Mesaj Premye Prezidans lan, Mas 2016
Aprann nan men mwen
Prezidan Thomas S. Monson
Nan Legliz Jezikri pou Sen Dènye Jou yo, yo ba nou opòtinite ak benediksyon pèsonèl pou nou sèvi. Nou tout resevwa envitasyon sa a nan men Senyè a: “Aprann nan men mwen … epi w ap jwenn repo pou nanm ou.”1
M envite tout Sen Dènye Jou yo pou yo reflechi sou efò yo pou ansenye ak aprann epi gade sou Sovè a kòm Gid pandan y ap fè sa. Nou konnen “enstriktè sa a soti nan Bondye”2 a te plis pase yon senp enstriktè. Limenm ki te ansenye nou pou nou renmen Senyè a, Bondye nou, avèk tout kè nou, tout nanm nou tout fòs nou, epi pou nou renmen pwochen nou menm jan nou renmen tèt nou an, se Mèt Enstriktè epi se Modèl lavi pafè a.
Se limenm ki te deklare: “Vini, swiv mwen.”3 “M trase yon egzanp pou ou.”4
Amwens ke nou konvèti
Jezi te ansenye yon verite senp e pwofon ke nou jwenn nan Matye. Apre Li ak disip Li yo te desann soti nan Montay Transfigirasyon an, yo te fè yon ti rete nan Galile epi apre sa yo te ale nan Kapènaoum. La disip yo te vin jwenn Jezi, yo te mande:
“Kimoun ki pi gran nan wayom syèl la?
“Epi Jezi te rele yon timoun piti pou vin jwenn li, e li te mete l nan mitan yo,
“Epi li te di, Anverite m ap di nou nou pa tounen tankou yon timoun piti, nou p ap ka antre nan wayom syèl la.”5
Nan legliz la, bi pou anseye levanjil la se pa pou vide enfòmasyon nan lespri pitit Bondye yo, keseswa lakay, nan klas, oubyen nan chan misyon an. Se pa pou montre konbyen paran yo, enstriktè a, oubyen misyonè yo konnen. Se pa sèlman pou ògmante konesans sou Sovè a ak Legliz Li a.
Objektif debaz ansèyman an se pou ede pitit gason ak piti fi Pè Selès yo retounen nan prezans Li e jwi lavi etènèl avèk Li. Pou fè sa, ansèyman levanjil dwe ankouraje yo sou chemen disip yo ak chemen alyans sakre yo chak jou. Objektif prensipal la se pou enspire moun yo endividyèlman pou yo panse pou viv prensip levanjil yo, asimile yo epi aji an konsekans. Objektif la se pou devlope lafwa nan Senyè Jezikri ak pou vin konvèti nan levanjil Li ya.
Ansèyman ki beni ak konvèti ak sove lavi se ansèyman ki suiv egzanp Sovè a. Enstriktè ki suiv egzanp Sovè a renmen e sèvi moun y ap anseye yo. Yo enspire moun kap tande yo avèk leson etènèl verite divin. Yo viv lavi moun ka imite.
Renmen e Sèvi
Ministè total Sovè a montre nou egzanp amou pou pwochen nou. Anfèt, amou Li ak sèvis Li sete souvan leson Li. Menm jan sa a, enstriktè m pi sonje yo se enstriktè ki te byen konnen etidyan yo, ki te renmen yo, epi sousye pou yo. Yo te cheche brebi pèdi a . Yo te anseye leson lavi m ap toujou sonje.
Yonn nan enstriktè sa yo sete Lucy Gertsch. Li te konnen chak etidyan l yo. Li pa t jan m bliye pou l te rele sa ki te rate yon Dimanch yo oubyen ki pa t vini ditou yo. Nou te konnen li te sousye pou nou. Pa gen yonn nan nou ki janm bliye li ni leson li te anseye nou yo.
Anpil ane apre, lè Lucy te prèske nan fen lavi li, m t al vizite li. Nou te pale sou tan lontan sa yo lè li te enstriktè nou an. Nou te pale apwopo chak manm klas nou yo ak sou sa yo chak ap fè kounyea. Amou ak enterè li pou nou te kouvri tout yon lavi.
M renmen egzòtasyon Senyè a nou jwenn nan Doktrin ak Alyans yo:
“Epi m ba nou kòmandman pou nou youn anseye lòt doktrin wayòm nan.
“Ansenye avèk dilijans epi lagras mwen ap vini sou nou.”6
Lucy Gertsch te anseye avèk dilijans paske li te renmen san fayi.
Ofri Espwa ak Verite
Apot Pyè te konseye: “Toujou pare pou reponn tout moun ki mande nou rezon esperans ki nan nou an.”7
Petèt pi gwo esperans yon enstriktè ka ofri se esperans nou jwenn nan verite yo ki nan levanjil Jezikri a.
Mòmon te mande: “Epi, ki sa nou dwe espere?” “Gade, m di nou, nou dwe gen esperans nan ekspyasyon Kris la ak pouvwa rezirèksyon li a, pou nou resisite nan lavi etènèl, e se poutèt lafwa nou nan li, dapre pwomès la.”8
Enstriktè yo, leve vwa nou e temwaye konsènan vrè nati divinite a. Deklare temwayaj nou konsènan Liv Mòmon an. Transmèt bèl verite gloriye yo ki nan plan Sali a. Itilize materyèl Legliz la apwouve, espesyalman ekriti yo, pou ansenye verite levanjil retabli Jezikri yo nan pite yo ak senplisite yo. Sonje egzòtasyon Sovè a pou nou “sonde ekriti yo; paske ladan yo nou panse n ap jwenn lavi etènèl: e se yomenm ki temwaye de mwen.”9
Ede pitit Bondye yo konprann sa ki reyèl ak enpotan nan lavi sa a. Ede yo develop fòs pou yo chwazi chemen ki ap kenbe yo ansekirite sou wout lavi etènèl la.
Anseye laverite, e Sentespri a ap sipòte efò ou yo.
“Aprann nan men mwen”
“Paske Jezikri te pafètman obeyisan e soumèt devan Papa Li, Li te “ grandi an sajès, ak nan wotè, ak nan lagras devan Bondye ak devan lèzòm.”10 Èske nou gen detèminasyon pou nou fè menmjan an? Menm jan Jezi “te resevwa gras sou gras,” la11 avèk pasyans ak pèsistans, nou dwe chèche limyè ak konesans nan men Bondye nan efo nou pou nou aprann levanjil la.
Tande se yon eleman esansyèl nan aprann. Lè n ap prepare pou nou aprann, nou priye pandan n ap chèche enspirasyon ak konfimasyon Sentespri a. Nou medite, nou priye, nou aplike leson levanjil yo, epi nou chèche konnen kisa Papa a vle nou fè.12
Jezi “te anseye … anpil bagay an parabòl,”13 ki mande zòrèy pou nou tande, zye pou nou wè, ak kè pou nou konprann. Si nou viv diy, nou ka plis tande chichotman Sentespri a, ki ka “anseye [nou] tout bagay, e fè nou sonje tout bagay.”14
Lè nou reponn a envitasyon dous Senyè a, “Aprann nan men mwen,” an, nou vin patisipan nan pouvwa divin ni. Se poutèt sa, annou avanse nan espri obeyisans, pandan n ap suiv Egzanp nou an nan ansenye jan Li ta vle nou ansenye ak aprann jan Li ta vle nou aprann.
© 2016 pay Intellectual Reserve, Inc. Tout dwa rezève. Enprime nan Etazini Damerik. Apwobasyon Anglè: 6/15 Apwobasyon tradiksyon: 6/15 Tradiksyon First Presidency Message, March 2016. Haitian Creole 12863 036
Ansèyman nan mesaj sa a
Prezidan Monson envite nou pou “medite sou efò nou pou anseye ak aprann yo epi pou nou itilize Sovè a kòm Gid nou lè nou ap fè sa a.” Ou gen dwa sonde ekriti yo avèk moun w ap vizite yo pou jwenn ide sou fason Jezikri te ansenye ak aprann. Ou gen dwa kòmanse avèk kèk ekriti Prezidan Monson fè referans yo, tankou Matye 11:29 Jan 5:30 Mak 4:2 Ou gen dwa diskite sou fason sa ou prann osijè Kris la ka ede ou “vin pi byen patisipe nan pouvwa divin ni.”