Klumech er a First Presidency, Ongedei el buil 2016
“Mosuub er Ngak”
Ngar a Ikelesia er a Jesus Kristo er a Uriul-klebesei el Santo, e kede rokui el olsisechakl e rokui el di mesuub. A rokui el chad a nguu tia lungil lokedong er a Rubak: “Mosuub er ngak … e ke mo nguu a ulengellem.”1
Ma ku mekedong er a rokui el Uriul-klebesei el Santo el mo ungil merritel a urerir el mo olsisechakl e mo mesuub e mo ngmai osengir el bedul a Osobel meng Mengetikaik a loruul. Kede medengei el kmo ngikal “olsisechakl a mlara Dios el mei”2 el mui el ngarbab er a rebek el lolisechakl. Ngii a ulsisecheklid el mo mui el oubeltik el reng er a Rubak el Dios el meral ngara rengud, me a teleteled, klisiched, me a uldesued, e moubeltikereng er a ngar bita er kid el di uaikid, ngii a Meduch Lolsisechakl e Okesiu er a melemalt el klengar.
Ngii ngikel millekoi: “Mei, e moltirakl er ngak.”3 “Ak mla kudmeklii e ochotii el mei er kemiu.”4
Dil Merekmo Bo Mobult
A Jesus a ulsisechakl er a kmal beot e ngdi ng tmolech el klemerang el ngii a llechukl er a Mateus. A uriul er a Jesus me a re chedal er a lebetengel el mlara Rois er a Transfiguration, e te mlo ultab er a Galilee e mlochu e ra beluu e ra Capernaum. Meng mla risei e a rulebengkel a mlei er a Jesus, e oker:
“Ng techang kel kot el ngarbab er a chelsel a rengedel a babeluades?
“Me a Jesus a milekedongii a tara kekerei el ngalek el mo er ngii, e ngiluu el mora delongelir,
“E dilu el kmo, Ak meral kmu er kemiu el kmo, Dil merekmo bo mobult, e bom uai a kekerei el ngalek, eng diak el sebechem el mo soiseb er a rengedel a babeluades.”5
Ngar a Ikelesia, e se el soad el kudmeklii el kirel osisecheklel ebangkelio a diak di domekeek a uldesuir a rengelekel a Dios, tia ngii mesel de ngar a rekeblid, ng chelesel a blil osisechakl, malechub a basio el ngarngii a berkel ebangkelio er ngii. Tiang a diak bo lolecholt a lodengei a chedam ma chedil, chad lolsisechakl, malechub a missionary. Ma ka doruul er ngii el mo melechel a klemedengei er kid er a Osobel ma Ikelesia er Ngii.
Sel ngii a moktek er a olsisechakl a mo olngeseu er a rengelekel sechal ma redil a Edam er a Babeluades me te lmuut el mo er Ngii e ngara deureng e kiei lobengkel el diak a ulebengelel. Me se el mo kudmeklii tiang, e ng kirel osisecheklel a ebangkelio el melisiich a rengrir er a bek el sils lokiu sel rolir a roltirakl me a ikel chedaol el telbiil. Se el ngii a soad a le mekedmokl a mo omeksemeriar er a chad el mo omdasu el kirel, e mo omelchesiu el kirel, e okor e mochu ouedikel el kirel otireklel a ikal osisechakl er a ebangkelio. Se el ngii a kirel mekedmokl a mo omekeroul er a klaumerang er a Rubak el Jesus Kristo me bo lobult el mo oltirakl er a ebangkelio er Ngii.
Se el osisechakl el ngii a mo omekngeltengat e omult a rengrir e olsobel a osisechakl el ngii a oltirakl er a teletael lulechotii a Osobel. A olsisechakl el chad el ngii a oltirakl er a okesiul a Oobel a oubeltikelreng e olngeseu er tirkel chad el lolsisechakl er tir. Te dualem er a rengrir tirkel lorrenges lolab a suobel el ngii a diak bolngemed el mlengai er a chedaol klemerang. Te kiei el klengar er tir a ungil doltirakl.
Te Oubeltikelreng e Mesiou
Se el cherrengelel a omesiou el blarngii a Osobel a olechotel a doubetlikereng el mora tang. Ng uaisei, el beltikelreng er Ngii me a omesiungel a mle blechoel el suobel el lolsisechakl. Ngokiu a osisiu el teletael, e tirkel chad el olsisechakl el sebechek el dobedebeketerir tirkel mle medengei, uluubeltikereng, e mle omekerreu er tirkel ble lolsisechakl er tir. Te ulsiik er tirkel mla metuchakl. Te ulsisechakl a suobel er a klengar el ngii a diak kubes.
A ta er tirkang el mle ungil lolsisechakl a Lucy Gertsch. Ng mle medengelterir a rederta er tirkel ble lolsiechakl er tir. Ng mle blechoel lomekedong er tirkel tara taem eng dimlak bol dum se el Sandei malechub tirkel dimlak lomais el mong. A ki mle medengei el kmo ng ulmekerreu er kemam. Ng diak a ta er kemam el ulebes er ngii malechub a suobel el ble lolsisechakl.
Betok el rak ruriul, e a Lucy er a bo locherung er a kodall, e ak mlo omes er ngii. A ki millatk a ikel klebesei er a kmal meketeketang er a lolsisechakl er kemam. A ki milsaod er a derta er tirkel kim dilak el mesuub me a ikel kuk tir a meruul er chelechang. A beltikelreng er ngii me a ulekerreuil a doibkur a kemanget el taem.
Ak meral soak a tekingel a Rubak el debetik er ngii er a Doctrine and Covenants:
“Ak meskemiu a llach el kmo ng kiriru el olisechakl er a tang me a tang a llach er a rengedek.
“Bol blak a rengmiu lolsisechakl me bom nguu a kracia er ngak.”6
Lucy Gertsch a mle blak a rengul lolsisechakl e lengii el millemolem loubeltikelreng.
Besterir a Urungulir ma Klemerang
A Apostol Peter a mle mellach, “Bo blechoel el di kldmokl el smodii er a ngii di el chad el oker er kemiu el kirel a urunguliu el ngara rengmiu.”7
Altang e se el kot el klou el urungulel a chad el ngikel olsisechakl a nguu el msang a urunguled el denguu er a klemerang er a ebangkelio er a Jesus Kristo.
“Me ngera se el omsal kmal moureng er ngii?” A Mormon a uleker. “Kid a ngarngii a urunguled lokiu a Tngakireng er a Kristo me a klisichel a Okisel er a Kodall, el mo ngar el mo cherechar, e le a uchul a klaumerang er kid er Ngii lokiu a telbiil.”8
Rolsisechakl, bo mesisiich el olecholt er a meral teletelel a Kledios. Mouchais er a sioning er kau el kirel a Babier er a Mormon. Mochotii a meang e klebokel el klemerang el ngii a ulsiseb er se el uldasu er a mo suobel. Mousbech a blal kengei el babier er a Ikelesia, el reua chedaol llechukl, el mo olisechakl a klemerang er a mla moluut el ebangkelio er a Jesus Kristo lokiu se el chelingsel me a betengel. Bo molatk er se el dilii a Osobel el mo “mesuub er a chedaol llechukl; e leng okiu ngii e kau a sebechem el mo nguu a diak a ulebengelel klengar: e ngokiu ngii e te sioning el kirek.”9
Bo molngeseu er a rengelekel a Dios el mo medengelii a merang e klou a belkul er tial klengar. Molngeseu er tir el mo mesisiich el melilt e ra rael el loiak ngii e te selbechakl er a omerolir el mora diak a ulebengelel klengar.
Molisechakl a klemerang, ea Chedaol Reng a mo ngosukau.
“Mosuub er Ngak”
E le uchul ea Jesus Kristo a mle cherrungel el olngesenges e oba ngariou el reng el mora Demal, e Ngii “a milrael el mo rebab a llemesel me a deruchellel, e mle ungil er a osengel a Dios me a chad.”10 Kid ng mesisiich a rengud el mo meruul osisiu el tekoi? Meng kmal diua Jesus el “ngiluu a kracia el mekekokil,”11 me kid a kired el mo klou a rengud e outekangel losiik a llomes me a klemedengei el ngara Dios el kirel a urered er a omesubed er a ebangkelio.
A orrenges a kot el klou a ultutelel el techetechel a omesuub. Sel dongedmokl er kid el mo melai a osisechakl, e kede ngara nglunguuch el mo melai a llomes me a oterkeklel lokiu a Chedaol Reng. Ke de merritel, kede meluluuch, kede oltirakl a suobel ra ebangkelio, e osiik er sel ngii a soal a Edam el kired.12
A Jesus a “ulsisechakl … a betok el tekoi lokiu a okesiu,”13 el ngii a usbechall a ding el mo orrenges, mad el mo omes, ma reng el mo medengei. Se el sekum me kede kedung, eng sebeched lungil rongesii a ngerel a Chedaol Reng, el ngii a sebechel “[losisecheklid] a rokui el tekoi, e mo olngeseu er [kid] meng diak dobes.”14
Se el de nguu a ongtil a Rubak el mo, “Mesuub er ngak,” e kid a mo sebeched el ousbech er a chedaol klisichel. Mei me kid, bodeuaisei, el merael bedul uchei loba reng er a blekongesenges, loltirakl er ngikal Okesiu sel dolsisechakl lokiu sel Ngii a soal el teletael er a olisechakl a de ngarngii e mesuub er se el Ngii a soal el teletael er a omesuub a de ngarngii.
© 2016 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/15. Kengei er a oidel: 6/15. Oidel a First Presidency Message, March 2016. Palauan. 12863 881
Osischeklel Tia el Klumech
A President Monson a olengit er kid el mo “omdasu el [kired] er a urered el mo olsisechakl e mo mesuub e mo ngmai osenged el bedul Osobel el ngii Ongetikaik er a ikal doruul.” Momdasu a mo omes a chedaol llechukl lobengterir tirkal moldingel er tir e bo momes a bebil er a teletael el Jesus Kristo a ulab lolsisechakl e milsuub. Ng sebechemeiu lomuchel lousbech a bebil er a bades el President Monson a ulusbech, el ua Mateus 11:29, Johanes 5:30, ma Markus 4:2. Ng sebechemiu el mo smaod aikel bla msuub el kirel a Kristo el ngii a sebechel ngosukau el mo “ousbech er a chedaol klisichel.”