Klumech er a Roldingel e Olisechakl, Ongeim el buil 2016
Ngii a Mo Oturau er a Ongelngelel e Ngoikau el Mo Remei
Ng di uaia Ungil Mengkar a Sib el mo osiik er a mla remiid el cheremel, e a omko ke di nguu a regnum lotilii er a Osebelel a beluulechad, e Ngii a mo metik er kau.
A tara kdekudel el teletael el kdebedebekii er a kekerei a klou el oto er a melebusech louchais el kirel a mekemad el meremang el ngii a ulekisak er a dusall. Ng di mle telkib, e a kuk tara oto, lorreek el oto er a berobera, a di mirael mo klou el di dorrenges ku er ngii er bab. Ngokiu a ungil losischeklel a delemam, e kemam lochad a ngilai a detmam e rirurt el ngmasech er a kedidai el mora selbechakl el basio a rrebet a dub. Tia er a ki morreched el merael er tial kmal milkolk el basio, e a chemadech e becheleleu e; mekerkard el kora ngau a merberebet er bab lolecholt aikel basio lomuu er ngii a resoldau. Ngodech el tekoi, le rebek el chad a ulemekedong aikal mekerkard el kmo ng kerkerul a Kurismas.
Ng eua rekik, e sioning er a mekemedil a beluulechad.
Dresden
A diak el sal cheroid er tial ki mkiliei er ngii a beluu er a Dresden. Tirkel kiliei er tial basio a locha kmeed el dart el taem el uiles ra ikel ngak a miles. Meklou el seseb, el dilubech er a ikal meklungel a dub el lulbuu, e silsebii tial beluu er a Dresden, el tilmelli a kmeed el oketiu el basent er tial beluu el di mlo bas me a komi medechel.
Chelsel a kedeb el taem, e tial beluu el mle tal okedongall el “Jewel Box” a ngomedang. A Erich Kastner, el chad er a omeluches er a Dois, a milluches el kirel tial tellemall, “Ng mla mo telael rak el klebokel dechor tial basio, e di chelsel a tal kesus eng dikeang.”1 Sera kekerei eng dimlak kisang el kmo ng mekera telmellel a mekemad el rechedemam a milchelii a sebechel mo diak. A beluulechad er kemam a uaia di le ngilemed, el diak ki mesa ngar medemam el taem.
Tial mlomerek el rak, eng mlarngii a techellek lemuut el mora Dresden. Okeuid el rak ruriul er a mekemad, e ngii, a luueta, el mocha “Jewel Box” er tial beluu. A ikel miltemall a mla mo mededaes, e tial beluu a luueta er a smechel e kmal ungiang el beluu.
Chelsel tial odngelek e ak milsa sel klebokel el ikelesia er a Lutheran, Frauenkirche, el Church of Our Lady. Ng mle kot el mo dechor er sera 1700s, e mle tara klebokel el basio er a chelsel a Dresden, eng di mekemad a tilmellii el di mlo komi el medechel. Ng mle medechel el uaisei el betok el rak, el mol muut er a le moterekokl el kmo tial Frauenkirche a lmuut el mo dechor.
A ikel bad er tial miltemall el ikelesia a mlekedmokl e mechederoder, e a ikel dirk ungil, a mlo usbechall er sera lluut okedecherul. Chelechal sils eng sebechem el mes aikal delul e mechedelkelk el bad el kora di blechebached el dechor el chelseklel a iikrel. A ikal “blechebached” el bad a diak el di lomeklatk el kirel a reksi er a mekemad ng dirrek lolengchelel a urunguled el klebokel lolchotel sel duch er a chad—el muut lolutii a kmo ngerang el miltemall.
Sel kulbedebek el kirel a reksi er a Dresden eng mechas a renguk er a duch me a blakelreng er tirkel ulutii tial kmal di miltemall el basio, e ak mlo omelchesiu er a klebokel lodbechel Chedaol Reng. Ng meral tekoi, ak mlo melbedebek, el kmo alsekum a chad a sebechel toketekii a beluu el ngii a kmal di miltemall e rullii a kmal klebokel lomekedecheraol el metongakl el bedul a eanged, eng locha uangera klungel sel duch er a Mesisiich el Chedam lolluut er a Rengelekel el tir a mla ruebet, ngara ringel, malechub e te mla remiid?
Meng diak el iior er a kmo ua ngerang a delechel a telmellel a klengar kid. Meng diak el iior er a kmo unagerang delechel a telmellel a klengar kid. Ng diak el iior er a krekrel a kngtid, malechub a delechel a klekikingelel a rengud, klsabisi, cheloit, malechub eng klengitelreng. Ng uldimukl er tirkel dikea urungulir, tirkel ngara ringel, tirkel mla metom er a klaumera er tir malechub e tem la mo ikrii a Dios a sebechir lmuut el mesmechokl. Meng diak luldimukl er tirkel derstang el chedal a diablong, ng di diak a klengar el kmal mekengtei el diak el sebechel moluut er a smechel.
A dmeu a rengud er ngii el chisel ebangkelio a tiakid: ngokiu a diak a ulebengelel uldasou er a mo suobel el blal beskid a Chedam er a Babeluades me a dirrek el chimol tngakireng er a Jesus Kristo, eng diak di bo desobel er a kngtid e deluut el mo klikiid, eng kede dirrek el ngoriakl el mo er sel klechad el meringel er a di chad el mtebengar e mo ngmai ikel rokui el kirel a diak a ulebengelel klengar me sel diak a smodii el klebkellel a Dios.
Cheldechedechal a Ririid el Sib
A Osobel er a le ngara beluulechad, e a remengeteklel a klechelid er sel taem a dimlak el kengei er a Jesus el mengoit a temel lobengterir a rechad el uaia ble le “mekngit el chad.”
Te locha ulemdasou el kmo Ngii a locha di ousubes e dirrek el di kongei aikal mekngit lomerellir. Te locha dirrek lulemdasou el kmo sel kot el bedochel el teletael ngosuterir a remekngit el chad el mo ouchel a rengrir a sel domtelub, doltuub, e domekrur er tir.
A Osobel er a bocha lodengelii uldesuir tirkal Pharisees me a rechad er a omeluches, eng mocha ouchais er a tal cheldecheduch:
“Omko a ta er kmeiu, olab a dart el sib, e a ta er ngii a remiid, eng diak el bechei a oketiu me a kltiu er a ked, e bo losiik er ngike el chimong el ririid, el dimerekmo le betik er ngii?
“E a le betekngei er ngii, e ngoturii er a ongelngelel, e le ngar deureng.”2
Ng meketeketang el taem, el tial cheldecheduch a uaia bla bo dodengelii el oderuchel el mei er kid el mo olluut aikel mla remiid el sib e mo osiik er tirkel mla remiid. Ng uaisei el klemerang e ungil tekoi, eng di ak melbedebek el kmo ngarngii a lmuut el belkul tiang.
Ng locha sebechel el moktek er a Jesus, sel kot el klou a belkul moktek, a ulisechakl el kirel a urerel a Ungil Mengkar a Sib?
Ng locha sebechel el Ngii a ulechais el kirel a beltkil a renugl a Dios el mora toucheklang el ngelekel?
Ng locha sebechel el klemechel Osobel a uase a Dios a mui el medengelterir tirkel mla remiid—e Ngii a mo olechoud er tir, e Ngii a ngosuterir, e Ngii a mo sobechekelterir?
A leuaisei e ngera sel kirel a sib el meruul er ngii el mo sebechel ngmai chedaol ngeseu?
A sib ng locha kirel lousbech er a meringel el dongu el klekedall me bol sebechel medengelii a cheroid? Ng locha kirel morngii a duch er ngii el meruul a app luchul e ngmai a ngeso? Ng locha kirel mo meduch lousbech er a GPS meng mo medengei el kmo ngar ker? Ng locha kirel morngii a duch er ngii el meruul a app luchul e ngmai a ngeso? A sib ng locha kirel ngarngii a chad el kora omtechei er ngii ruchei er a bo losiik er ngii a Ungil Mengkar a Sib?
Ng diak. Ng kmal diak! A sib a kmal sebechel tuobed a skel le ngii el betik er a rengul a Ungil Mengkar a Sib.
A denguu er ngak, e tial cheldechedechal a ririid el sib a tara kot el meskid a urunguled el cheldecheduch er a chelsel a rokui el chedaol llechukl.
A Osobeled, el ngii a Ungil Mengkar a Sib, a medengelaku e betik a rengul er kau. Ngii a medengelkau e betik a rengul er kau.
Ngii a medengei sel bla mriiid, Ngii a medengei el kmo ke ngar ker. Ngii a medengelii a klengitelreng el mngara chelsel. A ongtim. A dektem. A lengelem.
Meng diak el iior er a kmo ke milkera remiid—a le mekngit lomelilt el mrirull malechub a teletael el mlo diak el sebechem el metebechelii.
Sel kot el ngaruchei a kmo kau a Ngelekel. E Ngii a betik a rengul er kau. Ngii a betik a rengul er a Rengelkel.
Ng beltkil a rengul kirem a uchul, e Ngii a mo osiik er kau. Ngii a mo oturau er a Ongelngelel e ngara deureng. E sel le ngikau el mo remei, e Ngii a mo dmu er a rebek el chad el kmo, “Mngara deureng lobengkek; le ak mla metik er a ririid el ngelekek.”3
Me Ngera Kired el Meruul?
Eng di, ke locha mo omdasou el kmo, me ngera kirek el meruul? Ng kirel ngarngii a bok relii ng diak di kchelellakl e kungiil er a chad el me osiik er ngak.
Ng uaisei el Chedam a kmal soal a rokui el Ngelekel a lluut el mo er Ngii, Ngii a diak bo lorrimel er a ngii di el chad el mo soiseb er a babeluades.4 A Dios a diak be lolai er kid alsekum eng diak el soad.
A leuaisei e kede mekerang?
A ongtil a beot:
“Mobult … el mei er ngak.”5
“Mei er Ngak”6
Ng dirrek el mla melekoi el kmo alsekum e kede olsesei el mo er ngii e ngii a mo olsesei el mei er kid.7
Tiaikid a rolel e kede ochotii er Ngii el kmo ng soad el siokel.
Ng kirel lobengkel a telkib el klaumerang. Eng di lak bol moalech a rengum. A lak el sebechem el mekdebechii a klaumerang er chelechang, e momuchel loureng.
A lak el sebechem el kmo ke medengei el uase Dios a ngarngii, eng sebechem el di oureng el kmo Ngii a ngarngii. Ng sebechem loureng el mo oumerang.8 Tiaikid a ungil luchelel.
E sola, motireklii tial urungulem, e modersau el mora Chedam er a Babeluades. A Dios a mo odersii a beltikl a rengul bedul kau, e a Urerel losiik me a omelodech a mo omuchel.
E a cherengel a taem, e ke mo mtebengar a chimal a Rubak er a klengar kau. Ke mo melchesuar a beltkil a rengul. E sel klemeriar reng er kau el mo oltirakl a klemerang er Ngii e oltirakl er Ngii a mo mesisiich er a ikel bek el dauch er a klaumerang el moruul.
A ikal dauch er a klaumerang a domekedong el kmo “blekongesenges.”
Tia dikea le sal merael chisel tekoi er chelechal taem. Eng di blekongesenges a mekreos el suobel er a chelsel ebangkelio er a Jesus Kristo, le kede medengei el kmo “ngokiu a Tngakireng er a Jesus Kristo, e a rokui el chad a mo suobel, lokiu a blekongesenges er a llach me a chedaol ruoll e ra Ebangkelio.”9
Me sel lorael mo klou a klaumera er kid, eng dirrek el kirel mo klou a blakelreng er kid. Uchei e ak millekoi el kirel a chad er a omeluches er a Dois el mlara klengitelreng el kirel a telmellel a beluu er a Dresden. Ng dirrek el lilchesii tiakid el “Es gibt nichts Gutes, ausser: Man tut es.” Tirkel diak lodengei a tekoi er a celestial, e tiakid a belkul “Ng diak a ngii di el ngera el ungil alskeum eng diak mrelii.”10
Kau me a ngak a sebeched el kmal meduch e ungil mesaod a chedaol tekoi. Ng sebeched el chemas a rengrir a rechad er a llemesed me a omesoded er a tekingel a me a omesoded er a tekingel a klechelid. Ng sebeched el kmal osiich a tekoi er a klechelid e “melbedebek a ngkeded er a babeluades.”11 Eng di alsekum a klaumera er kid a diak el ngedechii a klengar—kid alsekum a doumera el tekoi a diak a ngera el relii er a ikel dolilt er a bek el sils— eng diak a ultutelel a klechelid er kid, a lak lulkeuad, eng diak le mesisiich e bai ngara omerollel mo nguemed.12
A blekongesenges a tekeklel a klaumerang. Ngokiu a blekongesenges e kede ngmai a klemerang me a klebkall.
Eng di a kumdasou el kmo bebil er a taem e ngodech a uldesued el kirel a blekognesenges Kede locha omes er ngii el uaia le moktek e diak ke bai domes er ngii el uaia rael el mo kudmokl a moktek er kid. Malechub e kede orrimel e mengesuseu er a betik er a rengud el chad el mo olngesenges a llach e melasm el meruul el ngika el chad el mo chedaol.
Ng klemerang el ngarngii a taem e kede mokedong el mo ouchel a rengud er a kngtid. Ng klemerang, el ngarngii a rebebil el sebeched el mo er tir lokiu tiaikid el rael.
Eng di locha ngarngii a ngodech el uchul omesodel a kmo ngera uchul me kede olngesenges a llechul a Dios. A blekongesenges a locha diak el sal belkul a kmo kede kuk kmal mo meringel el mengituuk e mengedechuul el mo er sel ngii a kuk diak el meral kid. Ng bai, teletael el ngii a sebeched el mo metik el kmo kid kede kmal mirruul er a ngerang.
Kid a ulebeob er a Mesisiich el Dios. Ngii a Demad. Ngii a Demad er a Babeluades. Kid a Ngelekel ra reng. Kid a ulebeob er a chedaol teletael el ngii a kot el mekreos e bliochel, me seikid a uchul e kede olab er a chelsed a chedaol teletael.
Eng di, chelechal de ngara beluulechad, e a uldesued me a omerelled a mo cheliseksikd er a mekngit, diak el chedaol, me a diak el klikiid. A mekngit er tial beluulechad a remuul a rengud el mo mekikiongel, el uchul eng mo meringel er kid el mtab e dobedebekii a dikesed me a moktek er kid.
Eng di a ikal rokui a diak el ngedechii sel meral ngii a teleteled. Sel uchelel a chedaol teleteled a di melemolem. E sel taem el dolilt el mult a rengud me a uldesued el mora Osobel e de ngai ochid lotab er a rolel a roltirakl, e a kmo ngera el mengasireng a dubech. Kede mo mui er a beltkil a rengul a Dios el kired, e a llemesed er a chedaol tekoi a mekeek a uldesued; meng mo diak er a rengud a meruul a mekngit; e mo diak el soad el muut el mo merael er a iilkolk.13
Kede merael mo medengelii a blekongesenges el kmo ng diak el kelebsenged ng bai rael el mo er sel ngii a de borngii. E mekekokil, a klengit, mekngit, me a telkelel tial beluulechad el merael mo nguemed. E a uriul, e sel mekreos el diak a ulebengelel reng er kid er a babeluades a mo mocholt, e a klungiaol a mo blekerdeled.
Kau a Kmal Kirem el Siokel
Rodam me a rodos, tokubets el sechelik, a kuchais el kmo a Dios a kmal ungil medengelii sel ngii a meral teleteled— e Ngii a mesekid el kired el siokel.
Ke locha mo omelchesiu el kmo a klengar kau a metemelang. Ke locha mla ruebet er a klengit. Ke locha medakt, kesib a rengum, ngara klengitelreng, malechub a ringel er a rraureng. Eng di ng uai ngike el Ungil Mengkar a Sib el mo metik er a mla remiid el cheremel sib, alsekum e kodersii a rengum el mora Osobelel a beluuelchad, e Ngii a mo metik er kau.
Ngii a mo osiik er kau.
Ngii a mo obelau e loiia er a Ongelngelel.
E Ngii a mo ngoikai el mo remei.
Alsekum a di chimal a chad a sebechel a komi me a mla metemall el klalo el mo klebokel el blai er a omengull, eng sebechel mo meklou a rengud e oumerang el kmo a Demad er a Babeluades a sebechel mo omult er kid. A moktek er Ngii a mo mengederoder er kid el mo er sel ngii a dimlak de ngarngii— sel ngii a diak dotebengar. Ngokiu a bek el dauch er a klaumerang el dengai er sel rolir a roltirakl, e kede meteketek el mo er sel diak a ulebengelel klebkall me a cherrungel el deureng el ngii a dulbeob el kirel.
Tiaikid a klaumera er ngak, e klengaltengat, e dirrek el medemdemk el nglunguchek el ngara ngklel a Jesus Kristo, amen.
© 2016 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/15. Kengei er a oidel: 6/15. Oidel a Visiting Teaching Message, May 2016. Palauan. 12865 881