Pweng sin Prestuhnsi Se Met, Eprel 2016
Palye ac Fwackyuck La Sifacna
Sel Prestuhn Henry B. Eyring
Mwet in Kahsruh Se Met ke Prestuhnsi Se Met
Alu pwacye luhn Jisus Kraist sifilpac fohlohkihnyuckyak ac oasr fin facluh mihsenge. Alu luhn Jisus Kraist luhn Mwet Luhlahlfongi ke Lwen-sahflah pa kwacna kolyuck sin mwet pahluh moul ac mwet sap, suc eis kolyuck suwohs inkuhsrao me.
Atac wolacna se ingacn oacyacpac pwacyena emet me. Kuht lotwelah ke Pwacpuhl: “Leum God Fulat el tiac ku in oru kutena ma el fin tia akkalemye meet nuh sin mwet kulansap lal, mwet palu” (Amos 3:7).
God El oacyacpac sruhmuhn ke pacl lasr uh, kacl Mwet Pahluh Joseph Smith me. El fahkwack kacl mwet Pahluh Joseph me ke wosasuc luhn Jisus Kraist ke fohnlah la uh. El fohlohkohnwack pristut muhtahl Lal wi ki kac uh ac suwohs nuh kwewa, kuh, ac mukwikwi ke kuh muhtahl luhn pristut uh.
Ke lwen lasr uh, mwet pahluh moul ac mwet sap uh eis lwelah in sramsram, luti, ac kol ke kuh luhn God Pahpah ac Leum Jisus Kraist. Mwet Lahngo El fahk nuh sin Mwet Pahluh lah El tiac ekuhllah ma El sramsramkihn uh, Nga fahk, ac Nga tiac ahkmwesahsyeyuc sifacna; ac tuh inkuhsrao ac facluh fah wacngihnlac, tuh kahs Lal fah tiac wacngihnlac, tuh fah ahkfalyeyucklac, lah ke puhsrwek sifacna kuh ke kahs luhn mwet sap luhk, el oacna sie (liye D&C 1:38).
Ke toeni luhlahp pacl luo ke yac se, kuht ahkinsewowoyeyuck ke pacl wowo in lohng ke kahs luhn Leum nuh sesr sin mwet sap Lal uh. Pa ingacn luhpan mwe engan sahyac uh. Tuhsruhk luhpah se ke ma wolacna ingacn wiwina ma kuht eis ke kahs ye kuh ma Nguhn sac pacna suc sang nuh sin mwet kuhlwacnsap lal (liye D&C 50:19–22). Oacna ke elos eis kolyuck inkuhsrao me, oruh enenuh se nuh sesr pac. Ac enenuh se nuh sesr kuh ke nguhn sacn pacna.
“Oruh Orekma Lom Lohm ah”
Yac tari ac sie sin mempucr ke U Luhn Mwet Sap Singucul Luo siyuck sihk in riti sie sramsram nuh ke toeni ma el ahkoelah nuh ke toeni luhlahp uh. Nga tuh sie mempucr fuhsr ke u sac. Nga srui ke luhlahlfongi lal muh nga kuh in kahsrwel in sokwack kahs Leum El kena elan sruhmuhn uh. El fahk nuh sihk ke sie isrwacsr srihsrihk, “O, pa inge srihkasrak ahk 22 ke sramsram se.”
Nga esam ke kahs in kahsruh luhngselacna ac kuhlwacng lal Prestuhn Harold B. Lee (1899–1973) suc el sana use nuh sihk ke ma wolacna yohk srihpac. “Hal, fin kom ke eis fwackyuck, oruh orekma lom lohm ah.”
Nga rit, nuhnkuh kac, ac pruhe ke srihkasrak ahk 22 sacn. Nga lutlut yohk ngan kuh in eis moklweyuck luhn Nguhn Muhtahl. Ke pacl se mempucr se ke u sacn tuh oruh sramsram lal ah, nga ahksahfyelah orekma luhk ah. Nga tiac arlacna etuh lah nga kahsruh, tuh nga etuh lah nga eklac ke nga lohng sramsram sac oreklac ah. Pweng inge tuhkuh nuh sihk ahluhkwelah kahs nga riti ac kahs el sruhmuhn ah. Kahs ingacn arulacna yohk kalmac likina ma nga riti ke srihkasrak sac ah. Ac pweng ingacn oacna in arlacna oasr kalmac nuh sihk, fal nuh ke enenuh luhk uh.
Mwet kuhlwacnsap luhn God uh lalo ac pruhe in eis pweng El ahkolah nuh selos in sang nuh sin suc enenuh fwackyuck ac moklweyuck uh. Ma nga lotwelah ke ohiyac sacn, ac puhs mwet sahyac luhngse kac, pa in eis mwe kahsruh yohk in lohng sin mwet pahluh moul ac mwet sap uh, kuht enenuh in moli luhpah lasr sifacna ke eisyacn fwackyuck uh.
Leum El luhngse kais sie sesr suc kuh in lohng pweng Lal, ac El etuh insiyac ac ma oasr yurin kais sie. El etuh mwe ahkwoyelah, mwe ahkkweye, ac ma pwacye ke wosasuc ac wo emet in kahsruh kais sie mwet in sulaclah inkacnek lalos ke inkacnek nuh ke moul ma pahtpaht.
Kuht suc lohng kac ac liye pweng ke toeni luhlahp uh kuhtuh pacl uh nuhnkuh tohkohyang, “Meac nga esam wo emet uh?” Leum El finsrakihn tuh top lasr kais sie in pa: “Nga fah tiacna muhlkuhnlah puhlan pacl ke nga puhla puhsrwen Nguhn ke nuhnak luhk ac insiyuck fahk nuh sihk ma nga kuh in oruh in sang ahkinsewowoye Pahpah tuhmuhk Inkuhsrao ac Mwet Lahngo uh.”
Kuht kuh in eis fwackyuck la sifacna sacn ke pacl kuht lohng mwet pahluh ac mwet sap uh ac ke kuht orekma ke luhlahlfongi in eis kac, oacna ke Prestuhn Lee el fahk muh kuht kuh uh. Nga etuh lah pwacye ke ma puhlakihnyuck ac ke mwe lohoh luhn Nguhn.
© 2016 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/15. Ahkkweyeyucklac ke lweng: 6/15. Lwenglah luhn First Presidency Message, April 2016. Kosraean. 12864 868
Luti ke pweng se inge
Nuhnkuh in riti in yohk ke sramsram soko lal Prestuhn Eyring ke lutlutkihnyacn srihkasrak ke sramsram luhn mempucr se ke u lal an. Kom ac fah siyuck, “Meac molin eisyacn fwackyuck uh?” Tukun ahkuhtweyac lom an, kom kuh in suli elos ma kom muhtwacta yohroh an in nuhnkuh ac nahwelah sie plwacn in eis pweng ke toeni luhlahp ma apkuhran me an “ye kohkoh luhn Nguhn sac pacna suc elos sang nuh sin mwet kuhlwacnsap luhn [God] uh.”