Mulwol ko Bin Somm’on e Presidency, May 2016
Pin’en Ni Yibe Mel’eg
Ninge yoeg ningad me’leged fatin mat’aw nib mom’aw ko tin kireb ban’en nib moem rogon.
Pi walageg, um’on ni nggu tabab nag e numon Rog e daba’, ma Gu ba a’dag ni nggog marunga’agen aningeg e temple nib be’ech, ulan boechi pul nge duw ni ba yib, ma ra ni toey u: Quito, Ecuador; Harare, Zimbabwe; Belém, Brazil; nge bin la’agruw e temple u Lima, Peru.
Nap’an ni gu un ko Ulung ko Ragag nge L’agruwi Apostle u lane 1963, ma ba’ 12 e temple u lane Galasia ni yibe toey. L’agruw wik nike thimur nikan yibiliy nag fare Provo City Center Temple, ma chiney e 150 urngin e temple nib fal’ u dakean e fayleng. Ri gadaed ba falflaen’ ko pi tawa’ath ni gadaed be thapeg u lane pi temple ney nib thothup.
Chiney, pi walageg, e gu ba a’dag ni nggu pining e magaer ko ngiyal’ ney ni nggu weliy’ e tafney rog ngomed ko re kadbul ney.
Ku ug leam nag marunga’agen e pin’en ni yibe mel’eg. Kan noeg ni pin’en ni be buch e rayog ni nge thilyeg e tin kakrom ban’en, ni boed e yafas ko gidii’. Pi n’en ni gadaed be mel’eg e be sunmiy e tin nirabuch rodaed.
Nap’an ni kad chuw gaed u yafos u m’on ko yafos u fayleng rodad ni kad baed nga fayleng, ma ba’ e tawa’ath rodaed ni ngad mel’eged ban’en. Gol rodaed e ngad thapeged e rir u celestial, ma pin’en ni gadaed be mel’eg e ra n’anggin, ni baga’, ni gadaed ra taw ko ra gol nem rodaed ba fa danga’.
Oreni gimed e manang e babyor ni marunga’agen Alice ulan e babyorrok LewisCaroll ni kanoeg e Alice’s Adventures in Wonderland [N’en nike Buch Rok Alice u Bang Nib Falel]. Gara nang nike yib ko ba kanawo’ ni l’agruw e gin nib sar ngay u pow’chen, ra reb ma be sar nga m’on machane ba thil e gin nibe sar ngay. Nap’an ni dugliy e gin ni nge sar ngay, me mad’eg nike mada’ fare Cheshire Cat e ngay, me fith Alice ngak, “Bin ngan e kanawo’ e nggu fek?”
Fare gatu ke fulweg, “Be taga’ ngak e taw ni gaba a’dag. Fa’an damu nang e taw ni gaba a’dag ningam soer ngay, dariy’’ fan bi ningan e kanawo’ ngam fek.”1
Ba thil ku Alice, ya gadaed manang ko gin ni gadaed ba a’dag ni ngad dared ngay, mabaga’ fan ko gin ni ngad dared ngay, ya kanawo’ ni gadaed be leak u lane ra yafas ney e be feek daed ko yafas rodaed ko bin migid e yafas.
Gube athapeg ni gadaed ra mel’eg ni ngad suguyed gadaed ko mich nib gel ni ra mang e gelngin daed ko tirok mo’oniyan ban’en—mich nib riy’ul’, mit e mich ni ra ayuweg daed me pi’ gelngin daed ni ngad mel’eged e n’en nib mangil. Ra dariy’ e mich ney, ma dabin thap gaed nga biyang. Ra ba’, ma rayog ngad thapeged e gol rodaed.
Demtrug nib alamrin ni ngad mel’eged u fithik e gonop, ma ba’ e ngiyal’ nap’an ni gadaed ra mel’eg e tin de fel’. Tawa’ath ko kalngan’uy, nike pi e Tathapeg rodaed, e be yag nag ngodaed ni ngad fal’eged rogon e yafas rodaed, ni ngeyag ni ngad suloed ko ra kanawo’ ni ra fek daed ko ra rir nem u celestial ni gadaed ba a’dag.
Gube athapeg ni gadaed ra athamgil gad siyeged e tin tagan’ ban’en. Ninge yoeg ningad me’leged fatin mat’aw nib mom’aw ko tin kireb ban’en nib moem rogon.
Nap’an ni gadaed ra tunom nag e pin’en ni gadaed be mel’eg u lane yafas rodaed ni gubin ngiyal’—demtrug ko biney e fa binem—ma fa’anra gadaed ra mel’eg Kristus, ma gadaed ra ngongliy e tin nib mangil.
Meybil rog u lan gumircha’eg e rayog rodaed e biney u dakean fithngan Yesus Kristus, ni ir Somoel nge Tathapeg rodaed, amen.
© 2016 by Intellectual Reserve, Inc. All rights reserved. Kan yoloey u Mariken. Kan micheg nag ko thin nu Ngalis: 6/15. Micheg nag i pilyeg: 6/15. Pilyeg thin ko First Presidency Message, May 2016. Yapese. 12865 905