ອຍໃຫ້ລອດ ທີ່ວ່າ, “ຈົ່ງຮຽນຮູ້ຈາກເຮົາ,” ເຮົາຈະກາຍເປັນຄົນທີ່ຮັບເອົາອຳນາດແຫ່ງສະຫວັນຂອງພຣະອົງ. ດັ່ງນັ້ນ ຂໍໃຫ້ເຮົາຈົ່ງດຳເນີນໄປໜ້າ ດ້ວຍວິນຍານແຫ່ງການເຊື່ອຟັງ, ເຮັດຕາມພຣະອົງທີ່ເປັນແບບຢ່າງ ໂດຍການສອນ ດັ່ງທີ່ພຣະອົງປະສົງໃຫ້ເຮົາສອນ ແລະ ຮຽນຮູ້ ດັ່ງທີ່ພຣະອົງປະສົງໃຫ້ເຮົາຮຽນຮູ້.
© 2016 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/15. ການແປໄດ້ຮັບອະນຸຍາດ: 6/15. ແປຈາກ First Presidency Message, March 2016. Laotian. 12863 331
ການສອນຈາກຂ່າວສານນີ້
ປະທານມອນສັນ ເຊື້ອເຊີນເຮົາໃຫ້ “ໄຕ່ຕອງຄວາມພະຍາຍາມ ຂອງ [ເຮົາ] ທີ່ຈະສອນ ແລະ ທີ່ຈະຮຽນ ແລະ ອີງຕໍ່ພຣະຜູ້ຊ່ອຍໃຫ້ລອດເປັນຜູ້ນຳພາເຮົາ ໃນການເຮັດສິ່ງນີ້. ທ່ານຄວນຄິດທີ່ຈະຄົ້ນຄວ້າພຣະຄຳພີກັບຄົນທີ່ທ່ານໄປຢ້ຽມສອນ ເພື່ອຊອກຫາຄວາມຮູ້ກ່ຽວກັບວິທີທີ່ພຣະເຢຊູຄຣິດໄດ້ສອນ ແລະ ໄດ້ຮຽນຮູ້. ທ່ານສາມາດເລີ່ມຕົ້ນດ້ວຍພຣະຄຳພີບາງຂໍ້ ທີ່ປະທານມອນສັນໄດ້ອ້າງເຖິງ, ດັ່ງເຊັ່ນ ມັດທາຍ 11:29, ໂຢຮັນ 5:30, ແລະ ມາຣະໂກ 4:2. ທ່ານສາມາດສົນທະນາ ເຖິງສິ່ງທີ່ທ່ານໄດ້ຮຽນຮູ້ກ່ຽວກັບພຣະເຢຊູ ຈະສາມາດຊ່ອຍທ່ານ “ໃຫ້ກາຍເປັນຄົນທີ່ຮັບເອົາອຳນາດແຫ່ງສະຫວັນຂອງພຣະອົງ” ໄດ້ແນວໃດ.