Poraus seni ewe Aewin Presetensi, April 2016
Osini me An Emon Pwisin Pwarata
Seni Preseten Henry B. Eyring
Aewin Chon Aninis non ewe Aewin Presetensi
Ewe ennetin Mwichefenin Jises Kraist a niwinsefanito me a nom won fonufan ikenai. Ewe Mwichefenin Jises Kraist ren Aramas mi Pin non Fansoun Soponon a ekkemwen me ren soufos me chon kuno, ekkewe ra angei emwen seni nang.
Napanapen forutan chok me nom mi pwan pung. Sia kaeo me non ewe Paipel: “Ennetin ewe Samol Kot esap fori och mettoch, nge a pwarano an mwonomwon ngeni noun chon angang ekkewe soufos” (Amos 3:7)
Kot a fen kapas sefan non ach fansoun, me ren ewe Soufos Joseph Smith. I a pwarano unusen ewe kapas allimen Jises Kraist me ren ewe Soufos Joseph. I a eniwinato An ewe pristut mi pin fiti ekkewe ki me ekkewe pung, manaman, me aean ewe manamanen ewe pristut mi pin.
Non ach ran, soufos mi manau me chon kuno ra angei mumuta ar repwe kapas, osukuna, me emweni ewe mumuta seni Kot ewe Sam me ewe Samon Jises Kraist. Ewe Chon Amanau a apasa ngeni ewe Soufos, Met ngang ewe Samon ua fen apasa, ngang ua fen apasa, nge use omusaeino; ina mwo ewe nang me fonufan repwe tano, ai kapas esap tano, nge epwe ponueta, seni pwisin mongungui ika seni mongungun nei kewe chon angang, ei mi chok nonno (nengeni D&C 1:38)
Non mwichenapen mwichefen fan ruu non ew ier, sia feioch ren ewe tufich sia rong ekkewe kapasen ewe Samon fan itan seni Noun kewe chon angang. Ina ew nunnunon tufich mi auchea. Nge ewe auchean ena tufich a anongonong won ika kich sia angei ekkewe kapas fan emwenien ewe chok pwan Ngun mi Fel minne ekkewe chon angang ra pwan angei (nengeni D&C 50:19–22). Ussun chok ar ra angei emwen seni nang, iwe kich sipwe pwan angei. Iwe ena a murinno ren kich pwan ewe chok tongeni non pekin ngun.
“Fori Om Angang”
Ekkoch ier ra no emon chon ewe Mwichen Engon me Ruemon Aposel a ureniei pwe upwe anneani ew afanafanen ewe mwich a amonata ren ewe mwichenapen mwichefen. Ngang emon kisin chon ewe mwich. Ua kinisou ren an nukunuk pwe ngang mi tongeni anisi ne kutta ekkewe kapas ewe Samon a mochen epwe apasa. A apasa ngeniei fiti ew emenimen, “O, iei ewe ruemeruwen makken ewe afanafan.”
Ua chechemeni ewe kapasen aurour emon mi kirekiroch me tong ren Preseten Harold B. Lee (1899–1973) a ngeniei me mwen fiti wachimuken tumunochun an apasa: “Hal, ika ka mochen kopwe angei pwarata, fori om angang.”
Ua anneani, ekieki, me ioteki ena ruemeruwen makken ewe afanafan. Ua kaeo ren ukukun ai tongeni fan emwenien ewe Ngun mi Fel. Ren ewe fansoun ena chon ewe mwich a afanafan, ua fen fori ai angang. Use fat ika ua anisi, nge ua sinei pwe ua siwin nupwen ua rong ewe afanafan a afanafana. Porous ra toriei a nununo seni ekkewe kapas ua anneani me a apasa. Ekkewe kapas a watte wewen nap seni ekkewe ua anneani me non ewe maken ewe afanafan. Me ewe porous a ussun nge a chok wewe ngeniei, masengeni met mi namot ngeniei.
Ekkewe chon angangen Kot ra echikefen me iotek ar repwe angei ewe porous A awora fan iter ar repwe ngeni ekkewe ra mochen pwarata me pochokun. Met ua kaeo seni met a fis, me pwan chommong ekkoch ussun chok, pwe epwe anapano ewe wachimuken tufich mi wor seni ach rongorong ekkewe soufos me chon kaeo mi manau, sipwe angei niwinin won inisich ren ach sipwe angei pwarata.
Ewe Samon a tongei aramas meinisin ion mi rongorong An porous, me I a sinei ekkewe netip me nonnomun emon me emon. I a sinei met ekkesiwin, met kapasen pesepes, me met ennetin kapas allim epwe murinno ne anisi emon me emon aramas ar repwe finata ar an ngeni manau esemuch.
Kich ekkewe sia ausening ngeni me katon ekkewe porousen ewe mwichenapen mwichefen fan ekkoch me mwirin sia ekiek, “Met ua chemeni a konien murinno?” An ewe Samon anean ren emon me emon kich pwe ach ponueni epwe: “Ngang usap tongeni nemenono ewe fansoun nupwen ua mefi mongungun ewe Ngun mi Fel non ai ekiek me netipei a ureniei met upwe tongeni fori an epwe apwapwai Semei won Nang me ewe Chon Amanau.”
Sia tongeni angei ach pwisin pwarata nupwen sia rongorong soufos me chon kaeo me ika sia angang non nuku pwe sipwe angei, ussun chok nupwen Preseten Lee a apasa pwe sia tongeni. Ngang ua sinei pwe mi pung seni met ua fen pin sinei me seni ewe pwaratan ewe Ngun mi Fel.
© 2016 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/15 Kapungunon awewen: 6/15. Awewen First Presidency Message, April 2016. Chuukese. 12864 901
Afanafan seni ei poraus
Ekieki ne osomong ne aneani an Preseten Eyring ewe porous ussun kaeon ewe makken an ewe chon an ewe mwich ewe afanafanen ewe mwich. Meni kopwe eis, “Met ewe niwinin ach angei pwarata?” Mwirin om porous won, ka tongeni tingorei ekkewe ka churir ar repwe ekieki me forata ew kokkot ar repwe angei ewe porousen ewe mwichenapen mwichefen epwe feitto “fan emwenien chok pwan ewe Ngun mi Fen minne a kawor ngeni [noun Kot] chon angang.”