Rongorongo man Te Moan Beretitentii, Meei 2016
Rinerine
Au kantaninga bwa ti na teimatoa ni karaoi rinerine aika eti, irarikin are karaoan rinerine aika bure, are e na bebete riki karaoakiia.
Tariu ao mwaneu, imwain ae I moana au rongorongo n te bong aei, I tangiria ni katanoatai aua tembora aika boou aika, n namwakaina ao n ririki aika ana roko, ana kateaki n taabo aikai: Quito, Ecuador; Harare, Zimbabwe; Belém, Brazil; ao te kauoua n tembora i Lima, Peru.
Ngke I riki bwa kaain te Kooram n Abotorao n te Tengaun ma Uoman n te 1963, iai 12 tembora aika a mwakuri ngkai ni kabuta te Ekaretia. Ma katabuan te Provo City Center Tembora uoua te wiiki n nako, mwaitin ngkai tembora bon 150 aika a mwakuri ngkai ni kabuta te aonaaba. Ai kakatongara ngaira ibukin kakabwaia aika ti karekei inanon auti aika tabu aikai.
Ngkai, tariu ao mwaneu, I kan anga au kakaitau ibukin te tai are N na kona iai n tibwauai au iango tabeua ma ngkami, n te ingabong aei.
I a tibwa tia n iangoi taekan tabeua rinerine. E taekinaki bwa bwaai aika uarereke a kona naba n iai mwiia aika uarekereke iaon rongorongo ake ngkoa, ao a kona naba n rootaki maiuia aomata ni bwaai aika uarereke. Rinerine aika ti karaoi a uotiira nakon tokin kawaira.
Ngke ti kitana te maiu imwain te maiu aei ao n roko n te maiu ae mamate, ti uota te bwaintituaraoi ae te rinerine. Ara kouru bwa ti na karekea mimitongin te tiretio, ao rinerine aika ti karaoi a na, kaotia n angiin te tai, bwa ti kakoroa nanon ara kouru ke tiaki.
Angiia mai ibuakomi a taneiai ma rongorongon Alice n ana boki Lewis Carroll Alice’s Adventures n te Wonderland. Ko na uringnga ae e roko n te tuuta ni kawai ae uoua mwangana, ae a bane ni kaineti nako moa ma a kaitara. Ao e iangoia bwa tera ae na karaoia, e anaaki nanona man te bwai are e taekinna Cheshire Cat, are titirakina Alice, “E nga te kawai ae n na iria?”
E kaeka te katamwa, “E a bon nakoim nanom are ko tangiria n nako iai. Ngkana ko aki ataia bwa e nga te tabo ae ko tangiria n nako iai, e aaki taraaki bwa te kawai raa ae ko na toua.”1
Ti aki n aron Alice, ti ata te tabo ae ti na nako iai, ao eriai n taraaki bwa te kawai raa ae ti na iria, ibukina bwa te kawai ae ti na toua n te maiu aei e kairiiria nakon tokin kawaira ibukin te maiu are imwiina.
Au kantaninga bwa ti na rineia ni karikirakea inanora te onimaki ae korakora ma ni mwaaka are e na riki bwa ara otanga ae korakora ni kaitara te uare e buakaka—te onimaki ni koaua, te aeka n onimaki are e na kamatoaira ao ni kakorakorai nanora n rinea te eti. N akean te onimaki anne, ao akea te tabo ae ti na nako iai. Ngkana iai iroura, ao ti na kona ni kakoroi nanon ara kouru.
E ngae ngke e kakawaki bwa ti na rinerine ma te wanawana, iai taai aika ti na karaoi rinerine aika nanobaba. Te bwaintituaraoi n te rairannano, ae katauraoaki iroun ara Tia Kamaiu, e anganiira te kona ni kaeti kawaira bwa tiaonga n oki nakon te kawai are kairiira nakon mimitongin te tiretio ae ti ukoukoria.
Au kantaninga bwa ti na kateimatoa te ninikoria n aki iri iango aika rangin ni bwainaki. Au kantaninga bwa ti na teimatoa ni karaoi rinerine aika eti, irarikin are karaoan rinerine aika bure, are e na bebete riki karaoakiia.
Ngkana ti iangoi raoi taian babaire aika ti karaoi ni maiura ni katoabong—tao ni karaoan te rinerine teuana ma teuana—ngkana ti rinea Kristo, ti karaoa te rinerine ae eti.
Bwa e na teimatoa nanou ni kakaitau ao au tataro ae nanorinano n aran Iesu Kristo, ara Tia Kamaiu, amen.
© 2016 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/15. Kariaiakaki rairana: 6/15. Rairan te First Presidency Message, May 2016. Kiribati. 12865 859