Etop eke First Presidency, Ofiong Ita eke isua 2016
Ekpebe Mi
Emi otode President Thomas S. Monson
Ke Ufok Abasi Jesus Christ eke mme Ndisana-owo ke Ukpere Edem Ini, kpukpru nnyin idi mme andikpeb nko kpukpru nnyin idi mme andibo-ukpeb. Jehovah ono sung-sung ikoot emi esok kpukpru owo ete, ”Ekpebe Mi … ndien mbufo eyekut nduok-odudu eno ukpong mbufo.”1
Ami mmekot ofuri mme Latter-day Saints nte esin ukeme mmo ke ndikpeb nnyung mbo ukpeb nnyung nse Andinyanga nte Adausung ke ndinam oro. Nnyin imediongo ete ke ”andikpeb enye emi oto Abasi”2 ama okpon akan ukpok-ukpok andikpeb. Enye emi ekekpebde nnyin ete ima Jehovah Abasi nnyin ke ofuri esit nnyin, ke ofuri ukpong nnyin, ke ofuri odudu nnyin, ke ofuri ekikere nnyin, inyung ima mbohidung nnyin nte idem nnyin edi Akwa Andikpeb ye Eti-uwutnkpo eke edinen uwem.
Enye edi owo emi okofioride ete, ”Di, etiene mi.”3 “Ami mmeno mbufo uwutnkpo.”4
Ke Mibohoke Mbufo Ekabare-esit
Jesus ama ekpeb mmem-mmem ye ata akpaniko nte ekewetde ke nwed Matthew. Ke Enye ye Mbet Esie ema ekesuhore eto Obot Transfiguration edi, mmo ema eduok-odudu ke Galilee ndien edikem eka ke Capernaum. Do ke mme mbet ebup Jesus, ete,
Anie ndien okpon akan ke Obio Ubong Heaven?
Ndien Jesus okot ekpri eyenowong edi, onim enye ke ufot mmo.
“Ete, Ke akpaniko ke ndoho mbufo, Ibohoke mbufo ewongore, ekabare etie nte mkpri nditowong, mbufo ididukke ke Obio Ubong Heaven.“5
Ke Ufok Abasi, ntak edikpeb iko Abasi idige ke andikpeb ndinwanga etop nsin ke ekikere ndito Abasi, mme ekpedi ke ufok, ke ubet ukpebnkpo, mme ke anwa mission. Oro idige ndiwut adanga ukpebnkpo eke ete ye eka, andikpeb, mme okworo-iko Abasi ediongode. Nko oro inyung idige ndikori ke ifiok mbanga Andinyanga ye Ufok Abasi Esie.
Ata akpan ntak edikpeb nkpo edi ndinwam ndito irenowo ye iban eke Ete ke Enyong efiak-enyong eka iso Esie enyung edara nsinsi uwem ye Enye. Man enam emi, ukpebnkpo iko Abasi enyene ndino mmo uko ke mkpafaha usung eke owo-mbet k’usen-k’usen ye ke mme ndisana ediomo. Ntak edi man anam mme owo ekere ebanga, ekop ebanga, ndien edikem enam nkpo ebanga ndidu-uwem ntiene ukpebnkpo iko Abasi. Ata ntak edi man etongo-enyene mbuotidem ke Obong Jesus Christ enyung ewongore ekabare-esit etiene iko Abasi Esie.
Ukpebnkpo eke owongore onyung odiongde onyung anwangade edi ukpebnkpo eke etienede uwutnkpo eke Andinyanga. Mme andikpeb eke etienede uwutnkpo eke Andinyanga ema enyung enwam mbon owo emi mmo ekpebde. Mmo enam mme andikop ukpebnkpo mmo enyene nsinsi ukpebnkpo eke edisana akpaniko. Mmo edu uwem eke odotde se ekpetiene.
Ma yung Nwam
Ofuri utom ukworo-iko Abasi eke Andinyanga okowut ndinyene ima nno mbohidung. Ke akpaniko, ima ye utom-unwam Esie ekesiwak ndidi ukpebnkpo Esie. Ke ukem usung oro, mme andikpeb eke ami ntim ntide ofon edi mme andikpeb emi ekdiongode, emade enyung ekerede-nkpo ebanga ndito-ufoknwed mmo. Mmo ema eyom erong emi okosopde. Mmo ema ekpeb mme ukpebnkpo eke uwem eke ami nditide ke ofuri ini.
Andikpeb kiet eketiede ntem ekedi Lucy Gertsch. Enye ama odiongo ndito-ufoknwed esie kiet-kiet. Enye ikesitreke ndika nkese mbon eke midukke Ederi ye mbon eke midighe-di ufok Abasi. Nnyin ima idiongo ete ke enye ekere-nkpo abanga nnyin. Iduhe owo kotu nnyin emi edifrede enye ye mme ukpebnkpo emi enye ekekpebde.
Ke ediwak isua ama ekebe, ini emi Lucy ekekperede utit uwem esie, ami mma nkesobo ye enye. Nnyin ima ifiak iketi kabanga mme ediwak anyan usen oro emi ekebede kini enye ekedide andikpeb nnyin. Nnyin ima iting-iko ibanga ofuri mbon class nnyin oro kiet-kiet inyung ineme ibanga se owo kiet-kiet enamde idahaemi. Ofuri eyo-uwem esie okoyoho ke ima ye nting-enyin.
Ami mmema item Abasi eke ikutde ke nwed Doctrine ye Covenants ete,
“Jehovah owuk nnyin ete ikpeb kiet eken ntotungo ukpebnkpo eke Obiop Ubong.
“Edieke nnyin itimde ikpeb, mfon Esie eyedi udeme nnyin.”6
Lucy Gertsch ama etim ekpeb-nkpo koro enye amam enyene ata ima.
Nno Idorenyin ye Akpaniko
Apostle Peter eketeme ete, “Ke kpukpru ini ebenge idem ndiboro kpukpru owo eke edibupde mbufo ntak idori-enyin emi mbufo enyenede.”7
Ebiet nte nkpon-nkan idorenyin eke andikpeb ekpekemede ndino edi idorenyin eke ikutde ke mme akpaniko emi odude ke iko Abasi Jesus Christ.
Nso ke mbufo edinyene idorenyin ibanga? Mormon okobup. “Mmodo, ami ndoho mbufo nte mbufo edinyene idorenyin ito erisio-isop Christ ye odudu eriset-ke-mkpa esie, man osim nsinsi uwem, oto ke mbuotidem mbufo ke enye.”8
Mme andikpeb, esioro uyo mbufo enyung eting-iko-ntiense ebanga akpaniko uduot-obot eke Mbuot-Abasi. Efiori ntiense mbufo kabanga Nwed Mormon. Nam efiok mme enyene-ubong ye ndiye akpaniko eke odude ke uduak erinyanga-ukpong. Da mme nkpo-ukpebnkpo emi ufok Abasi enyimede, akpan-akpan mme nwed Abasi, kpeb mme akpaniko eke mfiak-nda-ndi iko Abasi Jesus Christ ke edisana ye ke ndimem usung mmo. Ti ewuho Andinyanga ke ndidungore Nwed Abasi, “koro mbufo esede ete mme imo imenyene nsinsi uwem ke esit, ndien edi enye edi ntiense ono Mi.”9
Nwam ndito Abasi ndifiok se idi eti ye akpan-nkpo ke uwem emi. Nwam mmo ndinyene ukeme ndimek mme usung eke edikpemede mmo ida ika usung nsinsi uwem.
Kpeb akpaniko, ndien Edisana Spirit eyenwam fi.
Ekpebe Mi
Koro Jesus Christ ekedi eti okop-item onyung osuk-ibuot ono Ete Esie, “Enye ama okori ke eti ibuot ye idaha.”10 onyung ododiong edi eyen mfon-iso ke iso Abasi ye ke iso owo. Ukem nte Jesus okobode mfon ke mfon,”11 ana nnyin ida ime inyung iyire iyom unwana ye ifiok eketode Abasi ke ukeme nnyin man ikpeb iko Abasi.
Ndikpang-utong edi ata-akpan nkpo ke ndikpeb-nkpo. Ini emi nnyin ibengeke-idem ndibo ukpeb, nnyin ke akam iyom ifiok ye osongo eketode Edisana Spirit. Nnyin ikere-ke-esit, ibong-akam, ida mme ukpebnkpo iko Abasi, inyung iyom se idi uduak eke Ete ino idem nnyin.12
Jesus “akada … mbuk-nke ekpeb ediwak nkpo,”13 emi anade eda utong okop, eda enyin okut, onyung eda esit efiok. Kini nnyin idude uwem eke odotde, nnyin iyetim ikop sung-sung uyo eke Edisana Spirit ofon, emi edikemede ndikpeb [nnyin] kpukpru nkpo, onyung anam [nnyin] iti kpukpru nkpo.14
Ini emi nnyin iyerede sung-sung ikoot Abasi ete, Ekpebe Mi, nnyin imekabare ibuana ke edisana odudu Esie. Yak nnyin ndien, ika iso ke spirit nkopitem, itiene Eti-Uwutnkpo nnyin ke ndikpeb-nkpo ke nte Enye okpoyomde ete nnyin ikpeb inyung ibo ukpeb ke nte Enye okpoyomde ete nnyin ibo ukpeb.
© 2016 eketode Intellectual Reserve, Inc. Emenim kpukpru unen. Ekeming ke USA Enyime edikabare ke Iko Mbakara: 6/15. Enyime edikabare, 6/15. Ndikabare Etop eke First Presidency Message, March 2016. Efik 12863 553
Ukpebnkpo eketode Etop Emi
President Monson okot nnyin ete ikere-ke-esit ibanga ukeme [nnyin] ke ndikpeb nnyung mbo-ukpeb nnyung nse Andinyanga nnyin nte Adausung nnyin ke ndinam ntre. Mbufo emekeme ndikere mbanga ndidungo Nwed Abasi ye mbon emi mbufo ekesede man ekut ifiok-ke-esit mme usung nte Jesus Christ ekekpebde onyung obode-ukpeb. Mbufo emekeme nditongo ye ubak mme itie Nwed Abasi emi President Monson akasiakde, nte Matthew 11:29, John 5:30, ye Mark 4:2. Mbufo emekeme ndineme nte se mbufo ekekpebde ebanga Christ edinwamde mbufo ndikabare mbuana ke edisana odudu Esie.