Pweng ke Forfor Luti, Mei 2016
El Fah Fihli Komi fin Pihsacl ac Us Kom nuh Lohm ah
Oacna ke Shepherd Wowo sac sokwack sip tuhlac Nahtuhl ah, kom fin furohklac nuhnkom ac insiyom muhkwena nuh sin Mwet Lahngo luhn facluh, El fah suk komyak.
Sie sin mwe esamyac ahksahngweng luhk ke nga srihk ah muhtwacwacack ke puhsra luhlahp ke ahkkahlwemye tatngal luhn aksohk ma okasyucyak liki mutul uh. Tiac paht pac, siepac puhsra, rarrar ac puhsrwen aksohk uh, kihtin pacl ah na yohkwelihk nuh ke usrusryak yen engyeng uh. Lotwelah wo sin ninac kiyacsr ah, kuht tuhlihk uh kais sie sruhkwack pack lasr uh ac kahsruhsr nuh fin ohl uh nuh ke sie acn in wihklac. Ke kuht silahklahk ke fong mahtoltol uh, flare folfol sra ac fasrfasr uh puhtat lucngi in mahkiyac tarket nuh sin mwet sisi pam ah. Ke usrnguck fal, mwet nuh kwewa pahngon flare inge sahk in Krismas.
Nga yac ahkosr matwac, ac nga sie mwet lohoh ke sie facl ke mweun.
Dresden
Tiac loes liki acn ma sucu luhk ah muhta we pa city luhn Dresden. Mwet suc muhta we ah etuh sahp pacl tausin ma nga liye ah. Tatngal na yohk oreklac ke pam puhkantwen na upac uh, osrwaclihk acn Dresden, kuhnahoslah yohk liki percent 90 ke city an ac wacngihn pacna ma luhlah sahyacn apact.
Ke kihtin pacl ah na, acn tuh pahngonyuck sie pacl ah “Jewel Box” wacngihnlac. Erick Kästner, sie mwet sihm Germany, suhmuhslah ke muhsahllah sacn, “Ke tausin yac pa ma kahto luhn acn sacn muhsahlah, ke fong se na kuhnanuclac nohfohn.”1 Ke pacl nga tuhlihk ah nga koflah motko ohiyac ma kuhnanuclac oreklac ke sie mweun mwet lasr sifacna uh sifacna sramtweack uh kuh in kuhtangyucklac. Facl raunikuhtlac uh oacna in wacngihn finsrak la ac sahyacn kuhtwena pacl fahsruh uh.
Yac tari ah, nga eis pacl wowo in fohlohk nuh Dresden. Yac itngucul tukun mweun ah, acn sacn, sifilpac, sie “Jewel Box” luhn city sacn. Ma muhsahllah uh ahkmwesahsyeyucklac, ac city sac sifilpac oreklac ac finne ahkwoyeyucklac.
Ke pacl in muhtwacta se luhk ah nga liye lohm in alu kahto luhn Lutheran Frauenkirche, Alu luhn Acn Sesr. Muhsahiyucklac ke yac 1700 muh, pa sie sin acn kahto fin acn Dresden, tuhsruhk mweun ah ahksrihkyelah nuh ke sie yol in yot. Ke yac pucspucs fihliyucki oacna ingacn, nuh ke sollac lah Frauenkirch fah sifil muhsahiyuckyak.
Yot ke alu muhsahllah sac sruhkyuckyak ac oreklac ac, ke kuh orekmakihnyuck ke muhsah uh. Mihsenge kom kuh in liye yot sralsrallah ke e inge ikeyuck lihkihn sinkac uh. “Kuhretyuck” inge tiac sie mwe acsmakihn muhkwena ke ma mweun mahtuh luhn muhsah se inge tuh oacyacpac sie mahk ke finsrak—sie akucl wolacna ke kuhiyen mukul uh in orwaclah moul sasuc liki apact uh.
Ke nga motko ma mahtuh luhn Dresden uh ac usrnguckkihn kahsruh ac nuhnak luhn mwet suc fohlohkohnwack ma kuhnausyucklac na upac uh, nga puhla moklweyuck na wowo luhn Nguhn Muhtahl. Pwacyena, nga nuhnkuh, fin mwet uh kuh in eis muhsahllah, ma lohlah, ac kuhnanuclac luhn sie city koluklac ac sifil muhsahyak lohm na usrnguck ma tuyak nuh inkuhsrao, fuhkah luhpan kuhiyen Pahpah Kuhlwacna tuhmwacsr in fohlohkohnwack tuhlihk Nahtuhl suc puhtatlac, tihkuclkucl, kuh tuhlac uh?
Tiacna yohk srihpac muhsahllahiyacn atacn moul lasr uh. Tiac yohk srihpac kulukiyen ma koluk lasr uh, luhpan puhla loal lasr uh, luhpan muhkahimtacl, sisilac, kuh muhsahllahiyacn insiyacsr. Finne mwet suc wacngihn finsrak la, suc moul suhpwacr, suc ahkkolukyelah luhlahlfongi, fuhlweack suwohs lalos, kuh forlah luhkwel God kuh in sifil muhsahiyucklac. Sahyacn wen koluk sesahlah ingacn, wacngihn moul arlac muhsahllah ma koflah na fohlohkihnyuckyak.
Pweng engan emet ke wosasuc uh pa inge: ke srihpen plwacn in engan ma pahtpaht utuckuh sin Pahpah tuhmwacsr Lucng ac ke kihsackuhnlah wacngihn sahflahiyac luhn Jisus suc Kraist, kuht koflah in moliyucklac muhkwena liki ohiyacn puhtatlac lasr ac fohlohklac nuh ke nwacsnwacs, tuhsruhktuh kuht kuh pac in orwaclah wo liki in nuhnkuh ac eklac mwet usru ke moul ma pahtpaht ac mwet ipeis wolacna ma pahtpaht luhn God.
Puhpuhlyuck ke Soko Sip Tuhlac
Ke puhlan luti luhn Mwet Lahngo, mwet kol kristin ke pacl sac tiac insese ke Jisus El eis pacl yurin mwet elos pahngon “mwet koluk uh.”
Sahp nuh selos oacna Elan lwelah kac kuh finne insese ke elah koluk na upac uh. Sahp elos luhlahlfongi lah ma wo emet in kahsruh mwet koluk uh pa ke kalyei, isrucn, ac ahkmwekihnyaclos.
Ke Mwet Lahngo El liye ma Pharisee uh mwet sihm uh nuhnkuh, El sruhmuhn soko sramsram:
“Fin sie suwos oasr sheep siofok natul, ac soko tuhlac, mea el ac oru? Ya el ac tia filiya ma eungoul eu inima an ac som suk ma soko ma tuhlac nwe ke na el konauk?
“Ke el konalak el ac arulana engan, na el ac sraklalak nu finpisal.”2
Ke pacl loeloes, puhpuhlyuck soko inge etweyuck ne mihsenge in sie sap nuh sesr in fohlohkohnma sip tuhlac uh ac in saplaklac nuh sin mwet suc tuhlac. Ke ma inge fal na pwacye ac wo uh, nga motko fin oasr ma yohk liki kac.
Yac kuh lah srihpac luhn Jisus, yohk liki nuh kwewa, pa in luti ke orekma luhn Shepherd Wowo sac ah?
Yac kuh lah El fahkwack luhlahlfongi ke luhngse luhn God nuh sin tuhlihk seahkostwen Nahtuhl uh?
Yac kuh tuh pweng luhn Mwet Lahngo pa lah God El etuh nohfohn mwet ma tuhlac—ac tuh El fah sokuhltahlwack, lah El fah saplakyang nuh selos, ac lah El fah molweloslac?
Fin pa ngacn, meac sip uh enenuh in oruh in ahkfalye kahsruh wolacna se inge?
Yac sip inge enenuh in etuh ohiyac in orekmakihn sie kuhfa upac in sokwack acn an? Yac enenuh in kuh in orekmakihn sie GPS in ahkuhtweyac acn oasr we an? Yac ma ingacn enenuh suhmaht la in oraclah sie app ma ac pahngon kahsruh? Yac sip soko an enenuh ahkkweye sin mwet kahsruh se met liki Shepherd Wowo sacn fah tuhkuh in molwelah?
Moh. Pwacyena tiac! Sip uh yohk srihpac in moliyucklac muhtahl ke srihpen luhngseyuck sin Shepherd Wowo sac.
Nuh sihk, puhpuhlyuck ke sip tuhlac uh pa sie sramsram yohk finsrak la emet ke ma suhmuhslah nuh kwewa uh.
Mwet Lahngo lasr, Shepherd Wowo sac, etuh ac luhngse kuht. El etuh kom ac luhngse kom.
El etuh ke kom tuhlac uh, ac El etuh acn kom oasr we uh. El etuh kweok lom. Mihslac lom kahlwem. Sahngweng lom. Sronin muhta lom uh.
Tiac yohk srihpac ohiyacn tuhlac lom uh—finne ke srihpen sulaclah suhfal lom sifacna kuh ke srihpen ohiyac ahluhkwelah kuhiyom uh.
Ma yohk srihpac pa lah kom tuhlihk Nahtuhl. Ac El luhngse kom. El luhngse tuhlihk Nahtuhl.
Ke srihpen El luhngse kom, El fah suk komyak. El fah engan in fihli komi fin pihsacl, ke engan. Ac ke El us kom nuh lohm sum, El fah fahk nuh sin mwet nuh kwewa, “Fahsru wiyu engan, mweyen nga konauk sheep soko nutik ma tula.”3
Meac Kuht Enenuh In Oruh?
Tuhsruhk, kom kuh in nuhnkuh, meac enenweyuck uh? Pwacyena nga enenuh in oruh yohk liki in ana sano in moliyucklac.
Finne Pahpah luhngse tuhmasr Lucng El kena tuh tuhlihk Nahtuhl nuh kwewa in fohlohk nuh Yohrohl, El fah tiac ahkkohsye kuhtwena nuh inkuhsrao.4 God El fah tiac molikuhtlac lain kena lasr.
Na meac kuht enenuh in oruh?
Solsol Lal fihsrwacsr:
“Utyak … nu sik.”5
“Fahsruh nuh Yuruk”6
El fahk pac lah kuht fin fototoi nuh Sel, El fah fototoi pac nuh sesr.7
Pa inge ohiyac kuht kuh in ahkkahlwemye nuh Sel lah kuht kena in moliyucklac.
Ma inge enenuh kihtin luhlahlfongi. Tuhsruhk nimet fuhlweack. Kom fin koflah orwacni luhlahlfongi ingena, muhtwacwacack ke finsrak.
Kom fin koflah fahk lah kom etuh lah God El oasr, kom kuh in finsrakkihn lah El oasr. Kom kuh in kena in luhlahlfongi.8 Ma ingacn fal in muhtwacwacack.
Na, mukwikwi nuh ke finsrak sacn, saplaklac nuh sin Pahpah Lucng. God El fah ahsrwelah luhngse Lal nuh sum, ac orekma in molwelah Lal ac in eklac fah muhtwacwacack.
Ke kuhtuh pacl, kom fah akihlen moklweyuck Lal in moul lom. Kom fah puhla luhngse Lal. Ac kena in fahsr ke ma pwacye Lal ac ukwe inkacnek Lal fah kapwack ke step nuh kwewa ke luhlahlfongi kom eis an.
Kuht pahngon step in luhlahlfongi inge “ahkostwen.”
Ma ingacn tiacna kahs pwengpweng ke lwen inge. Tuh ahkostwen pa sie nuhnak sacohk ke wosasuc luhn Jisus Kraist ke srihpen kuht etuh lah “ke Iwaclah luhn Kraist, mwet nuh kwewa kuh in moullac, ke ahkostwen ke masap ac akwuck ke Wosasuc.”9
Ke yohkwelihk luhlahlfongi lasr uh, kuht oacyacpac enenuh in kapwack ke in luhlahlfongi. Piacng sac nga kalweni fahk luhn sie mwet sihm German suc ahkkahlwemye kuhnanuclac luhn Dresden. El oacyacpac suhmuhslah pohloh kahs se: “Es gibt nichts Gutes, ausser Man tut es.” Nuh suwos suc tiac kahs German an, ma inge lwenglah oacna “Wacngihn ma wo ne ke na kom orwaclah.”10
Kom ac nga kuh in sramsram arlac kahlwem ke ma luhn nguhn. Kuht kuh in ahklutye mwet ke suhmahtiyacn lweng ke nuhnak lasr ke sifac ke alu uh. Kuht kuh in kaksyakihn ke alu ac “nuhnkuh ke mwemwe lasr inkuhsrao.”11 Tuhsruhk fin luhlahlfongi lasr uh tiac eklac nuh ke ohiyacn moul lasr uh—fin luhlahlfongi lasr uh tiacna mokle sulaclah lasr lwen nuh kwewa—alu lasr uh ac wacngihn srihpac, ac luhlahlfongi lasr, fin tiac misac, pwacyena tiac wo ac sensenkihn in sana wacngihnlac.12
Ahkostwen pa kuhiyen luhlahlfongi uh. Ke ahkostwen sacn kuht eis kahlwem nuh ke nguhnasr.
Tuh kuhtuh pacl uh nga nuhnkuh lah kuht tiac kahlwem ke seahkostwen. Kuht kuh in liye ahkostwen finsrak kac sifacna an, likina sie inkacnek in ahkfahsryelah. Kuh kuht kuh in ahkkohsye ahkostwen lain osra toasr luhn masap ke sie kuh in ahksuwohsye mwet kuht luhngse, ke fol upac ac kalweni in pahtok, nuh ke ohiyac muhtahl, kuhsrao.
Ma na pwacye se, oasr pacl sapkihnyuck kuht na pwacye in auliyak. Pwacyena, oasr kuhtuh mwet suc kuh in sun muhkwena ke ohiyac se inge.
Tuhsruhk sahp oasr sie kahs siena ma kuh in ahkuhtweyac lah efuh kuht ahkos masap luhn God. Sahp ahkostwen el tiac arlac ma ke ahkfahsr-yeyacn kuhrweni, furok, ac tukyac nguhnasr nuh ke sie ma kuht tiac. Sahyacna, pa ohiyac ke ma kuht sokwack ma kuht oreklac na pwacye kac.
Kuht oreklac sin God Kuhlwacna se. El pa Pahpah tuhmasr Lucng. Pwacyena kuht pa tuhlihk nguhn Nahtuhl. Kuht oreklac ke kuhfa usrnguck sacohk ac fuhlwact wolacna, ac ohinge kuht us lun insiyacsr sifacna kuhfa wolacna uh.
Inge fin facluh, tuhsruhk, nuhnak lasr ac mukwikwi uh eklac ma toasr nuh ke ma ma kuhtasrihk, tiac muhtahl, ac fohkfohk. Inge fin facluh, tuhsruhk, nuhnak lasr ac mukwikwi uh eklac ma toasr nuh ke ma ma kuhtasrihk, tiac muhtahl, ac fohkfohk.
Tuhsruhk ma nohfohn inge koflahna ekuhllah ohiyacsr na pwacye. Ma yohk srihpac wolacna kacsr uh oan na. Ac pacl se kuht sulaclah in sang insiyacsr nuh sin Mwet Lahngo wolacna lasr uh ac ahkolah nuh ke inkacnek luhn mwet tuhma lutlut, kuhtuh ma usrnguck uh sikyak. Luhngse luhn God sesseslah insiyacsr; kahlwem luhn ma pwacye nwacklah nuhnak lasr uh; kuht muhtwacwacack in wacngihnlac kena in oruh ma koluk; ac kuht tiacna ke sifil fahsr in lohsr.13
Kuht tuhkuh in liye ahkostwen in tiac sie mwe kai muhkwena tuhsruhk oacna sie ohiyac kuht in ahkfalye fuhfahsryucsr wolacna lasr uh. Ac kais kuhtuh na, koluk, fohkfohk, ac sruokyacn ma luhn facluh se inge muhtwacwacack in puhtatlac. Pacl na sa, nguhn yohk kalmeyac, ma pahtpaht luhn mwet inkuhsrao insiyacsr uh ahkkahlwemyeyuck, ac ohiyacn ma wo uh eklac oasr lasr.
Kom Yohk Srihpac in Moliyucklac
Tamuhlwel ac tahmtahel sacohk luhk, kawuck sacohk luhk, nga fahkwack luhlahlfongi lah God El etwekuht na pwacye uh—ac El nuhnkuh lah kuht yohk srihpac in moliyucklac.
Kom kuh in puhla lah moul lom uh muhsahllah. Sahp kom oraclah ma koluk. Sahp kom sahngweng, kasrkuhsrak, ahsor, kuh kweok ke tahfuhluo. Tuhsruhk oacpacna ke Shepherd Wowo sac sokwack sip tuhlac Nahtuhl ah, kom fin furohklac nuhnkom ac insiyom muhkwena nuh sin Mwet Lahngo luhn facluh, El fah suk komyak.
El fah molikomlac.
El fah sruhk komyak ac fihli komi Finpihsacl.
El fah us kuht nuh lohm ah.
Fin poun mwet uh ekuhllah yot srasrwelihk ac muhsahllah uh nuh ke sie lohm in alu kahto, na kuht kuh in eis puhlaik ac luhlahlfongi lah Pahpah tuhmasr Lucng El kuh ac fah sifil muhsahyak kuht. Plwacn Lal pa in muhsahi kuhtyak nuh ke kuhtuh ma wo liki na ma kuht oacna met—wo yohk likina ma kuht kuh in nuhnkwaclah. Ke kais sie step ke inkacnek luhn mwet tuhma lutlut, kuht kapwack nuh ke ohiyac luhn wolacna ma pahtpaht ac engan ma pahtpaht akwucki nuh sesr in eklac nuh kac.
Pa inge fahkwack luhlahlfongi luhk, mwe insewowo luhk, ac pruhe puhsisacl luhk ke ine muhtahl luhn Mwet Kol lasr, ke inen Jisus Kraist, amen.
© 2016 by Intellectual Reserve, Inc. All rights reserved. Sihmlac fin acn USA. Ahkkweyeyucklac ke kahs English: 6/15. Ahkkweyeyucklac ke lweng: 6/15. Lwenglah luhn Visiting Teaching Message, May 2016. Kosraean. 12865 868