Mesaj Premye Prezidans lan, Avril 2016
Pwofesi ak Revelasyon Pèsonèl
Prezidan Henry B. Eyring
Premye Konseye nan Premye Prezidans lan
Vrè Legliz Jezikri a te retabli epi li sou tè a jodia. Legliz Jezikri pou Sen Dènye Jou yo te toujou dirije pa pwofèt ak apòt vivan, ki resevwa oryantasyon konstan ki soti nan syèl la.
Chema diven sa a te egziste nan tan ansyen tou. Nou aprann nan Bib la: “Konsa tou, ou mèt sèten, Senyè a pap janm fè anyen san li pa fè pwofèt yo, moun k ap sèvi l yo, konnen” (Amòs 3:7).
Bondye pale ankò nan epòk nou an, palentèmedyè Pwofèt Joseph Smith. Palentèmedyè Pwofèt Joseph Smith, li revele levanjil Jezikri a nan plenitid li. Li retabli prètriz sakre l la avèk kle l yo ak tout dwa, pouvwa, ak fonksyon pouvwa sakre prètriz la.
Nan epòk nou an, pwofèt ak apot vivan yo otorize pou yo pale, ansenye, epi dirije avèk otorite ki soti nan men Bondye Papa a ak Senyè a Jezikri. Sovè a te di Pwofèt la “Sa mwen menm Senyè a m te di a, m te di l, m pa mande eskiz; epi menm si syèl yo ak tè a pase, pawòl mwen yo p ap pase, men yo tout pral akonpli kit se avèk pwòp vwa pa m oubyen avèk vwa sèvitè m yo, se menm bagay la” (D&A 1:38)
De fwa pa ane nan konferans jeneral, nou beni avèk opòtinite pou nou tande pawòl Senyè a pou nou nan men sèvitè L yo. Sa se yon privilèj san pri. Men valè opòtinite sa a depann sou si nou resevwa pawòl sa yo sou enfliyans menm Lespri a ki te bay sèvitè sa yo pawòl sa yo (gade D&A 50:19-22). Menm jan yo resevwa gidans soti nan syèl la, se konsa nou dwe fè tou. Epi sa mande pou nou fè menm efò espirityèl la.
“Fè Devwa Nou”
Sa gen kèk ane yon manm nan Kolèj Douz Apot yo te mande m pou m te li yon diskou konferans li t ap prepare pou konferans jeneral. M te yon nouvo manm nan kolèj la. M te santi m onore dèske l te gen konfyans ke m te ka ede l jwenn pawòl Senyè a ta vle li pale yo. Li te souri lè li te di m: “O, sa a se venndezyèm bwouyon diskou a.”
M te sonje konsèy yon Prezidan Harold B. Lee (1899–1973) janti ak eman te ban mwen avèk gwo ensistans anvan sa. “Hal, si w vle jwenn revelasyon, fè devwa w.”
M te li, medite, epi priye sou venndezyèm bwouyon sa a. M te etidye l osibyen m te kapab sou enfliyans Sentespri a. Rive nan moman pou manm kolèj sa a te fè diskou l la, m te fin fè devwa mwen. M pa sèten m te ede, men m konnen m te chanje lè m te tande diskou li a. Mesaj ki te vin nan lespri m yo te depase pawòl yo m te li yo ke l te pale yo. Pawòl yo te gen plis siyifikasyon pase sa m te li yo nan bwouyon an. Epi mesaj la te sanble li te fèt espesifikman pou mwen menm, e li te apwopriye pou bezwen mwen.
Sèvitè Bondye yo jene e priye pou yo resevwa mesaj Li genyen pou bay moun ki bezwen revelasyon ak enspirasyon yo. Sa m te aprann apati eksperyans sa a, ak anpil lòt ki menm jan avèk li, sèke, pou nou jwenn gwo benefis ki disponib lè nou tande pwofèt ak apot vivan yo, nou dwe peye pri pou n resevwa revelasyon an poukont nou.
Senyè a renmen chak moun ki ka tande mesaj Li a, epi Li konnen kè ak sikonstans chak ladan yo. Li konnen ki koreksyon, ki ankourajman, ak ki verite levanjil ki pral pi byen ede chak moun pou yo chwazi wout yo sou chemen lavi etènèl la.
Nou menm ki tande e ki gade mesaj jeneral konferans general yo konn pafwa panse nan aprè: “Kisa m sonje plis?” Espwa Senyè a pou chak nan nou se pou repons nou an tankou sa a: “M p ap janm bliye moman kote m te santi vwa Lespri a nan lespri m ak nan kè m ki t ap di m sa m te ka fè pou m te fè Pè Selès mwen an ak Sovè a plezi.”
Nou ka resevwa revelasyon pèsonèl lè nou tande pwofèt ak apot yo epi pandan n ap travay ak lafwa pou resevwa li, menmjan Prezidan Lee te di nou dwe fè a. M konnen sa vre apati eksperyans pa m epi gras ak temwayaj Lespri a.
© 2016 pa Intellectual Reserve, Inc. Tout dwa rezève. Enprime nan Etazini Damerik. Apwobasyon Anglè: 6/15. Apwobasyon tradiksyon: 6/15. Tradiksyon First Presidency Message, April 2016. Haitian Creole 12864 036
Ansèyman nan mesaj sa a
Konsidere pou w li istwa Prezidan Eyring apwopo lè l te etidye bwouyon diskou konferans manm kolèj li a awotvwa. Ou gen dwa mande: “Ki pri pou resevwa revelasyon?” Aprè diskisyon w lan, ou ka envite moun w ap vizite yo pou yo medite epi aplike yon plan pou resevwa mesaj yo pou konferans jeneral k ap vini an “sou enfliyans menm Lespri ki te bay sèvitè [Bondye] sa yo pawòl sa yo.”