សារលិខិតគណៈប្រធានទីមួយ ខែ មិនា ឆ្នាំ ២០១៦
« រៀននឹងខ្ញុំចុះ »
ដោយ ប្រធាន ថូម៉ាស អេស. ម៉នសុន
នៅក្នុងសាសនាចក្រ នៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ យើងទាំងអស់គ្នាគឺជាគ្រូបង្រៀន និងយើងទាំងអស់គ្នាគឺជាអ្នករៀនសូត្រ ។ ព្រះអម្ចាស់របស់យើងបានផ្ដល់ការអញ្ជើញដ៏ទន់ភ្លន់នេះដល់មនុស្សគ្រប់រូប៖ « រៀននឹងខ្ញុំចុះ … នោះអ្នករាល់គ្នានឹងបានសេចក្តីសំរាកដល់ព្រលឹង »។១
ខ្ញុំសូមអញ្ជើញពួកបរិសុទ្ធគ្រប់រូបទាំងអស់ឲ្យពិចារណាអំពីកិច្ចខិតខំប្រឹងប្រែងរបស់ពួកគេដើម្បីបង្រៀន និងរៀនសូត្រ ហើយឲ្យមើលទៅព្រះអង្គសង្រ្គោះដែលជាអ្នកនាំផ្លូវរបស់យើងនៅក្នុងកិច្ចការនេះ។ យើងដឹងថា « លោកគ្រូនេះមកពីព្រះ »២ គឺលើសពីគ្រូធម្មតាម្នាក់។ ទ្រង់បានបង្រៀនយើងឲ្យស្រឡាញ់ព្រះអម្ចាស់ដែលជាព្រះរបស់យើង ឲ្យអស់ពីចិត្ត អស់ពីព្រលឹង អស់ពីគំនិត ហើយអស់ពីកម្លាំងរបស់យើង និង ស្រឡាញ់អ្នកជិតខាងខ្លួនដូចខ្លួនយើង ព្រះអង្គគឺជាគ្រូបង្រៀនដ៏ឈ្លាសវៃបំផុត និងជាគំរូនៃជីវិតដ៏ល្អឥតខ្ចោះ ។
ទ្រង់ជាអង្គដែលបានប្រកាសថា ៖ « ចូរមកតាមខ្ញុំចុះ » ។៣ « យើងបានធ្វើជាគំរូដល់អ្នករាល់គ្នា »។៤
បើអ្នករាល់គ្នាមិនផ្លាស់គំនិត
ព្រះយេស៊ូវបង្រៀនដោយសាមញ្ញ តែជាសេចក្តីពិតដ៏ជ្រាលជ្រៅ ដូចដែលបានកត់ត្រានៅក្នុងម៉ាថាយ។ បន្ទាប់ពីទ្រង់ និងសិស្សរបស់ទ្រង់បានចុះមកពីភ្នំប្រែរូប ពួកទ្រង់បានឈប់នៅស្រុកកាលីឡេ ហើយទៅស្រុកកាពើណិម ។ នៅទីនោះពួកសិស្សបានចូលមកព្រះយេស៊ូវ ហើយសួរថា៖
« តើអ្នកណាធំជាងគេក្នុងនគរស្ថានសួគ៌?
« តែទ្រង់ហៅកូនក្មេងតូច១មកដាក់នៅកណ្តាលពួកគេ
« រួចមានព្រះបន្ទូលថា ខ្ញុំប្រាប់អ្នករាល់គ្នាជាប្រាកដថា បើអ្នករាល់គ្នាមិនផ្លាស់គំនិត ហើយត្រឡប់ដូចជាកូនតូចនេះ នោះនឹងចូលទៅក្នុងនគរស្ថានសួគ៌ពុំបានឡើយ »។៥
គោលដៅនៃការបង្រៀនដំណឹងល្អនៅក្នុងសាសនាចក្រ គឺមិនមែនដើម្បីចាក់ស្រោចព័ត៌មានចូលទៅក្នុងគំនិតកូនចៅព្រះនោះទេ ទោះជាក្នុងគេហដ្ឋាន ក្នុងថ្នាក់ ឬនៅក្នុងតំបន់បេសកកម្មក្តី។ វាមិនមែនជាការបង្ហាញពីរបៀបដែលឪពុកម្តាយ គ្រូបង្រៀន ឬអ្នកផ្សព្វផ្សាយដឹងច្រើនប៉ុណ្ណានោះទេ។ ក៏មិនគ្រាន់តែជាការរីកចម្រើនខាងចំណេះដឹងអំពីព្រះអង្គសង្គ្រោះ និង សាសនាចក្ររបស់ទ្រង់នោះដែរ ។
គោលដៅគ្រឹះនៃការបង្រៀនគឺដើម្បីជួយបុត្រាបុត្រី នៃព្រះវរបិតាសួគ៌ឲ្យត្រឡប់ទៅកាន់ទីវត្តមានរបស់ទ្រង់ និងរីករាយក្នុងជីវិតដ៏អស់កល្បជាមួយទ្រង់។ ដើម្បីធ្វើដូច្នេះ នោះការបង្រៀនដំណឹងល្អត្រូវតែមានការលើកទឹកចិត្តពួកគេ នៅតាមផ្លូវនៃភាពជាសិស្ស និងសេចក្តីសញ្ញាដ៏ពិសិដ្ឋរាល់ថ្ងៃ។ គោលបំណង គឺដើម្បីបំផុសគំនិតដល់បុគ្គលម្នាក់ៗឲ្យគិត ទទួលអារម្មណ៍ ហើយបន្ទាប់មកធ្វើអ្វីម៉្យាងចំពោះការរស់នៅតាមគោលការណ៍ទាំងឡាយនៃដំណឹងល្អ ។ ទិសដៅគឺដើម្បីអភិវឌ្ឍសេចក្ដីជំនឿទៅលើព្រះអម្ចាស់ព្រះយេស៊ូវគ្រីស្ទ ហើយ ផ្លាស់ប្រែចិត្តជឿ ចំពោះដំណឹងល្អរបស់ទ្រង់។
ការបង្រៀនដែលប្រទានពរ ផ្លាស់ប្រែចិត្តជឿ និងទទួលការសង្គ្រោះ គឺជាការបង្រៀនដោយធ្វើត្រាប់តាមគំរូរបស់ព្រះអង្គសង្គ្រោះ។ គ្រូបង្រៀនដែលធ្វើត្រាប់តាមគំរូរបស់ព្រះអង្គសង្គ្រោះ ស្រឡាញ់ និងបម្រើដល់អស់អ្នកដែលពួកគេបង្រៀន។ ពួកគេបំផុសគំនិតដល់អ្នកស្តាប់របស់ពួកគេ ជាមួយនឹងមេរៀននៃសេចក្តីពិតដ៏ទេវភាពអស់កល្បជានិច្ច។ ពួកគេរស់នៅក្នុងជីវិតដ៏សក្តិសមនៃការធ្វើតាមគំរូ។
សេចក្តីស្រឡាញ់ និងការបម្រើ
ការបម្រើទាំងមូលរបស់ព្រះអង្គសង្គ្រោះ បានធ្វើជាគំរូនៃការស្រឡាញ់អ្នកជិតខាង។ ពិតណាស់ ជាញឹកញាប់មេរៀនរបស់ទ្រង់គឺអំពីក្តីស្រឡាញ់ និងការបម្រើ។ ដូចគ្នានេះដែរ គ្រូបង្រៀនដែលខ្ញុំចងចាំបំផុត គឺគ្រូបង្រៀនដែលស្គាល់ ដែលស្រឡាញ់ និងយកចិត្តទុកដាក់ចំពោះសិស្សរបស់ពួកគេ។ ពួកគេស្វែងរកចៀមដែលវង្វេង។ ពួកគេបានបង្រៀនមេរៀនជីវិតដែលខ្ញុំតែងតែចងចាំជានិច្ច។
គ្រូបង្រៀនម្នាក់ដូច្នេះគឺ លូស៊ី ហ្គើច ។ គាត់ស្គាល់សិស្សរបស់គាត់ម្នាក់ៗ។ គាត់មិនបង្អង់ក្នុងការទូរស័ព្ទទៅរកសិស្សដែលអវត្តមាននៅថ្ងៃអាទិត្យ ឬដែលមិនបានមកឡើយ។ យើងបានដឹងថា គាត់ខ្វល់ខ្វាយពីយើង។ គ្មាននរណាម្នាក់អាចបំភ្លេចគាត់ ឬភ្លេចមេរៀនដែលគាត់បានបង្រៀននោះឡើយ។
ប៉ុន្មានឆ្នាំក្រោយមក មុនពេលដែល លូស៊ី ទទួលមរណៈភាព ខ្ញុំបានទៅសួរសុខទុក្ខគាត់។ យើងបានសំណេះសំណាល អំពីរឿងរ៉ាវដែលកន្លងផុតទៅយូរមកហើយនោះ ចាប់តំាងពីមុនគាត់ក្លាយជាគ្រូរបស់យើង។ យើងបាននិយាយអំពីសមាជិកម្នាក់ៗនៅក្នុងថ្នាក់របស់យើង ហើយពិភាក្សាគ្នាថា តើម្នាក់ៗកំពុងធ្វើអ្វីបច្ចុប្បន្ននេះ។ សេចក្តីស្រឡាញ់ និងការព្រួយបារម្ភរបស់គាត់បានបន្តមានពេញមួយជីវិត។
ខ្ញុំស្រឡាញ់សេចក្តីបង្គាប់របស់ព្រះអម្ចាស់ដែលមាននៅក្នុង គោលលទ្ធិ និង សេចក្តីសញ្ញាថា៖
« យើងប្រទានដល់អ្នកនូវព្រះបញ្ញត្តិមួយថា អ្នកត្រូវបង្រៀនគ្នាទៅវិញទៅមកនូវគោលលទ្ធិនៃនគរ » ។
« ចូរអ្នករាល់គ្នាព្យាយាមបង្រៀន ហើយព្រះគុណរបស់យើងនឹងនៅជាមួយអ្នក »។៦
លូស៊ី ហ្គើច បានព្យាយាមបង្រៀន ដោយសារគាត់មានសេចក្តីស្រឡាញ់ដែលមិនចេះនឿយហាត់។
សូមផ្តល់សេចក្តីសង្ឃឹម និងសេចក្តីពិត
សាវក ពេត្រុស បានផ្តល់ដំបូន្មានថា៖ «ចូរប្រុងប្រៀបជានិច្ច ដើម្បីនឹងតបឆ្លើយដល់អ្នកណាដែលសួរពីហេតុនៃសេចក្តីសង្ឃឹមរបស់អ្នករាល់គ្នា » ។៧
ប្រហែលជាសេចក្តីសង្ឃឹមដ៏មហិមាបំផុតដែលគ្រូអាចផ្តល់ដល់សិស្សបាននោះ គឺជាសេចក្តីសង្ឃឹមដែលមាននៅក្នុងសេចក្តីពិតនៃដំណឹងល្អនៃព្រះយេស៊ូវគ្រីស្ទ ។
មរមនបានសួរថា៖ « តើអ្វីទៅដែលអ្នករាល់គ្នាសង្ឃឹមចង់បាន? » « មើលចុះខ្ញុំសូមប្រាប់អ្នកថា អ្នករាល់គ្នានឹងមានសេចក្តីសង្ឃឹម ដោយរយៈដង្វាយធួននៃព្រះគ្រីស្ទ និងអំណាចនៃដំណើររស់ឡើងវិញរបស់ទ្រង់ដើម្បីឲ្យបានប្រោសឲ្យមានជីវិតដ៏នៅអស់កល្បជានិច្ច ហើយនេះក៏មកពីសេចក្តីជំនឿអ្នកដល់ទ្រង់ »៨
គ្រូបង្រៀនទាំងឡាយ សូមបន្លឺសំឡេងរបស់អ្នកឡើង ហើយថ្លែងទីបន្ទាល់អំពីនិស្ស័យពិតនៃក្រុមព្រះ។ សូមប្រកាសជាសាក្សីស្តីអំពីព្រះគម្ពីរមរមន។ សូមនាំទៅរកភាពរុងរឿង និងស្រស់ស្អាតនៃសេចក្តីពិត ដែលមាននៅក្នុងផែនការនៃសេចក្ដីសង្គ្រោះ ។ សូមប្រើប្រាស់ឯកសារនៃសាសនាចក្រដែលបានអនុមតិ ជាពិសេសគឺព្រះគម្ពីរទាំងឡាយ ដើម្បីបង្រៀនសេចក្តីពិតនៃដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទ នៅក្នុងភាពត្រឹមត្រូវ និងដោយសាមញ្ញ។ សូមចងចាំសេចក្តីបង្គាប់របស់ព្រះអង្គសង្គ្រោះឲ្យ « អ្នករាល់គ្នាស្ទង់មើលគម្ពីរ ដោយស្មានថា បានជីវិតដ៏នៅអស់កល្បជានិច្ចអំពីគម្ពីរនោះមក គឺជាគម្ពីរនោះឯងដែលធ្វើបន្ទាល់ពីខ្ញុំ » ។៩
សូមជួយកូនចៅរបស់ព្រះអម្ចាស់ឲ្យយល់ដឹង អំពីអ្វីដែលពិតប្រាកដ និងមានសារៈសំខាន់នៅក្នុងជីវិតនេះ។ សូមជួយពួកគេបង្កើនកម្លាំងរឹងមាំ ដើម្បីជ្រើសរើសផ្លូវដែលនឹងរក្សាពួកគេឲ្យមានសុវត្ថិភាពនៅតាមផ្លូវឆ្ពោះទៅរកជីវិតអស់កល្បជានិច្ច។
សូមបង្រៀនសេចក្តីពិត នោះព្រះវិញ្ញាណបរិសុទ្ធនឹងជួយក្នុងកិច្ចខិតខំរបស់អ្នក។
« រៀននឹងខ្ញុំចុះ »
ដោយសារព្រះយេស៊ូវគ្រីស្ទ គោរពប្រតិបត្តិ និងធ្វើតាមសេចក្តីបង្គាប់ដ៏ឥតខ្ចោះរបស់ព្រះបិតាទ្រង់ នោះទ្រង់ « ប្រកបដោយប្រាជ្ញារឹតតែច្រើនឡើង ហើយជាទីគាប់ព្រះហឬទ័យ ដល់ព្រះនឹងចិត្តមនុស្សផង »១០ តើយើងមានការប្តេជ្ញាចិត្តដើម្បីធ្វើដូច្នេះដែរឬទេ? គឺដូចព្រះយេស៊ូវដែរទ្រង់ « បានទទួលព្រះគុណថែមលើព្រះគុណ »១១ យើងត្រូវតែមានចិត្តអត់ធ្មត់ ស្វែងរកពន្លឺ និងចំណេះដឹងមកពីព្រះក្នុងកិច្ចខិតខំរបស់យើងដើម្បីរៀនដំណឹងល្អ។
ការស្តាប់ គឺជាធាតុដ៏សំខាន់មួយនៃការរៀនសូត្រ ។ នៅពេលធ្វើការរៀបចំដើម្បីបង្រៀន យើងត្រូវស្វែងរកការបំផុសគំនិត និងការបញ្ជាក់មកពីព្រះវិញ្ញាណបរិសុទ្ធប្រកបដោយការអធិស្ឋាន។ យើងគិតពិចារណា យើងអធិស្ឋាន យើងអនុវត្តមេរៀនដំណឹងល្អ ហើយយើងស្វែងរកព្រះឆន្ទៈរបស់ព្រះបិតាចំពោះយើង។១២
ព្រះយេស៊ូវ « បង្រៀន… ជាច្រើនដោយពាក្យប្រៀបធៀប១៣ ដែលតម្រូវឲ្យត្រចៀកត្រូវស្តាប់ ភ្នែកត្រូវមើល និងបើកដួងចិត្តដើម្បីទទួលការចេះដឹង។ ខណៈដែលយើងរស់នៅដោយសក្តិសម នោះយើងអាចកាន់តែស្ដាប់ឮការខ្សឹបប្រាប់នៃព្រះវិញ្ញាណបរិសុទ្ធ ដែលអាច « បង្រៀន [ យើង ] ពីគ្រប់សេចក្តីទាំងអស់ ក៏នឹងរំឮកពីគ្រប់ទាំងសេចក្តីដល់ [ យើង ]»១៤ ។
ពេលយើងឆ្លើយតបចំពោះការអញ្ជើញដ៏ទន់ភ្លន់របស់ព្រះអម្ចាស់ ចូរ « រៀននឹងខ្ញុំចុះ» នោះយើងចាប់ផ្តើមទទួលទាននូវអំណាចដ៏ទេវភាពរបស់ទ្រង់។ ដូច្នេះចូរយើងឆ្ពោះទៅមុខក្នុងស្មារតីនៃការគោរពប្រតិបត្តិ ធ្វើតាមទ្រង់ដែលជាគំរូរបស់យើង តាមរយៈការបង្រៀនដូចជាទ្រង់ចង់ឲ្យយើងបង្រៀន និងរៀនសូត្រដូចដែលទ្រង់ចង់ឲ្យយើងរៀនសូត្រ។
© ២០១៦ ដោយ Intellectual Reserve, Inc. រក្សាសិទ្ធគ្រប់យ៉ាង។ បោះពុម្ពនៅ ស.រ.អា. ។ អនុមតិជាភាសាអង់គ្លេស ៖ ៦/១៥ ។ អនុមតិឲ្យបកប្រែ ៖ ៦/១៥ ។ ការបកប្រែនៃ First Presidency Message March 2016 Cambodian 12863 258
ការបង្រៀនចេញពីសារលិខិតនេះ
ប្រធាន ម៉នសុន អញ្ជើញយើងឲ្យ « ពិចារណាអំពីកិច្ចខិតខំប្រឹងប្រែង [របស់យើង] ដើម្បីបង្រៀន និងរៀនសូត្រ ហើយឲ្យមើលទៅព្រះអង្គសង្រ្គោះដែលជាអ្នកដឹកនាំផ្លូវក្នុងកិច្ចការនេះ»។ អ្នកអាចពិចារណាស្រាវជ្រាវព្រះគម្ពីរជាមួយសមាជិក ដែលអ្នកចុះសួរសុខទុក្ខ ដើម្បីស្វែងរកអត្ថន័យជ្រាលជ្រៅ ក្នុងរបៀបដែលព្រះយេស៊ូវគ្រីស្ទបានបង្រៀន និងបានរៀនសូត្រ។ អ្នកអាចចាប់ផ្តើមជាមួយព្រះគម្ពីរមួយចំនួនដែលប្រធាន ម៉នសុន យោងទៅលើ មានដូចជា ម៉ាថាយ ១១ : ២៩ , យ៉ូហាន ៥:៣០ និង ម៉ាកុស ៤:២ ។ អ្នកអាចពិភាក្សាអំពីអ្វីដែលអ្នកបានរៀន អំពីព្រះគ្រីស្ទ ដែលអាចជួយអ្នក « ចាប់ផ្តើមទទួលទានអំណាចដ៏ទេវភាពរបស់ទ្រង់»។